သျှမ်းပြည်မြောက်ပိုင်း လားရှိုးမြို့တွင် လူငယ်ခေါင်းဆောင်များ စွမ်းရည်မြှင့်တင်ရေးသင်တန်း ဖွင့်လှစ်မည်ဖြစ်ကြောင်းသိရသည်။
သင်တန်းကို မြန်မာနိုင်ငံလုံးဆိုင်ရာ ရှမ်းလူငယ်ကွန်ရက် Tai Youth Network က ဦးဆောင်ကာ မေလ ၂၀ ရက်မှ ဂျူလိုင်လ ၂၀ ရက်နေ့အထိ ၂ လကြာ ဖွင့်လှစ်ပေးမည်ဖြစ်ကြောင်း သင်တန်းဖြစ်မြောက်ရေးစီစဉ်သူ စိုင်းနော်ဆိုင်က သျှမ်းသံတော်ဆင့်အားပြောသည်။
“အခုကျနော်တို့ အမည်စာရင်းတွေရထားတယ်။ သီပေါ၊ ကျေးသီးဘက်ကလူငယ်တွေစာရင်းပေးထားတာရှိတယ် သင်တန်းတက်ဖို့။ ကျနော်တို့ သင်တန်းသား ၂၀ လောက်ဘဲ လက်ခံပါမယ်။ ခုတော့ ကျနော်တို့ကြေငြာတာ ၂ ရက် ၃ ရက်လောက်ဘဲရှိသေးတာမို့ အမည်စာရင်းထပ်ပေးချင်တဲ့ သင်တန်းသားတွေရှိဦးမှာဘဲလို့ ထင်ပါတယ် ” – ဟု သျှမ်းသံတော်ဆင့်အားပြောသည်။
ယခုသင်တန်းတွင် နေထိုင်စားသောက်ရေးအတွက် TYN မှတာဝန်ယူမည်ဖြစ်ကြောင်း၊ အသက် ၁၆ နှစ်မှ ၃၅ နှစ်ကြား သျှမ်းဘာသာ ၊ ဗမာဘာသာစာပေ ရေး၊ဖတ်တတ်သူ၊ လူမှုအသိုင်းအဝိုင်းတွင် စိတ်ပါဝင်စားလှုပ်ရှားသည့်လူငယ်များကိုဦးစားပေးလက်ခံမည်ဖြစ်ကြောင်းသိရသည်။
သင်တန်းတွင် ဦးဆောင်မှုအခန်းကဏ္ဍ ၊ ပြသနာဖြေရှင်းမည့်နည်းလမ်း၊ ငြိမ်းချမ်းရေး၊ သဘာ၀ပတ်ဝန်းကျင်နှင့် လယ်ယာမြေများအရေး၊ လူ့အခွင့်အရေး၊ လူသားချင်းစာနာထောက်ထားမှု၊ ကျား မ တန်းတူရေး၊ ဖက်ဒရယ် ဒီမိုကရေစီစနစ်၊ အုပ်ချုပ်ရေးပိုင်းဆိုင်ရာ၊ ကွန်ပြူတာပညာ၊ ဦးဆောင်ဆွေးနွေးမှုအပိုင်းနှင့်လူထုဆက်ဆံရေးအစရှိခေါင်းစဉ်များပါဝင်ကြောင်းသိရသည်။
