မြန်မာနိုင်ငံ မှ ဟောင်ကောင် သို့ ဘိန်းဖြူ ( ၂၀၀၀) ဂရမ် သယ်ယူပို့ဆောင်မည့် လူငယ်များအား ရန်ကုန် အပြည်ပြည် ဆိုင်ရာ လေဆိပ်တွင် ဖမ်းဆီးရမိကြောင်း မြန်မာ နိုင်ငံ ရဲတပ်ဖွဲ့၏ ထုတ်ပြန်ချက် အရ သိရသည်။

ဘိန်းဖြူများသည် မြန်မာ – ထိုင်း နယ်စပ် တာချီလိတ်မှ ဝယ်ယူ သယ်ဆောင်လာသည့် ဘိန်းဖြူများဖြစ်ပြီး၊ နီပေါနိုင်ငံသားတဦး ဖြစ်သည့် Mr. AashishGurung အသက် ၃၇နှစ် အရွယ် ၏ စီစဉ်ပေးမှုကြောင့် ဟောင်ကောင် လေယာဉ်လိုင်းဖြင့် သယ်ဆောင်ရန် ကြိုးစားစဉ် ဇွန် ၂၃ ရက် နံနက် အစောပိုင်းက ရန်ကုန် အပြည်ပြည်ဆိုင်ရာလေဆိပ် တွင် ဖမ်းဆီးရမိခဲ့ခြင်းဖြစ်ကြောင်းသိရသည်။

အဆိုပါ ဘိန်းဖြူများအား Cathay Dragon Airlines ဖြင့် ဟောင်ကောင်လေဆိပ်သို့လိုက်ပါမည့် အသက် (၂၅)နှစ်အရွယ် ဝင်းသူနိုင်၏ ခရီးဆောင်အိတ်ကို X-Ray ဖြတ်သန်းစစ်ဆေးစဉ် တွေ့ရှိခဲ့ကြောင်း၊ ကွင်းဆက် စစ်ဆေးရာတွင် လေယာဉ်မောင် ဟောင်း တဦး အပါအဝင် မြန်မာလူငယ် (၅)ဦးနှင့် နီပေါနိုင်ငံသား ၁ ဦး တိို့ ပါဝင် ပတ်သက် နေကြောင်း မြန်မာနို်င်ငံ ရဲတပ်ဖွဲ့ ထုတ်ပြန်ချက် တွင် ဖော်ပြထားသည်။

ထို့ပြင် လေယာဉ်မောင် ဟောင်း ခေတ္တတည်းခိုသည့်နေအိမ်တွင် အိုက်စ် ( ICE) ၁၈၀၀ ဂရမ်၊ အသက် ၂၆ နှစ် အရွယ် ဝါဝါအိရွှေ(ခ) ရှန်ဖ နှင့် အသက် ၂၄ နှစ် အရွယ် ယွန်းဟေမာန် တို့ကို ၎င်းတို့ တည်းခိုသည့် ဟိုတယ်တွင် အိုက်စ်(ICE) ၀.၄၈ ဂရမ် နှင် ကတ်တမင်း အမှုန့်(၅) ဂရမ် နှင့်အတူဖမ်းဆီးရမိခဲ့ကြောင်းသိရသည်။

ဆက်လက်ပြီး ဇွန်လ (၂၂) ရက်နေ့ ၌ Cathay Dragon လေကြောင်းလိုင်းဖြင့် ဟောင်ကောင်သို့ကြိုတင်ထွက်ခွာသွားသည့် ရဲမင်း ကို လည်း ဇွန်လ (၂၅) ရက်နေ့ ရန်ကုန်လေဆိပ်သို့ ပြန်လည်ရောက်ရှိလာချိန်တွင် ဖမ်းမိခဲ့ကြောင်း သိရသည်။

မြန်မာ – ထိုင်းနယ်စပ် မှ ဝယ်ယူ သယ်ဆောင်လာပြီး တရုတ်နိုင်ငံ ဟောင်ကောင် သို့ တင်ပို့ဖမ်းဆီးရမိထားသူ (၆)ဦးကို မင်္ဂလာဒုံမြို့မရဲစခန်း၊ ဗဟန်းမြို့မရဲစခန်းတို့၌ သက်ဆိုင်ရာဥပဒေပုဒ်မများဖြင့် အမှုဖွင့်စစ်ဆေးနေကြောင်း သိရသည်။

ယမန်နေ့ ဇွန် ၂၆ ရက်နေ့ ကျရောက်သည့် အပြည်ပြည်ဆိုင်ရာ မူးယစ်ဆေးဝါးအလွဲသုံးမှု နှင့် တရားမဝင် ရောင်းဝယ်မှု တိုက်ဖျက်ရေးနေ့ တွင် ၂၀၁၈-၂၀၁၉ ခုနှစ်အတွင်း နိုင်ငံတစ်ဝန်းမှ ဖမ်းဆီးရမိသော မူးယစ်ဆေးဝါးများ ကို ရန်ကုန်မြို့၊ မန္တလေးမြို့နှင့် တောင်ကြီးမြို့တို့၌ မီးရှို့ဖျက်ဆီးခြင်းများ ဆောင်ရွက်ခဲ့သည်။

ထို မီးရှို့ဖျက်ဆီးခဲ့သည့် မူးယစ်ဆေးဝါးများ၏ စုစုပေါင်းကာလတန်ဖိုးသည် ငွေကျပ် ၄၅၁၇၄၆ ဒသမ ၃၇၇၄၂ သန်း(အမေရိကန်ဒေါ်လာ ၃၀၁ ဒသမ ၁၆၄၂၅၁၇ သန်း)ဖြစ်ကြောင်း သိရသည်။