တာချီလိတ် လောင်းကစားဂိမ်းဆိုင် တဆိုင်အား ရဲများဝင်ရောက်ဖမ်းဆီး

0

သျှမ်းပြည် အရှေ့ပိုင်း တာချီလိတ်မြို့ ဝမ်ကောင်းရပ်ကွက်၊ ဘုရင့်နောင်စျေးအနီးရှိ လောင်းကစားဂိမ်းဆိုင် ကို တာချီလိတ် မြို့မ ရဲစခန်းက ဝင်ရောက် ဖမ်းဆီးကြောင်း သတင်းရရှိသည်။

Photo Credit to သတင်းတမန်- ဂိမ်းဆိုင်အားရဲများဝင်ရောက်ဖမ်းဆီးနေစဉ်

ဇွန်လ ၉ ရက် ည ၁၀ နာရီ ဝန်းကျင် တွင် အဆိုပါ ဂိမ်းဆိုင်ကို ရဲများ ဝင်ရောက်ဖမ်းဆီးခဲ့ရာ ငါးမန်းဂိမ်းခုံ ၆ ခုံနှင့် အတူ ဂိတ်ဆိုင် အတွင်းမှ အကြွေစေ့ ထိုင်းဘတ်ငွေ ၄ သောင်းကျော် တို့ကို ပါ သိမ်းဆည်းရမိကြောင်း၊ ထို့ပြင် ထိုဂိမ်းဆိုင်တွင် အမျိုးသား ၃ ဦး နှင့် အမျိုးသမီး ၁ ဦး ပါ ဖမ်းဆီးကြောင်း တာချီလိတ် မြို့မရဲစခန်း မှ တာဝန်ရှိသူ က ပြောသည်။

တရားမဝင် လောင်းကစား ပြုလုပ်သူ ၃ ဦး ဖြစ်သည့် အသက် ၃၂ နှစ် အရွယ် ရှင်းရှ၊ အသက် ၁၉ နှစ် အရွယ် ဘေဝင်းသိန်း၊ အသက် ၂၂ အရွယ် သူရအောင် နှင့် အသက် ၂၁ နှစ် အရွယ် သီရိဦး တို့အား တာချီလိတ်မြို့ မရဲစခန်းမှ (ပ) ၃၁၃ / ၂၀၁၉ လောင်းကစားဥပဒေ ပုဒ်မ ၁၆(က)/၁၇(က) ဖြင့် အမှုဖွင့် စစ်ဆေးနေကြောင်း သိရသည်။

တာချီလိတ်မြို့ နယ် အတွင်း ငါးမန်းဟုခေါ်ဆိုသည့် လောင်းကစား ဆိုင် များစွာ ရှိကြောင်း၊ ငါးမန်းဂိမ်းကြောင့် ဒေသခံ လူငယ်များ အကျင့်စာရိတ္တပျက်စီးကာ၊ လူမှုရေး၊ အိမ်ထောင်ရေး ကွဲသွားသူများလည်း ရှိနေသည်ဟု တာချီလိတ် မြို့ဒေသခံ စိုင်းလုံ က သျှမ်းသံတော်ဆင့် ကို ပြောသည်။

“ ဂိမ်းဆိုင်တွေ အားလုံး အရေးယူ ဖမ်းဆီးဖို့ ကျနော် ထောက်ခံတယ်။ နေရာတိုင်းဂိမ်းဆိုင် ရှိနေတယ်။ တဆိုင်လောက်ဖမ်းပြီး နောက် ငြိမ်သွားတာ။ ဖမ်းတဲ့အချိန် ခဏ ပိတ်ထားလိုက်တာတွေ ရှိတယ်။ ရဲတွေ သိပါတယ်။ ဘယ်နေရာမှာ ရှိတယ်ဆိုတာ” ဟု စိုင်းလုံ ကဆိုသည်။

တာချီလိတ်မြို့နယ် အတွင်း ဖွင့်လှစ်ထားသည့် လောင်းကစား ရုံ ကို အမြန်ဆုံး အရေးယူ ဖမ်းဆီးပေးရန် တိုက်တွန်ခြင်းဖြစ်ကြောင်း၊ ထို့ပြင် ဖမ်းဆီး ကာလ အတွင်း တချို့ လောင်းကစားရုံများ ပိတ်ထားနေသည်ကိုလည်း ဝင်ရောက် ဖမ်းဆီးစေလိုသည် ဟု စိုင်းလုံ က ဆိုသည်။

မြန်မာနိုင်ငံသားများ မည်သည့် ကာစီနို(လောင်းကစားရုံ) ကို ဝင်ရောက် ကစားခြင်း မပြုလုပ်ရ ဟု မေ ရ ရက် စွဲ ဖြင့် နိုင်ငံတော် သမ္မတ ဦးဝင်းမြင့် က လောင်းကစားဥပဒေ သစ် ကို လက်မှတ်ရေးထိုး လိုက်သည်။

လောင်းကစား ဥပဒေ သစ်တွင် ပြည်ထောင်စု အစိုးရ အဖွဲ့ ၏ ခွင့်ပြုချက်ဖြင့် သတ်မှတ်ချက် များနှင့် အညီ မှတ်ပုံတင် ပြီး နိုင်ငံခြားသား များသာ သီးသန့် လောင်းကစား ခွင့်ပြုသည် ဟု ရေးသားထားသည်။

မြန်မာနိုင်ငံသား အနေဖြင့် မည်သည့် လောင်းကစားရုံ အတွင်း ဝင်ရောက် လောင်းကစားခြင်း မပြုရ တွေ့ရှိပါ အရေးယူ ဆောင်ရွက်သွားမည်၊ လောင်းကစားပြုလုပ်နေသည် ကို သတင်းပေးသူက ၁၀ ရာခိုင်နှုန်း နှင့် ဖမ်းဆီးရာတွင် ပါဝင်သူကို ၂၀ ရာခိုင်နှုန်း ဆုငွေချီးမြှင့် မည် ဟုလည်း ဥပဒေ သစ်တွင် ထည့်သွင်းရေးသားထားသည်။

ဢုပ်ႇဢူဝ်း ၽူႈတွႆႇႁွၵ်ႈ

SHARE