Thursday, December 1, 2022

ကျိုင်းတုံ ရဲစခန်းမှ ပျောက်ဆုံးနေသည့် အိုက်စ် မူးယစ်ဆေးဝါးအမှု နှင့် ဆက်စပ်သည့် ရဲတပ်ကြပ်ကြီး မြင့်နိုင်ကို ရဟန်းဝတ်ဖြင့် ဖမ်းဆီးရမိ

Must read

သျှမ်းပြည် အရှေ့ပိုင်း ကျိုင်းတုံမြို့မ ရဲစခန်းတွင် ထိန်းသိမ်းထားသည့် အဖြူရောင် ပုံဆောင်ခဲ အိုက်စ် တကီလို ဂရမ်ရှိ အထုပ်ပေါင်း ၆၄ ထုပ် ပျောက်ဆုံးမှု နှင့် ဆက်စပ်သည့် ရဲတပ်ကြပ်ကြီး မြင့်နိုင် ကို ဇွန် ၂ရက် တွင် ရဟန်းဝတ်ဖြင့် ဖမ်းဆီး ရခဲ့ကြောင်း သတင်းရရှိသည်။

Photo Credit to Kambawza Tai News – သက်ဆိုင်ရာများဖမ်းဆီးရမိသော ရဲတပ်ကြပ်ကြီးမြင့်နိုင်

ရဲတပ်ကြပ်ကြီးမြင့်နိုင် သည် ကျိုင်းတုံမြို့မ ရဲစခန်းတွင် သက်သေခံ အဖြစ် ထိန်းသိမ်း ထားသည့် အိုက်စ် မူးယစ်ဆေးဝါး ထားရှိသည့် စတိုခန်း သော့ကိုင်သူဖြစ်သဖြင့် အဓိက သံသယ ရှိသူ ဖြစ်ကြောင်း ကျိုင်းတုံ ခရိုင် ရဲတပ်ဖွဲ့ ပြောသည်။

ထွက်ပြေးတိမ်းရှောင်နေသည့် ရဲတပ်ကြပ်ကြီး မြင့်နိုင်ကို သျှမ်းပြည် တောင်ပိုင်း ပင်လောင်းမြို့နယ် ဘန်ပြင်ကျေးရွာ အုပ်စု နောင်လင်းရွာ ဘုန်းကြီးကျောင်းတွင် သင်္ကန်းဝတ်ဖြင့် ဇွန် ၂ရက်တွင် ဖမ်းဆီးရပြီး ယမန်နေ့ ဇွန် ၃ရက်တွင် မြန်မာ့လေကြောင်းလိုင်းဖြင့် ကျိုင်းတုံသို့ ဖမ်းဆီးခေါ်ဆောင်ခဲ့ကြောင်း ကျိုင်းတုံ ခရိုင် ရဲတပ်ဖွဲ့မှူး ဒုရဲမှူးကြီး မြင့်ဆွေ က သျှမ်းသံတော်ဆင့်သို့ ပြောသည်။

“ မနေ့က နေ့လည်ပိုင်းမှ ကျိုင်းတုံကို ရောက်တယ်။ လက်ရှိမှာတော့ ကျနော်တို့ ကျိုင်းတုံရဲစခန်းမှာ ထားထားပါတယ်။ စစ်ဆေးနေဆဲပါ” ဟု ဒုရဲမှူးကြီး မြင့်ဆွေ က ဆိုသည်။

ကျိုင်းတုံခရိုင် အတွင်းရှိ ရဲစခန်းများမှ ဖမ်းဆီးရမိခဲ့ပြီး ၊သက်ဆိုင်ရာ တရားရုံးများက အမှု ပြီးပြတ်ကာ သက်သေခံ ပစ္စည်းအဖြစ် ကျိုင်းတုံမြို့မရဲစခန်း၊ စတိုခန်းအတွင်း ထိန်းသိမ်းထားသည့် အဖြူရောင် ပုံဆောင်ခဲ အိုက်စ် ၁၀၃ ထုပ်အနက် ၆၄ ထုပ်ပါသော စက္ကူပုံးများသည် ရဲလုပ်ထုံး လုပ်နည်းနှင့် အညီ ပြုလုပ်ထားသော အမှတ်အသား မူလ ပုံစံများ ပျက်ယွင်းနေသည်ကို တွေ့ရှိရသည်။

ထိုတွေ့ရှိမှုကို စစ်ဆေးရာ ကျောက်ချဉ်ဖြင့် အစားထိုး လဲလှယ်ထားသည်ကို သိရှိရ သဖြင့် ရဲတပ်ကြပ်ကြီး မြင့်နိုင် အပါအဝင် တာဝန်ရှိသူ အဆင့်ဆင့်အား မြန်မာနိုင်ငံရဲတပ်ဖွဲ့မှ စစ်ဆေးမှုများ ပြုလုပ်နေခြင်း ဖြစ်ကြောင်း သိရသည်။

ထိုနောက် သံသယရှိသူ ရဲတပ်ကြပ်ကြီး မြင့်နိုင်သည် မေ ၁၅ ရက်နေ့တွင် ခွင့်မဲ့ပျက်ကွက်ဖြင့် ထွက်ပြေး တိမ်းရှောင်ခဲ့သည်ဟု ဆိုပါသည်။

ထို့အပြင် ယင်းအမှုတွဲတွင် ပါဝင်သူ ရဲတပ်သား ဝေဖြိုး ကိုလည်း ပဲခူးမြို့တွင် ဖမ်းဆီးရမိခဲ့ပြီး ကျိုင်းတုံမြို့မ ရဲစခန်းသို့ လွှဲပြောင်းထားကြောင်း သိရသည်။

ရဲတပ်ကြပ်ကြီး မြင့်နိုင် နှင့် ဆက်စပ် သင်္ကာမကင်းသူဖြစ်သည့် ရဲတပ်သား ဝေဖြိုးကို မူးယစ်ဆေးဝါးနှင့် စိတ်ကို ပြောင်းလဲစေတတ်သော ပုဒ်မ ၁၈(ဃ)/၂၂(ဃ)ဖြင့် အမှုဖွင့်ထားပြီး၊ စစ်ဆေးမှု ပြုလုပ်နေကြောင်း ကျိုင်းတုံခရိုင် ရဲတပ်ဖွဲပ မှ သိရသည်။

အိုက်စ် မူးယစ်ဆေးဝါး တကီလိုသည် ကာလ ဒေသ ပေါက်စျေးအရ ကျပ်သိန်း ၂၀၀ ဝန်းကျင် ရှိကြောင်း ၊ လက်ရှိပျောက်ဆုံးသွားသော အိုက်စ်ပုံဆောင်ခဲ မူးယစ်ဆေးဝါးများ၏ စုစုပေါင်းတန်ဖိုး ကျပ်သိန်းပေါင်း တစ်သောင်းခန့်ရှိကြောင်း သိရသည်။
.

Leave a Comments

- Advertisement -spot_img

Latest article