သျှမ်းပြည်မြောက်ပိုင်း သန္နီမြို့နယ်အတွင်း ဖြစ်ပွါးခဲ့သောတိုက်ပွဲကြောင့် စစ်ဘေးရှောင် မြောင်ဇီးတိုင်းရင်းသား ၁၀၀ ကျော်မှာ နေရပ်မပြန်နိုင်သေးဘဲ အစားအသောက်များလိုအပ်နေကြောင်း သိရသည်။

ဖေဖော်ဝါရီလ ၁၄ နှင့် ၁၅ ရက်နေ့က ဖြစ်ပွါးသောတိုက်ပွဲများကြောင့် သန္နီမြို့သို့ရောက်ရှိလာသော ၀မ့်မွမ်းရွာမှ မြောင်ဇီးတိုင်းရင်းသားလူမျိုး အိမ်ခြေ ၄၃ အိမ် လူဦးရေ ၁၄၀ ကျော်မှာ လက်ရှိတွင် ဘုန်းကြီးကျောင်းဇရပ်တွင် တည်းခိုနေကြရပြီး အစားအသောက်များ အထူးလိုအပ်နေကြောင်းသိရသည်။

“တိုက်ပွဲကတော့ ဖေဖော်ဝါရီလ ၁၄ ရက်ကတည်းက ဖြစ်လိုက်ရပ်လိုက်နဲ့မို့ သူတို့မပြန်ရဲသေးတာပါ။ အစက သူတို့ နမ့်စလပ်ဆေးရုံမှာလာတည်းတယ်။ အိပ်ဖို့ စားဖို့က သိပ်အဆင်ပြေမှာမဟုတ်ဘူးဆိုပြီး ကျနော်က ဘုန်းကြီးကျောင်းမှာတည်းခိုနေနိုင်ဖို့ ဘုန်းဘုန်းကိုသွားတောင်းပေးပြီး သွားနေရာချပေးတယ်။မနေ့ကလည်း ကောင်းကော်အုပ်စုအုပ်ချုပ်ရေးမှူးကိုသွားဆွေးနွေးပြီးတော့ အဲ့မှာ ရွာသားတွေဆီကနေ ဆန်တွေအလှူခံတယ်။ဟင်းသီးဟင်းရွက်တွေအလှူခံတယ်။ ပြီးတော့ မနေ့က မြို့နယ်အုပ်ချုပ်ရေးမှူးကိုအကြောင်းကြားတော့ ကြက်ဥ တဖာလာလှူတယ်။ တခြားပြင်ပအဖွဲ့အစည်းတော့ မတွေ့မိသေးဘူး။ ခုလောလောဆယ် အစားအသောက် အဝတ်အထည်တွေလိုအပ်နေတယ်။ ” ဟု သန္နီမြို့နယ် သျှမ်းတိုင်းရင်းသားများဒီမိုကရေစီအဖွဲ့ချုပ် ပြည်နယ်လွှတ်တော်အမတ် စိုင်းစိန်လူက သျှမ်းသံတော်ဆင့်အားပြောပြသည်။

တိုက်ပွဲဖြစ်ပွားသော တပ်မှာ သိန္နီဘက်လာရောက်လှုပ်ရှားသော ခန္တီးဘက်မှ ခမရ ၃၉၁ မှ တပ်နှင့် မြောက်ပိုင်းမဟာမိတ်တပ်မတော်တို့ဖြစ်ကြောင်းသိရသည်။

“တပ်တွင်းပိုင်းသတင်းအရ ခန္တီးကလာတဲ့တပ်လို့ကြားတယ်။ မြောက်ပိုင်းမဟာမိတ်တပ်ဖွဲ့ရဲ့ တပ်သား ၂ ဦးကို အစိုးရတပ်ကဖမ်းထားတယ်လို့ကြားတယ်။ ဒါပေမယ့် ၀မ့်မွမ်းရွာမှာ သူတို့အခြေချစခန်းတွေမရှိဘူး။စစ်ကြောင်းတွေဖြတ်သန်းသွားလာရင်း ရင်ဆိုင်တိုက်ပွဲဖြစ်တာဘဲဖြစ်တဲ့အတွက် တိုက်ပွဲကလည်း ရှည်ကြာမှာမဟုတ်ဘူးလို့တော့ခန့်မှန်းရပါတယ်။ သို့ပေမယ့် မြောက်ပိုင်းအဖွဲ့က တပ်သားတွေအဖမ်းခံထားရတဲ့အတွက် သူတို့ပြန်လာမှာကိုဘဲစိုးရိမ်ရတယ်။ ဒီအချိန်ကလည်း ရွာသားတွေ လယ်ယာသီးနှံတွေဆွတ်ပြီးချိန်၊ အသစ်ထပ်စိုက်ဖို့ လယ်ယာမြေရှင်းလင်းထွန်ယက်ချိန်ဖြစ်နေတယ်လေ”- ဟု စိုင်းစိန်လူကပြောသည်။

အဆိုပါဒေသတွင် သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော် SSPP က အထူးလှုပ်ရှားရာဒေသဟုဆိုသော်လည်း ယခုနောက်ပိုင်း မြောက်ပိုင်းမဟာမိတ်တပ်ဖွဲ့၊ အစိုးရတပ်မတော် တို့ပါ ၀င်ရောက်လှုပ်ရှားလာကြောင်းသိရသည်။

“နိုင်ငံရေး ပြသနာကိုနိုင်ငံရေးနည်းနဲ့ဖြေရှင်းဖို့ ဖြစ်တယ်။ စစ်ရေးနဲ့မဖြေရှင်းဖို့တိုက်တွန်းချင်တယ်။ ကျနော်တို့ပြည်သူတွေ စစ်ဒဏ်ခံစားနေရတာနှစ်ပေါင်း ရ၀ ကျော်ပြီလေ။ စစ်ရေးနဲ့ ဖြေရှင်းနေလို့ တိုင်းပြည်မှ မအေးချမ်းတာ။”- ဟု SNLD ပါတီအမတ် စိုင်းစိန်လူကပြောပါသည်။

တိုက်ပွဲဖြစ်ပွါးသော ၀မ့်မွမ်းရွာသည် သိန္နီနှင့်ကွတ်ခိုင်ကြား ကားလမ်းမကြီးမြောက်ဘက်ခြမ်းရှိ ကောင်းကော်အုပ်စု၏အတွင်းပိုင်း ၄ မိုင်ခန့်အကွာတွင်တည်ရှိပါသည်။ ကောင်းကော်အုပ်စုမှာ သိန္နီမြို့အရှေ့မြောက်အရပ် ၁၇ မိုင်ခန့်အကွာတွင်တည်ရှိပါသည်။

Photo by Sai Sein Lu