မေလ ၂၁ ရက်နေ့တွင်ကျရောက်သော နှစ် ၆၀ ပြည့် သျှမ်းတော်လှန်ရေးနေ့ အခမ်းအနားအား သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA ဌာနချုပ် ၀မ့်ဟိုင်းတွင်လည်းကောင်း သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော် RCSS/SSA ဌာနချုပ် လွယ်တိုင်းလျန်းတွင်လည်းကောင်း အသီးသီးကျင်းပခဲ့ရာ စည်ကားလျှက်ရှိကြောင်းသိရသည်။

SSPP/SSA ဌာနချုပ် ၀မ့်ဟိုင်းဌာနချုပ်တွင် သျှမ်းတော်လှန်ရေးနေ့အခမ်းအနားအား နောင်ငင်းခန်းမတွင်ကျင်းပရာ တပ်ဖွဲ့အတွင်းအကြီးအကဲများ၊ တပ်သားထုနှင့် ဒေသခံမိဘပြည်သူလူထု ရာနှင့်ချီတက်ရောက်ကြောင်းသိရသည်။

အခမ်းအနားအား နံနက် ၈ နာရီတွင်စတင်ပြီး အမျိုးသားရေးလုပ်ငန်းစဉ်တလျှောက်သေကြေကျဆုံးသွားသော တပ်သားထုနှင့်ပြည်သူလူထုအတွက် အလှူဒါနပြုကုသိုလ်ပေးဝေခဲ့ကြောင်း၊ နေ့လည်ပိုင်း ဆွမ်းကပ်အလှူပြုမှုလည်းရှိခဲ့ကြောင်း သိရသည်။

အခမ်းအနားတွင် တပ်ဖွဲ့အကြီးအကဲများဖြစ်ကြသော နာယကကြီး ဗိုလ်ချုပ်ကြီးဆေထင်၊ ဒုဥက္ကဌ ၁ ဒုတိယ ဗိုလ်ချုပ်ကြီး ခေးတိုင်း၊ အတွင်းရေးမှူးများ၊ စစ်ဦးစီးများနှင့် အကြီးအကဲများ၊ ကေဒါတပ်သားများနှင့်မိဘပြည်သူလူထု စုစုပေါင်း ၄၀၀ ခန့်တက်ရောက်ခဲ့သည်။

နာယကကြီးဗိုလ်ချုပ်ကြီးဆေထင်က မိန့်ခွန်းပြောကြားရာတွင်- ကနေ့ခေတ်လူငယ်ထုအနေဖြင့် သမိုင်းလေ့လာသင်ယူသင့်ကြောင်း၊သမိုင်းမလေ့လာပါက ဒုတိယအကြိမ်ရှုံးနိမ့်မည်ဖြစ်ကြောင်း၊ ဆုံးဖြတ်ချက်ချရာတွင် လျင်မြန်ဖြတ်လတ်တိကျပါးနပ်သောဆုံးဖြတ်ချက်ဖြစ်စေလိုကြောင်း၊ ယခင်ကမှားယွင်းခဲ့သည်များကိုသင်ခန်းစာရယူကာ တက်သစ်စ လူငယ်များဆုံးဖြတ်ချက်ချမှန်ကန်စေလိုကြောင်း ေပြာဆိုသွားခဲ့သည်။

ထို့အပြင် သျှမ်းတော်လှန်ရေးဖြစ်ပေါ်လာပုံသမိုင်း၊ စော်ဘွားများသမိုင်း၊ သွေးထိုးခံရမှုကြောင့်စော်ဘွားများစိတ်ဝမ်းကွဲရကြောင်း၊ တရုတ်ဖြူတပ်များအားနှိမ်နင်းရန်အကြောင်းပြချက်ဖြင့် မြန်မာ့တပ်မတော်မှ သျှမ်းပြည်တွင်းဝင်ရောက်နေရာယူလာသည်မှာယနေ့တိုင် တပ်ရုတ်ပြန်ခြင်းမရှိသေးကြောင်းအစရှိသည်တို့ကိုပါ ပြောဆိုသွားခဲ့သည်။

RCSS/SSA ဌာနချုပ် လွယ်တိုင်းလျန်းတွင် ကျင်းပသော နှစ် ၆၀ ပြည့် သျှမ်းတော်လှန်ရေးနေ့ အခမ်း အနားတွင်မူ ဗိုလ်ချုပ်ကြီးယွက်စစ်က – ကျဆုံးသွားသော ကေဒါ တပ်သားများအား လေးစားဂုဏ်ယူကြောင်း၊ လက်ရှိအမျိုးသားရေးတာဝန်ထမ်းဆောင်နေဆဲ ကေဒါတပ်သားများအား အားပေးဂုဏ်ပြုကြောင်း- ပြောဆိုသွားခဲ့သည်။

လွယ်တိုင်းလျန်းတွင်ကျင်းပသော သျှမ်းတော်လှန်ရေးနေ့တွင် ကေဒါတပ်သား၊ အရာရှိအရာခံများအပါအဝင်ဒေသခံလူထု စုစုပေါင်း ၅၀၀ ထပ်မနည်းတက်ရောက်ခဲ့ကြကြောင်းသိရသည်။

အခမ်းအနားတွင် ကျဆုံးလေပြီးသော ရဲဘော်များအတွက် လွမ်းသူ့ပန်းခွေများ ချခြင်း၊ ဆေခန်ဘွားဘုရင်ရုပ်ထုနှင့် တော်လှန်ရေးဖခင်ကြီးဟုခေါ်ဆိုထိုက်သူတဦးဖြစ်သော ဗိုလ်မိုးဟိန်းခေါ် စဝ်ကွဏ်းဇိန်း၏ ရုပ်ထုတို့တွင်လည်း ပန်းစည်း ပန်းခွေများချခြင်းပြုလုပ်ခဲ့ကြကြောင်သိရသည်။

၁၉၅၈ မှ ၂၀၁၈ အထိ နှစ်ပေါင်း ၆၀ တိုင်တိုင် သျှမ်းတော်လှန်ရေးမပြီးဆုံးနိုင်သေးသည်မှာ တိုင်းရင်းသားဒေသမများတွင် တရားမျှတမှုမရှိခြင်း ၊ လူအချင်းချင်း ဖိနှိပ်ခြင်းတို့ကြောင့် ဖြစ်ကြောင်း ပြောဆိုသည်။ ထို့အတွက် သျှမ်းတော်လှန်ရေးနေ့သည် အမျိုးသားရေးအတွက် အသက်စွန့်သွားသော မျိုးချစ်ပုဂ္ဂိုလ်များအား အောင့်မေ့သတိယခြင်းအထိမ်းအမှတ်အဖြစ်အလှူပြုကာ အမျှအတန်း ပေးဝေခဲ့ခြင်းဖြစ်ကြောင်း သိရပါသည်။

သျှမ်းလူငယ် ၃၁ ဦးသည် ၁၉၅၈ ခုနစ် မေလ ၂၁ ရက်နေ့က မိုင်းတုံမြို့နယ် နမ့်ကျွတ်ချောင်းဘေး တောတွင်းတနေရာတွင် သျှမ်းပြည် လွှတ်မြောက်ရေးအတွက် သွေးသစ္စာရေသောက်ခဲ့ပြီး လက်နက်ကိုင်တော်လှန်ရေးလုပ်ငန်းစတင်ခဲ့သည်ဖြစ်ရာ သျှမ်းတော်လှန်ရေးနေ့အဖြစ် သတ်မှတ်ခဲ့ခြင်းဖြစ်ပါသည်။