သျှမ်းပြည်မြောက်ပိုင်း ကျောက်မဲမြို့နယ်တွင် လယ်ယာသွားသည့်ဒေသခံအမျိုးသားတဦး ၁၀ ရက်ကျော်ကြာပျောက်ဆုံးနေလျှက်ရှိရာ မိသားစုဝင်များက စိုးရိမ်နေကြကြောင်းသိရသည်။

ကျောက်မဲမြို့နယ် မိုင်းတန်အုပ်စု ဝမ့်စန်းရွာနေ စိုင်းအောင်ထွန်း (အသက် ၄၂) ဆိုသူသည် ဧပြီလ ၁၇ ရက်နေ့မနက်ပိုင်းက ၎င်းလယ်ကွက်သို့ မြေဩဇာထည့်ရန်အသွားပျောက်ဆုံးသွားသည်မှာ ယနေ့တိုင် ၁၀ ရက်ကျော်ကြာပြီဖြစ်သော်လည်း သတင်းအစအန မကြားရသဖြင့် မိသားစုဝင်နှင့်ဆွေမျိုး အသိုင်းအဝိုင်းက စိုးရိမ်နေကြသည်ဟု ဇနီးဖြစ်သူ နန်းနွန်းက သျှမ်းသံတော်ဆင့်အားပြောသည်။

“လယ်ထဲမှာမြေဩဇာထည့်မယ်ဆိုပြီး မနက် ၇ နာရီကတည်းကထွက်သွားတာ။ ည ၉ နာရီကျော်အထိ အိမ်ပြန်မရောက်လို့ဖုန်းဆက်ကြည့်လည်းဆက်လို့မရဘူး။ ဆွေမျိုးတချို့ကိုခေါ်ပြီး လယ်အထိသွားကြည့်လည်းမတွေ့ဘူး။ သတင်းလည်းမကြားရ ဆိုတော့ သေလားရှင်လားလည်းမသိရဘူးဒီနေ့အထိပါ။ အဖေအမေတွေလည်း မစားနိုင်မအိပ်နိုင် စိတ်ပူနေကြပါတယ်။ တကယ်လို့လက်နက်ကိုင်တဖွဲ့ဖွဲ့ကဖမ်းသွားခဲ့တယ်ဆိုရင်လည်း ကျေးဇူးပြုပြီး အိမ်နဲ့ဆက်သွယ်အကြောင်းကြားပေးပါ။ အိမ်သားတွေအရမ်းစိတ်ပူနေပါတယ် ”- ဟု သျှမ်းသံတော်ဆင့်အား ပြောသည်။

စိုင်းအောင်ထွန်းသည် ယခင်က ဝမ့်စန်းရွာသူကြီး ဖြစ်ခဲ့ဖူးကြောင်း ၎င်း၏ ဇနီး ကပြောသည်။

“သူက ဘယ်အဖွဲ့အစည်းနဲ့မှမပတ်သက်ပါဘူး။ သူကြီးဆိုတော့လည်း ဖြတ်သန်းသွားလာတဲ့လက်နက်ကိုင်တွေအကုန်လုံးနဲ့ တည့်အောင်ပေါင်းရတာပေါ့။ အဲတာကို ဟိုအဖွဲ့ ဒီအဖွဲ့နဲ့ပတ်သက်တယ်ဆိုပြီးဖမ်းရင်တော့ မဖြစ်သင့်ပါဘူး”- ဟု နန်းနွန်းကပြောသည်။

စိုင်းအောင်ထွန်းသည် မိုင်းတန်ရွာမှ လုံးစိုင်းလေး ပါ့နန်းမွန်းတို့၏သားဖြစ်ပြီး ဇနီးသည် နန်းနွန်းနှင့်အတူ သားသမီး ၂ ဦးထွန်းကားခဲ့သည်။

မိုင်းတန်အုပ်စုတွင်  အစိုးရတပ်မတော်အပြင် RCSS/SSA နှင့်မြောက်ပိုင်းမဟာမိတ်တပ်ဖွဲ့ဝင်များဖြစ်ကြသော TNLA  နှင့် SSPP/SSA တို့လှုပ်ရှားပါသည်။