သျှမ်းတော်လှန်ရေးနေ့ ၆၁ နှစ်မြောက်အခမ်းအနားအား သျှမ်းလက်နက်ကိုင်တပ်ဖွဲ့များက ၄င်းတို့၏ဌာနချုပ်များတွင်ကျင်းပခဲ့ကြောင်းသိရသည်။
မေလ ၂၁ ရက် ၂၀၁၉ သျှမ်းတော်လှန်ရေးနေ့ ၆၁ နှစ်ပြည့်အခမ်းအနားအား သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော် ဌာနချုပ်လွယ်တိုင်းလျန်းတွင်လည်းကောင်း၊ လွယ်ကော်ဝမ်းတပ်စခန်းတွင်လည်းကောင်း၊ သျှမ်းပြည်တိုးတက်ရေးပါတီ သျှမ်းပြည်တပ်မတော် ဌာနချုပ် ၀မ့်ဟိုင်းတွင်လည်းကောင်းအသီးသီး ကျင်းပခဲ့ကြောင်းသိရသည်။
“ဌာနချုပ်အသီးသီးတွေမှာ ကျင်းပကြပါတယ်။ ရည်ရွယ်ချက်ကတော့ ကျနော်တို့ အမျိုးသားရေးအတွက် တော်လှန်ရေးကာလတလျှောက် အသက်သွေးချွေး ပေးလှူခဲ့ရတဲ့ အာဇာနည်ပုဂ္ဂိုလ်တွေကို လေးစားတယ် ဂုဏ်ယူတယ် အောင့်မေ့သတိရတယ်။ ဒါကြောင့်နှစ်တိုင်းမပြတ် အခမ်းအနားကျင်းပလာရတာဖြစ်တယ်။ နောက်တချက်က ကျနော်တို့ ရသင့်ရထိုက်တဲ့ ရပိုင်ခွင့်တွေကို ရယူဖို့အတွက်ဖြစ်သလို တဖက်ကလည်း ပင်လုံစိတ်ဓါတ် ပင်လုံကတိကဝတ် ပင်လုံ စာချုပ်စသည်တို့ကိုလည်း အကောင်အထည်ဖော်ဆောင်ရွက်သွားဖို့ ဖြစ်တယ်။ နောက်တချက် မျိုးဆက်သစ်လူငယ်တွေကို အမျိုးသားရေးစိတ်ဓါတ်နိုးကြားစေဖို့နဲ့ ကိုယ်ကျိုးစွန့်အနစ်နာခံခဲ့တဲ့ အာဇာနည်များလမ်းအတိုင်း ဆက်လက်လျှောက်လမ်းဖို့အတွက် ရည်ရွယ်ပါတယ်။ ”- ဟု RCSS/SSA ၏ပြောခွင့်ရ လည်းဖြစ် အတွင်းရေးမှူး ၂ လည်းဖြစ်သော ဗိုလ်မှူးကြီးစိုင်းငင်းက သျှမ်းသံတော်ဆင့်အားပြောသည်။
ယခုနှစ် လွယ်တိုင်းလျန်းဌာနချုပ်တွင်ကျင်းပသော ၆၁ နှစ်မြောက် သျှမ်းတော်လှန်ရေးနေ့အခမ်းအနားတွင် စစ်ရေးပြအခမ်းအနားကျင်းပသော်လည်း လက်နက်မပါသည့် စစ်ရေးပြခြင်းမျိုးဖြစ်ကြောင်း ဗိုလ်မှူးကြီးစိုင်းငင်းက ပြောသည်။ ၄င်းမှာ ငြိမ်းချမ်းရေးလုပ်ငန်းစဉ်မှ စစ်မှန်သော ဖက်ဒရယ်ပြည်ထောင်စုတည်ဆောက်ရေးအတွက် ရည်ရွယ်ကြောင်း ဆိုပါသည်။
“ဒီကနေ့ စစ်ရေးလာပြတဲ့စစ်သည်တော်တွေက ၁၀၀၀ လောက်ရှိတယ်။ ဘာကြောင့်စစ်ရေးပြအခန်းအနားမှာ လက်နက်မပါရသလဲဆိုတာတော့ အကျိုးအကြောင်းရှိတယ်လေ။ အစိုးရတပ်မတော်က တဖက်သတ်အပစ်ရပ်ရေး ၆ လ ကြေငြာတယ်လေ ။ အဲဒီကာလဖြစ်နေတာကြောင့် သူတို့ရဲ့ အပစ်ရပ်ခြင်းကြေငြာချက်ကို ကြိုဆိုတဲ့အနေနဲ့ ကျနော်တို့ စစ်ရေးပြအခမ်းအနားမှာလည်း လက်နက်မပါရတာဖြစ်တယ်။ ငြိမ်းချမ် းရေးလုပ်ငန်းစဉ်ကနေ စစ်မှန်သော ဖက်ဒရယ်ပြည်ထောင်စုကိုတည်ဆောက်နိုင်အောင်ကြိုးစားချင်လို့ပါ။”- ဟု ဗိုလ်မှူးကြီးစိုင်းငင်း ကပြောသည်။
အခမ်းအနားတွင် ဒုဥက္ကဌ ၁ ဒု ဗိုလ်ချုပ်ကြီးစိုင်းရီ က အဖွင့်မိန့်ခွန်းပြောကြားခဲ့ပြီး ၊ စစ်ရေးပြအခမ်း အနားပြသခဲ့ကြောင်း ထိုနောက်ပိုင်း တော်လှန်ရေးကာလ ခန္ဓာကိုယ်အစိတ်အပိုင်းများပေးလှူခဲ့သော စစ်သည်တော်များအား ဆုတော်ငွေချီးမြှင့်ကြောင်း၊ တော်လှန်ရေးခရီးစဉ်အတွင်း အသက်ပေးလှူ ကျဆုံးသွားခဲ့သော် အာဇာနည်ရဲဘော်များအားရည်စူးကာ လွမ်းသူ့ပန်းခွေချ အလေးပြုကြကြောင်း သိရသည်။ ညနေပိုင်းတွင်မူ ညနေစာလက်ဆုံစားပွဲကျင်းပ ပေးမည်ဖြစ်ပြီး ခေတ်ပေါ်သံစုံတီးဝိုင်းဖြင့် တီးခတ်ဖျော်ဖြေကြကြောင်း သိရသည်။
Leave a Comments