မိုင်းဆတ်-တာချီလိတ်ကြား ဂိတ်တခုမှ ပိုက်ဆံကောက်ခံမှုရုပ်သိမ်းသဖြင့်ကားမားများကျေနပ်နေ

0

သျှမ်းပြည်အရှေ့ပိုင်း မိုင်းဆတ်နှင့် တာချီလိတ်ကားလမ်းတွင် နှစ်ရှည်လများထောင်ထားသော ဂိတ်တခုမှ ဂိတ်ဖြတ်သန်းခ ကောက်ခံမှုရုပ်သိမ်းလိုက်ပြီဖြစ်ဖြင့် ကားသမားများ ကျေနပ်နေကြကြောင်း သိရသည်။

ယမန်နှစ်မိုးတွင်းကာလက မိုင်းဆတ် – တာချီလိတ်ကားလမ်း လမ်းပိုင်းတနေရာ

ဖြတ်သန်းသွားလာသော ကားနှင့်ဆိုင်ကယ်များထံမှ နှစ်ရှည်လများ ငွေကြေးကောက်ခံလာသော မိုင်းကန်းရွာရှိ အဆိုပါဂိတ်ကို မေလ ၁ ရက်နေ့မှစပြီး ငွေကြေးကောက်ခံမှုရပ်ဆိုင်းလိုက်ခြင်းဖြစ်ကြောင်းသိရသည်။

မိုင်းဆတ်-တာချီလိတ်ကားသမား စိုင်းလုံက – အမှတ် ၁၇၁ စစ်ဒေသလက်အောက်ခံတပ်ကနေ ပိုက်ဆံကောက်နေတဲ့ဂိတ်ဖြစ်ပါတယ်။ အခုကားသမားတွေဆီက ပိုက်ဆံမကောက်တော့ ကားသမားစိတ်ချမ်းသာတာပေါ့ဗျာ။ ဂိတ်တော့မဖျက်ဘူးဗျ။ ပိုက်ဆံမကောက်တာဘဲ။ – ဟု သျှမ်းသံတော်ဆင့်အားပြောသည်။

ယခင်ကဖြတ်သန်းသွားလာသော ကား ၊ ဆိုင်ကယ်၊ ခရီးသည်တင်ကား၊ ကုန်ကားကြီးများမှာ အနည်းဆုံး ဘတ် ၂၀ မှ အများဆုံး ဘတ်ထောင်နှင့်ချီ ပေးရကြောင်း ကားသမားများကပြောသည်။

မိုင်းဆတ်နှင့်တာချီလိတ်ကြား လမ်းခရီးမှာ မိုင် ၆၀ ခန့်ရှည်လျားပြီး တောင်ပိုင်း ၀ တပ်ဖွဲ့၏ အမှတ် ၁၇၁ စစ်ဒေသမှ လှုပ်ရှားနေသောဒေသဖြစ်သည်။ လက်ရှိတွင်မြေသားလမ်းသာဖြစ်နေသေးသဖြင့် လမ်းပြုပြင်ခင်းကျင်းရန်အတွက် အစိုးရမှ တာဝန်ယူဆောင်ရွက်နေကြောင်းသိရသည်။

“အခုတော့ လမ်းပြင်နေတုန်း။ အစိုးရက တာဝန်ယူခင်းကျင်းတာ။ တကယ်လို့ ဒီလမ်းကောင်းသွားရင်တော့ သျှမ်းပြည်တောင်ပိုင်းနဲ့အရှေ့ပိုင်းကုန်သည်တွေ ဒီလမ်းကဘဲသွားလာတော့မှာ။ နီးတာကိုး နယ်စပ်နဲ့။ အရင်ကတော့ မြေသားလမ်းဆိုတော့ မိုးတွင်းဆိုပြောမနေနဲ့တော့ဗျာ။ ရွှံ့နွံက ခါးလောက်အထိ ထူတာဗျ” – ဟု စိုင်းလုံက ဆက်ပြောသည်။

ယခင်ကတည်းက ရှိနေသော မိုင်းဆတ်- တာချီလိတ်ကြား တောလမ်းအား ဟုန်ပန်းကုမ္မဏီက ၁၉၉၈ ခုနှစ်ကတည်းက လာရောက်ဖောက်ချဲ့ထားပြီး မြေသားလမ်းအတိုင်းပင်ထားရှိရာ ယခုမှပင် ကတ္တရာလမ်းခင်းရန်စီစဉ်နေခြင်းဖြစ်ကြောင်း၊ ထို့အတွက် အဆိုပါဒေသရှိ ကားဆရာများ ကုန်သည်များ ဒေသခံလူထုများအနေဖြင့် ပျော်ရွှင်ကျေနပ်နေကြခြင်းဖြစ်ကြောင်း လည်းသိရပါသည်။

ဢုပ်ႇဢူဝ်း ၽူႈတွႆႇႁွၵ်ႈ

SHARE