သျှမ်းပြည် အရှေ့ပိုင်း တာချီလိတ်မြို့ ဝမ်ကောင်းရပ်ကွက် တွင် ကုန်စုံဆိုင် မီးလောင်မှု ဖြစ်ပွားကာ ဆိုင်ဝန်ထမ်း အမျိုးသမီး သေဆုံးကြောင်း သတင်းရရှိသည်။
မေလ ၃၀ ရက်ည ရ နာရီက တာချီလိတ်မြို့ ဝမ်ကောင်းရပ်ကွက် ကချင်ရွာ၊ ရတနာလမ်းပေါ်ရှိ ကုန်စုံဆိုင် တဆိုင်တွင် ဆိုင်ဝန်ထမ်း တဦး က ရေသန့်ဗူးထဲ ဓါတ်ဆီထည့်ရာမှ မီးစတင်လောင်ကျွမ်းခဲ့သည်။
မီးလောင်ကျွမ်းနေစဉ် ပျောက်ဆုံးနေသည့် ဆိုင်ဝန်ထမ်း အမျိုးသမီး မစုမွန်ဦး (အသက် ၁၆ နှစ်)အား မေလ ၃၁ ရက်နေ့မနက်ပိုင်းက ကုန်စုံဆိုင်၏ ဒုတိယထပ်အခန်းတွင် မီးလောင်ကျွမ်းပြီး သေဆုံးနေသည်ကိုရှာဖွေ တွေ့ရှိရကြောင်း၊ လက်ရှိတွင် တာချီလိတ်မြို့ ပြည်သူ့ဆေးရုံ သို့ ပို့ဆောင် ကာ စစ်ဆေးမှု ပြုလုပ်နေကြောင်း တာချီလိတ်မြို့ ဒေသခံ အမျိုးသား တဦး ပြောပြချက် အရ သိရသည်။
“ မနေ့က ည မီးလောင်တာ ည ရ နာရီ စလောင်တယ်။ ည ၉ နာရီလောက်မှ မီးငြိမ်းသွားတယ်။ ကုန်စုံဆိုင်ဆိုတော့ တော်တော်ပါသွားတယ်။ မီးလောင်ထဲ ပါသွားတဲ့အမျိုးသမီးကို မနေ့ကတောင် ပျောက်လို့လိုက်ရှာကြသေးတယ်။ မီးလောင်ထဲမှာ ရှိမယ်လို့မထင်မိဘူး” ဟု မီးလောင်မှုကို မြင်တွေ့ရသည့် တာချီလိတ်ဒေသခံ တဦး က ဆိုသည်။
ပလပ်စတစ်ဓာတ်ဆီပုံး အတွင်းမှ ဆီများအား ဗူးအတွင်း သို့ ပေါ့ဆစွာ လှဲလည်ထည့်သဖြင့် မီးစတင်လောင်ကျွမ်းပြီး၊ လူတဦး သေဆုံးမှု ဖြစ်ခဲ့သဖြင့် သက်ဆိုင်သူ ဒေါ်အေးအေးသင်း အသက် ၄၀ နှစ် အား တာချီလိတ် ရဲစခန်းမှ အမှုဖွင့်အရေးယူထားကြောင်း သိရသည်။