(၆၄) နှစ်မြောက် သျှမ်းတော်လှန်ရေးနေ့ အခမ်းအနားကို သျှမ်းလက်နက်ကိုင်တပ်ဖွဲ့များ၏ ဌာနချုပ်အသီးသီး တွင် ကျင်းပပြုလုပ်သွားမည်ဖြစ်ကြောင်း စုံစမ်းသိရသည်။

လာမည့် မေ (၂၁) ရက်သည် သျှမ်းတော်လှန်ရေး (၆၄) နှစ်ပြည့်အခမ်းအနားအား သျှမ်းပြည်ပြန်လည် ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) ၏ ဌာနချုပ်ရှာရာ လွိုင်တိုင်းလျန်း၊ လွိုင်ကော်ဝမ်းတပ်စခန်းနှင့် သျှမ်းပြည်တိုးတက်ရေးပါတီ၊သျှမ်းပြည်တပ်မတော် (SSPP/SSA) ဌာနချုပ် ဝမ်ဟိုင်းတွင်ကျင်းပ သွားမည်ဖြစ်ကြောင်းသိရသည်။

“ဌာနချုပ်မှာတော့ လွမ်းသူ့ပန်းခွေတွေ ချမယ်။ ပြီးတော့ အမျိုးသားရေးအတွက် အသက်ပေးသွားတဲ့ သူရဲကောင်းတွေကို ရည်စူးပြီး အလှူလုပ်မယ်။ အမျှပေးဝေသွားဖို့ရှိတယ်။ ကိုဗစ်-၁၉ ကြောင့် ကြီးကြီးမားမား တော့ လုပ်ဖို့မရှိပါဘူး” ဟု RCSS/SSA ၏ ပြောရေးဆိုခွင့်ရှိသူ ဗိုလ်မှူးခမ်းစံ က သျှမ်းသံတော်ဆင့် ကိုပြောသည်။

ကိုဗစ်-၁၉ ကူးစက်ရောဂါကြောင့် သျှမ်းတော်လှန်ရေးနေ့ အခမ်းအနားကို သျှမ်းလက်နက်ကိုင် တပ် (၂) တပ်က ခမ်းနားစွာ ကျင်းပမည်မဟုတ်ကြောင်း သိရှိရသည်။

SSPP/SSA မှ တာဝန်ရှိသူ တစ်ဦးက “ဒီနှစ်လည်း ကျနော်တို့ ဌာနချုပ်မှာ နှစ်တိုင်းလိုပဲ ကျင်းပပြုလုပ်သွား ဖို့ရှိတယ်။ ဒီနှစ်က အခမ်းအနားအစီစဉ်ဘယ်လိုရှိလဲဆိုတာကိုတော့ မသိရသေးဘူး။ သက်ဆိုင်ရာ တာဝန်ရှိသူတွေ က ဆွေးနွေးနေကြတုန်းပဲ” ဟု သျှမ်းသံတော်ဆင့် ကိုပြောသည်။

၁၉၅၈ ခုနှစ် မေ (၂၁) ရက်တွင် မိုင်းတုံမြို့နယ် နမ့်ကျွတ်ချောင်းဘေး တောတွင်းတနေရာ၌ သျှမ်းလူငယ် (၃၁)ဦးသည် သျှမ်းပြည် လွတ်မြောက်ရေးအတွက် သွေးသစ္စာရေသောက်ခဲ့ပြီး လက်နက်ကိုင် တော်လှန်ရေး လုပ်ငန်းစတင်ခဲ့သည့်နေ့ကို သျှမ်းတော်လှန်ရေးနေ့အဖြစ် သတ်မှတ်ခဲ့ခြင်းဖြစ်သည်။