သျှမ်းပြည်မြောက်ပိုင်း လားရှိုးမြို့နယ်အတွင်း တပ်မတော်ထောက်ခံပွဲ၊ ဖွဲ့စည်းပုံအခြေခံဥပဒေ မပြင်ဆင်ရေးထောက်ခံပွဲနှင့် ဥပဒေပုဒ်မ ၂၆၁ အား ပြင်ဆင်ပေးရန် ဆန္ဒထုတ်ဖော်ပွဲတရပ်ကျင်းပရာတွင် ပါ၀င်သည့် ဒေသခံများမှာ စည်းရုံးခြင်းခံရပြီးရောက်လာခြင်းဖြစ်ကြောင်းသိရသည်။

မေလ ၁၉ ရက်နေ့မနက်ပိုင်းက လားရှိုးမြို့နယ် မြို့လယ်ခန်းမ မှ ရပ်ကွက် ၁၂ ရှိ ဘောလုံးကွင်းအထိ လူအင်အား ၅၀၀၀ ခန့်က လမ်းလျှောက်ဆန္ဒထုတ်ဖော်ခဲ့ကြရာတွင် လားရှိုးမြို့တွင်းနှင့် မြို့နယ်အတွင်းရှိ ဒေသခံလူထုများဖြစ်ကြောင်း၊ တချို့မှာ နေအိမ်အထိ လာရောက်စည်းရုံးခြင်းခံရပြီး တချို့မှာလည်း ရွာသူကြီးအမိန့်ဖြင့်ရောက်လာခဲ့ခြင်းဖြစ်ကြောင်း လားရှိုးမြို့တွင်း လူမှုရေးအသင်းတွင်လှုပ်ရှားနေသူတဦးကသျှမ်းသံတော်ဆင့်အားပြောသည်။

“ပြောမယ်ဆိုရင် ရွာသားတွေက လားရှိုးကို ဘာသွားလုပ်မလဲဆိုတာ ဘာမှမသိရဘူးဗျ။ လားရှိုးမြို့သွားဖို့ လို့ဘဲ ပြောကြတာ။ စည်းရုံးတာကလည်း သျှမ်းလူမျိုးဘဲ။ ကျနော်တို့အသိမြန်လို့ပေါ့ဗျ။ ဖုန်းဆက်အကြောင်း ကြား တယ်။ သိန္နီ၊ ကွတ်ခိုင်၊ သီပေါ၊ ကျောက်မဲ၊ မိုင်းရယ် တန့်ယန်း၊နောင်ချို၊ နမ္မတူ မြို့တွေက ဒေသခံလူထုတွေပေါ့။ ခင်ဗျားတို့လာရင် အိုးစည်ဗုံမောင်းတွေမပါခဲ့နဲ့ ။ သျှမ်းပြည်အလံတွေ မလွှင့်နဲ့။ တွေ့တာနဲ့ ဆွဲချမှာလို့ ။ အိုးစည်တီးရမယ့်နေရာမဟုတ်ဘူး။ အလံလွှင့်ရမယ့်နေရာမဟုတ်ဘူး လို့ ဖုန်းဆက်တာ။ ဒါမယ့်ဆန္ဒပြပွဲမှာ အောက်ပြည်အောက်ရွာကလာတဲ့ ဗမာလူမျိုးတွေများတယ်။ သျှမ်းပြည်မြောက်ပိုင်းကိုလာပြီး ၀မ်းရေးအတွက်ပိုက်ဆံရှာနေသူတွေပေါ့။ “– ဟုသျှမ်းသံတော်ဆင့်အားပြောသည်။

လမ်းလျှောက်ဆန္ဒထုတ်ဖော်ပွဲလာသူများသည် တဦးလျှင်ငွေကျပ် ၅၀၀၀ စီရရှိကြပြီး ထမင်းတနပ်လည်းကျွေးကြောင်း လမ်းလျှောက်ဆန္ဒပြရာတွင်ပါ၀င်သည့်အမျိုးသမီးတဦးကပြောသည်။

ပြီးခဲ့သည့် မေလ ၁၅ ရက်ကလည်း အမျိုးသားလုံခြုံရေးကွန်ရက် ဗဟိုမှဦးဆောင်သည့်လူထုအင်အား ၂၀၀ ခန့်သည် ၂၀၀၈ ဖွဲ့စည်းပုံ အခြေခံဥပဒေကို ကာကွယ်စောင့်ရှောက်နေသာ တပ်မတော် ထောက်ခံပွဲ နှင့် ပုဒ်မ (၂၆၁ ) ကိုဥပဒေနှင့် အညီပြင်ဆင်ပေးရေး အတွက် စီတန်းလှည့်လည်ဆန္ဒထုတ်ဖော်ခဲ့ကြသည်။

တောင်ကြီးမြို့တွင်ပြုလုပ်သော အဆိုပါထောက်ခံပွဲသို့လည်း ရွာလူကြီးစေခိုင်းသဖြင့် လာရကြောင်း လမ်းလျှောက်ဆန္ဒထုတ်ဖော်သူများပြောသည်ဟု ကမ္ဘောဇတိုင်းမ် သတင်းတွင်လည်းဖော်ပြထားသည်။

ဖွဲ့စည်းပုံဥပဒေ ပုဒ်မ ၂၆၁ သည် ပြည်နယ်နှင့်တိုင်းဝန်ကြီးချုပ်များအား သမ္မတမှတိုက်ရိုက် ခန့်အပ်ခွင့် မရှိပဲ ၊ သက်ဆိုင်ရာပြည်နယ်နှင့် တိုင်း လွှတ်တော်မှ ခန့်အပ် ပိုင်ခွင့်ရှိသည်ဟု ဖော်ပြထားသည်။