၇၁ နှစ်မြောက် သျှမ်းပြည်အမျိုးသားနေ့အခမ်းအနားကို သျှမ်းပြည်တွင်း အနယ်နယ်အရပ်ရပ်အပြင် RCSS/SSA ဌာနချုပ်လွယ်တိုင်းလျန်းတွင်လည်း အကြီးအကျယ်ပြုလုပ်ရာ NCA အပစ်ရပ်လက်မှတ်ရေးထိုး၊ မရေးထိုးရသေးသည့် တိုင်းရင်းသားကိုယ်စားလှယ်များ တက်ရောက်ကြောင်းသိရသည်။

၂၀၁၈ ဖေဖော်ဝါရီလ ရ ရက်က RCSS/SSA ဌာနချုပ် လွယ်တိုင်းလျန်း တွင်ကျင်းပသော သျှမ်းပြည်အမျိုးသားနေ့အခမ်းအနားသို့ မြောက်ပိုင်းမဟာမိတ်တပ်ဖွဲ့ ရ ဖွဲ့ခေါင်းဆောင် UWSA ၀ တပ်ဖွဲ့၏ကိုယ်စားလှယ်အပါအဝင် ပအို၀်း PNO ၊ PNLA ၊ ကရင် KNU ၊ ကရင်နီ KNPP လားဟူ LDU ၊ မွန် NMSP ၊ ကရင် DKBA ၊ ကျောင်းသားတပ်မတော် ABSDF တို့မှကိုယ်စားလှယ်များ အပစ်ရပ်လက်မှတ်မရေးထိုးရသေးသည့် UNFC မှခေါင်းဆောင်များ တက်ရောက်ကြသည်။

အဆိုပါအခမ်းအနားသို့ UN ကိုယ်စားလှယ်များ အပြင် မြန်မာနိုင်ငံမှ သံရုံးကိုယ်စားလှယ် ၂၀ ကျော်ကလည်း တက်ရောက်အားပေးကြကြောင်း အခမ်းအနားတက်ရောက်သည့် ကျောက်မဲဒေသခံ စိုင်းဦးကပြောသည်။

“စစ်ရေးပြစစ်သည်တွေအပါအဝင် ပွဲတက်တဲ့ပရိသတ် ၃၀၀၀ နီးပါးရှိတယ်လို့သိရပါတယ်။ မြို့နယ်အသီးသီးက ယဉ်ကျေးမှုအကအဖွဲ့တွေ၊ နာမည်ကြီးအဆိုတော်တွေ လည်း လာပြီးဖျော်ဖြေကြတယ်။ ဒီနှစ်တော်တော်စည်တယ်လို့ပြောရပါမယ် ”- ဟု ၄င်းကပြောသည်။

၇၁ နှစ်မြောက် သျှမ်းပြည်အမျိုးသားနေ့အခမ်းအနားအတွက် နိုင်ငံတော်သမ္မတကြီးဦးထင်ကျော် ၊ သျှမ်းပြည်နယ်ဝန်ကြီးချုပ် ဒေါက်တာလင်းထွဋ် တို့မှ သဝဏ်လွှာများ ပေးပို့ခဲ့ကြပါသည်။

သျှမ်းတိုင်းရင်းသားများဒီမိုကရေစီအဖွဲ့ချုပ်ဥက္ကဌ ခွန်ထွန်းဦးမှလည်း ရ၁ နှစ်မြောက် သျှမ်းပြည်အမျိုးသားနေ့ သဝဏ်လွှာ ပေးပို့ခဲ့ သည်။ သျှမ်းပြည်မြောက်ပိုင်း မူစယ်၊ နမ့်ခမ်း၊ လားရှိုး၊ သိန္နီ ၊ သျှမ်းပြည်တောင်ပိုင်း တောင်ကြီး ၊လင်းခေး၊လွယ်လင်၊ သျှမ်းပြည်အရှေ့ပိုင်း ကျိုင်းတုံ၊ မိုင်းဆတ် တို့တွင်လည်း သျှမ်းပြည်အမျိုးသားနေ့အခမ်းအနားကျင်းပခဲ့သည်။

၁၉၄၇ ခု ဖေဖော်ဝါရီ ၁၁ နေ့က သျှမ်းပြည်ကောင်စီဥက္ကဌ SSC စဝ်ခွန်ပန်းစိန် က သျှမ်းပြည်ဆိုင်ရာ ဆုံးဖြတ်ချက် ၃ ရပ်အတည်ပြုကြောင်း ထုတ်ပြန်ကြေငြာရာတွင် (၁) – ဖေဖော်ဝါရီလ ရ ရက် ကို သျှမ်းပြည်အမျိုးသားနေ့ အဖြစ်၊ (၂) – ၀ါ-စိမ်း-နီ နှင့် အလယ်လဝန်ပါ အလံကို သျှမ်းပြည်အမျိုးသားအလံနှင့် (၃) – ခေးတိုင်းခေးရာဇာ သီချင်းကို အမျိုးသားသီချင်းအဖြစ် သတ်မှတ်ခဲ့ရာမှာ ယနေ့တိုင် ဖြစ်ပါသည်။