ပြည်ပရောက် မြန်မာရွှေ့ပြောင်း အလုပ်သမားများ ကြုံတွေရသည့် အခက်အခဲကို ကူညီနိုင်ရန် အတွက် ရွှေ့ပြောင်းအလုပ်သမား အရင်းအမြစ် စင်တာ (Migrant Worker Resource Centre ) ရုံးကို မြန်မာ ထိုင်းနယ်စပ် တာချီလိတ်တွင် ဖွင့်လှစ်လိုက်သည်။
အဆိုပါ ရုံးခန်းကို တာချီလိတ်မြို့ ဆေခမ်းရပ်ကွက်တွင် အပြည်ပြည်ဆိုင်ရာ အလုပ်သမား ရေးရာ အဖွဲ့( ILO)၏ အထောက်အပံ့ဖြင့် အလုပ်သမား ညွှန်ကြားရေးမှူး ဦးစီးဌာန နှင့် မောက်ကွမ် (ချယ်ရီပန်း) ဒေသဖွံ့ဖြိုးတိုးတက်ရေး အဖွဲ့ တို့ ပူးပေါင်း ပြီး ဖွင့်လှစ်ထားခြင်းဖြစ်သည်။
“ နယ်စပ်ဆိုတော့ တခြားနိုင်ငံကို တရားဝင် သွားတာလည်း ရှိသလို တရားမဝင် ခိုးသွားတာလဲ ရှိကြတယ်။ဒါကြောင့် ရွှေ့ပြောင်း အလုပ်သမားတွေ ပြည်ပ မသွားခင် ဘာတွေ လုပ်သင့်လဲ။ ပြည်ပ ရောက် လို့ ပြသနာဖြစ်ရင် ဘယ်လို ချိတ်ဆက်သင့်လည်း ဆိုတာ ကျမတို့ ရုံးမှာ လာပြီး အကူအညီတောင်းလို့ရပါတယ်” ဟု မောက်ကွမ် ဒေသဖွံ့ဖြိုးရေး အဖွဲ့ မှ နန်းဝိုးဖတ် က ပြောသည်။
နယ်စပ်ဒေသတွင် နေထိုင်သည့် တိုင်းရင်းသားအများစုသည် မြန်မာ စကား၊ မြန်မာစာကို ကျွမ်းကျင်မှုမရှိသည့်အပြင် ပညာရေးတွင်လည်း အားနည်းနေကြသဖြင့် အစိုးရ ရုံးဝင်ထွက်သွားလာရန် အခက်အခဲဖြစ်ကြကြောင်း၊ ထို့ပြင် ပြည်ပ သို့ မသွားရောက်ခင် မည်သည့် စာရွက်စာတမ်းများ နိုင်ငံကူးလက်မှတ်များ မည်သို့ပြင်ဆင်ထားသင်ကြောင်း နှင့် ပြည်ပတွင် အခက်အခဲကြံုလာပါက MRC ရုံးကို ချိတ်ဆက်ကာ အကူအညီ တောင်းစေချင်ကြောင်းလည်း နန်းဝိုးဖတ် ကပြောသည်။
နိုင်ငံခြားရောက် ရွှေ့ပြောင်းအလုပ်သမားများအနေဖြင့် အခက်အခဲ ဒုက္ခများရောက်ပါက MRC ကို အကြောင်းကြားနိုင်ကြောင်း၊ MRC အနေဖြင့် နိုင်ငံခြားရှိ သံရုံးများဖြင့်ပူးပေါင်းကာ အလုပ်သမားရေးရာ ပြသနာများကို ပူးပေါင်းဖြေရှင်းသွားမည် ဟု သိရသည်။
ရွှေ့ပြောင်းအလုပ်သမားများအနေဖြင့် ခေါင်းပုံဖြတ် မခံရရေး၊ လစာ ပုံမှန် အချိန်မှန် ရရှိရေး၊ လူကုန်ကူးခြင်းမခံရအောင် လည်း ကူညီပေးသွားမည်ဖြစ်ပြီး၊ နိုင်ငံခြားတွင် သက်တမ်းလွန်နေထိုင်ခြင်းကြောင့် ဖမ်းခံရပါက လည်း MRC ကို လာရောက် တိုင်တည်ပါက သံရုံးနှင့် ပူးပေါင်းကာ လွှတ်မြောက်အောင် ဆောင်ရွက်ပေးမည် ဟုလည်း သိရသည်။
“ ထိုင်းကို အလုပ်သွားလုပ်ရင် ဘယ်လောက်ကြာလုပ်မလဲ။ နောက် ဘာသွားလုပ်မလဲ။ ပြန်လာရင် ထိုင်းကနေ ပညာရအောင် ယူလာပြီး ကိုယ့်ဒေသမှာ ပြန်လုပ်စားနိုင်ဖို့ လိုအပ်ပါတယ်။ အခုက ဘယ်တော့ ပြန်လာမလဲ ဆိုတာမသိကြဘူး။ လုပ်တော့လုပ်နေကြတယ်” ဟု နန်းဝိုးဖက် က ပြောသည်။
ထို့အပြင် ရွှေ့ပြောင်းအလုပ်သမား အရင်းအမြစ် စင်တာ ( MRC) ရုံးကို သျှမ်းပြည် မြောက်ပိုင်းလားရှိုး နှင့် မူဆယ် မြို့တွင် ဆက်လက် ဖွင့်ရန် လည်း ဆောင်ရွက်နေကြောင်း သိရသည်။
Leave a Comments