ငြိမ်းချမ်းရေး လုပ်ငန်းစဉ် ဦးဆောင် ကော်မတီ PPST ကိစ္စ လက်နက်ကိုင် ၁၀ဖွဲ့ ကိုယ်စားလှယ် တွေ့ဆုံဆွေးနွေးမည်

0

တိုင်းရင်းသား လက်နက်ကိုင် အဖွဲ့ ၏ ငြိမ်းချမ်းရေး လုပ်ငန်းစဉ် ဦးဆောင် ကော်မတီ  PPST  ကိစ္စ ဖျက်သိမ်းရေး (သို့မဟုတ်) ဆက်လက်တည်ရှိရေးနှင့်ပတ်သတ်ပြီး ဇွန်လအတွင်း တိုင်းရင်းသားလက်နက်ကိုင် ၁၀ ဖွဲ့ ကိုယ်စားလှယ်များ ချင်းမိုင်တွင်တွေ့ဆုံ ဆွေးနွေးသွားမည် ဟု သတင်းရရှိသည်။

Photo by NCA-S EAO – မေလ ၁၄ ရက်မှ ၁၈ ရက်အထိကျင်းပသော ၄ ကြိမ်မြောက် NCA-S EAO ထိပ်သီးအစည်းအဝေး

တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူ စာချုပ်  NCA  လက်မှတ်ရေးထိုးထားသည့် တိုင်းရင်းသား လက်နက်ကိုင် အဖွဲ့ ၁၀ ဖွဲ့ မှကိုယ်စားလှယ်များသည် ဇွန်လ ၅ ရက်မှ ၁၀ ရက်ထိ ချင်းမိုင်မြို့တွင်တွေ့ဆုံမည် ဟု သိရသည်။

အဆိုပါတွေ့ဆုံမှု တွင် အဓိက အချက် ၃ ချက်ဖြစ်သည့် NCA နှင့် အဓိပ္ပာယ်ဖွင့်ဆိုချက်၊ အမျိုးသားပြန်လည်သင့်မြတ်ရေး  NRPC  နှင့် တွေ့ဆုံ ဆွေးနွေး ရေး ကိစ္စ နှင့် တိုင်းရင်းသား လက်နက်ကိုင် အဖွဲ့၏ ငြိမ်းချမ်းရေး လုပ်ငန်းစဉ် ဦးဆောင် ကော်မတီ  PPST  ကိစ္စ တို့ ဆွေးနွေးသွားမည် ဟု သျှမ်းပြည် ပြန်လည်ထူထောင်ရေးကောင်စီ  RCSS  ၏ အကြံပေးပုဂ္ဂိုလ် ဦးခွန်စိုင်း က သျှမ်းသံတော်ဆင့်သို့ ပြောသည်။

“ NCA လက်မှတ်ထိုးထားတဲ့ တိုင်းရင်းသား လက်နက်ကိုင် ၁၀ ဖွဲ့ ရဲ့ အလုပ်အမှုဆောင် အဖွဲ့တွေ တွေ့ကြမယ်။ တဖွဲ့ကို ကိုယ်စားလှယ်တယောက်စီ တက်ကြမယ်။” ဟု ဦးခွန်စိုင်းက ပြောသည်။

အဆိုပါ တွေ့ဆုံဆွေးနွေးမှုတွင် တိုင်းရင်းသား လက်နက်ကိုင် အဖွဲ့၏ ငြိမ်းချမ်းရေး လုပ်ငန်းစဉ် ဦးဆောင် ကော်မတီ (PPST) ကို ဖျက်သိမ်းပြီး ငြိမ်းချမ်းရေး လုပ်ငန်းစဉ် ညှိနှိုင်းတိုင်ပင် ခြင်း အစည်းအဝေး   PPCM  အဖြစ် ပြောင်းလဲမလားဆိုတာကို ဆွေးနွေးမည် ဟု ဦးခွန်စိုင်းက ပြောသည်။

မေ ၁၄ ရက်နေ့ မှ ၁၈ ရက်နေ့ ကလည်း ချင်းမိုင်မြို့ ၌ NCA လက်မှတ်ထိုးထားသည့် တိုင်းရင်းသား လက်နက်ကိုင် အဖွဲ့များ၏ ၄ ကြိမ်မြောက် ထိပ်သီး ခေါင်းဆောင်များ ညီလာခံ ကျင်းပရာ ကရင်အမျိုးသား အစည်းအရုံး KNU က PPST မှ နှုတ်ထွက်စာတင်ခဲ့ကြောင်း သတင်းရရှိခဲ့သည်။

ထို့ကြောင့် ယခု NCA ကိုယ်စားလှယ်များ တွေ့ဆုံဆွေးနွေးမှုတွင် “ PPST ကို ဖျက်သိမ်းပြီး PPCM ကို လုပ်မလားဆိုတာလည်းဆွေးနွေးမယ်” ဟု ဦးခွန်စိုင်း က ဆိုသည်။

မေလ အတွင်း ကျင်းပသည့် တိုင်းရင်းသားလက်နက်ကိုင် အဖွဲ့များ၏ ၄ ကြိမ်မြောက် ထိပ်သီးခေါင်းဆောင်များ ညီလာခံတွင် ငြိမ်းချမ်းရေး လုပ်ငန်းစဉ်တွင် ကြုံတွေ့ နေရသည့် တစ်ဆို့ မှု အဖြေနှင့် ဖက်ဒရယ်မူကို အခြေခံအရ ယူနိုင်ရေး အတွက် ဘုံသဘောတူညီမှု ရခဲ့ကြောင်းသိရသည်။

သို့သော် ၅ ရက်သာ ကျင်းပသည့် အစည်းအဝေး အခင်းအကျင်းတွင် PPST ဆက်လက်တည်ရှိခြင်း၊ ဖျက်သိမ်းခြင်းကို ဆက်လက်ဆွေးနွေးနေသည့် အနေအထားရှိသဖြင့် တိုင်းရင်းသား လက်နက်ကိုင် အဖွဲ့များ၏ ၄ ကြိမ်မြောက် ထိပ်သီးခေါင်းဆောင်များညီလာခံ ဒုတိယ ပိုင်းကို ၂ လ အတွင်း ကျင်းပနိုင်ရန် ကြိုးစားသွားမည်ဟုလည်းဆိုပါသည်။

ဢုပ်ႇဢူဝ်း ၽူႈတွႆႇႁွၵ်ႈ

SHARE