အစိုးရစာသင်ကျောင်းများတွင် တိုင်းရင်းသားဘာသာစကားသင်ကြားသော နေ့စားလပေး ကျောင်းဆရာများ ဘွဲ့ရ၊ သင်တန်းပြီးပါက အစိုးရဝန်ထမ်းအဖြစ် တရားဝင်ခန့်အပ်သွားမည်ဟု သျှမ်းပြည်နယ်အစိုးရကပြောဆို လိုက်သည်။

နမ္မတူမြို့နယ် ပြည်နယ်လွှတ်တော်ကိုယ်စားလှယ် နန်းစံဟွမ်က ဇွန်လ ၁၁ ရက်နေ့က ကျင်းပသော ပြည်နယ်လွှတ်တော်အစည်းအဝေးတွင် – နေ့စားလပေး တိုင်းရင်းသားဘာသာ စာပေသင်ကြားသည့် ဆရာ ဆရာမ များအား အစိုးရဝန်ထမ်းအဖြစ် တရားဝင်ခန့်အပ်ပေးမည့်အစီအစဉ်နှင့်ပတ်သက်ပြီးမေးမြန်းရာတွင် လူမှုရေးဝန်ကြီး ဒေါက်တာမျိုးထွန်းက- တိုင်းရင်းသားဘာသာစာပေ သင်ကြားပေးတဲ့ နေ့စားလပေး ဆရာတွေ ဘွဲ့ရပြီးတဲ့လူဆိုရင် ပညာရေးနဲ့ တိုင်းရင်းသားရေးရာဝန်ကြီးဌာနက ချိတ်ဆက်ပြီးဖွင့်လှစ်ပေးတဲ့ သင်တန်းကို အရင်တက်ရပါမယ်။ ပြီးမှ ကျနော်တို့ ထောက်ခံချက်ပေးပြီးမှသာ အစိုးရဝန်ထမ်းအဖြစ်ခန့်အပ်မှာဖြစ်ပါတယ်- ဟု ဖြေကြားခဲ့ကြောင်းသိရသည်။

“ဒီဆရာ ဆရာမ တွေက အများစုက ၉ တန်းအောင် ၁၀ တန်းအောင် အဲလိုတွေဘဲရှိတယ်။ ဘွဲ့ရတဲ့သူကနဲတယ်။ ခံစားခွင့်က နေ့စားလပေး။ တရက်ကို ၄၈၀၀ ကျပ်ဘဲရတယ်။ အလုပ်က တိုင်းရင်းသားဘာသာစာပေအပြင်တခြား ကျောင်းသားတွေကိုထိန်းကျောင်းတာတွေလည်းကူလုပ်ပေးရတယ်။ အလုပ်တွေများတော့ ဆရာမ တွေက မနိုင်မနင်းဖြစ်ချင်သလိုဖြစ်နေတဲ့အနေအထားပေါ့။ စိတ်ဓါတ်ကျချင်လာတယ်အဲလိုတွေဖြစ်လာတယ်။ တကယ်လို့ သူတို့လေးတွေကို ၀န်ထမ်းခန့်လိုက်ရင် သူများတွေလိုခံစားခွင့်တွေရှိလာမယ်လေ။ အဲ့တာကြောင့် ကျမတို့ ဒီမှာလာပြီးဆွေးနွေးရတာဖြစ်ပါတယ်။ ” – ဟု နန်းစံဟွမ်က သျှမ်းသံတော်ဆင့်အားပြောသည်။

တိုင်းရင်းသားဘာသာစာပေ မြှင့်တင်ရေးအတွက် ၂၀၁၆ ခုနှစ်ကစပြီးအစိုးရကျောင်းများတွင် ကျောင်းချိန်ပြင်ပ တိုင်းရင်းသားစာပေသင်ကြားခွင့်ပြုထားသည်။ ၂၀၁၆-၂၀၁၇ ခုနှစ်တွင် အစိုးရစာသင်ကျောင်းများတွင် တိုင်းရင်းသားဘာသာစာပေသင်ကြားသည့် နေ့စားလပေး ဆရာ ဆရာမ ၆၀၀ ကျော်ရှိပြီး ၂၀၁၈-၂၀၁၉ တွင်မူ ဆရာ ဆရာမ ၈၀၀ အထိတိုးလာကြောင်း တရက်လျင် ၄၈၀၀ ကျပ်အစိုးရမှ ပေးကြောင်း သိရသည်။ ဒေသအသီးသီးမှ တိုင်းရင်းသားပြည်သူလူထုနှင့် ကျောင်းသားမိဘများ တွန်းအားပေးတောင်းဆိုမှုကြောင့် ယခုစာသင်နှစ်တွင် ကျောင်းချိန်အတွင်း တိုင်းရင်းသားဘာသာစာပေသင်ကြားခွင့်ရတော့မည်ဖြစ်ကြောင်း၊ တပတ်လျှင် ၂ ချိန်သင်ကြားခွင့်ရကြောင်း သိရသည်။