သျှမ်းပြည် တောင်ပိုင်း ကျေးသီးမြို့နယ် နားပန်ကျေးရွာ တွင် နေအိမ်မီးလောင်မှုကြောင့် တကိုယ်လုံး မီးလောင်ဒဏ်ရာရကာ ဆေးရုံတွင်ဆေးကုသနေသော အသက် ၉ နှစ် အရွယ်မိန်းခလေးမှာ ဆေးကုသ ရန်အတွက် အကူအညီလိုအပ်နေကြောင်း သတင်းရရှိသည်။
ဆေးရုံတွင် တလ ကျော်ကြာဆေးကုသမှုခံယူနေရပြီဖြစ်သဖြင့် လက်ရှိတွင်ဆေးကုသမှုစရိတ်နှင့် ပြုစု စောင့် ရှောက်မှုစရိတ်စကများအထူးအခက်အခဲဖြစ်နေကြောင်း သမီးဖြစ်သူအား စောင့်ရှောက်နေသည့် ဖခင်ဖြစ်သူ စိုင်းလူးက ဧပြီလ ၂၄ ရက်နေ့က သျှမ်းသံတော်ဆင့်အားပြောသည်။
“ သမီးက သက်သာလာပြီဆိုပေမယ့် မီးလောင်ဒဏ်ရာက ဆက်ကုရအုံးမယ်။ သမီးကို ကုဖို့ အတွက် ငွေတွေ လည်း မရှိတော့ဘူး။ ဆေးဖိုးကနေ့တိုင်းကုန်နေရတယ်။ စားဖို့သောက်ဖို့လည်း ခက်ခဲနေတယ် အကုန်လုံးက မီးထဲပါသွားပြီလေ။ သမီးဆေးကုဖို့ အတွက် အကူအညီတောင်းချင်ပါတယ်” ဟု ဖခင်ဖြစ်သူ စိုင်းလူး က သျှမ်းသံတော်ဆင့်အားပြောသည်။
ဆေးကုသမှုစရိတ်မှာ တရက်လျှင် ကျပ်ငွေတသောင်း၊ ၂ သောင်း ၊ ၅ သောင်း ကုန်ကျနေရကြောင်း စိုင်းလူးက ပြောသည်။
မတ်လ ၂၂ ရက်နေ့ နံနက် ၂ နာရီက အသက် ၉ နှစ်အရွယ် နန်းနွန်းပန် နှင့် အဖွားဖြစ်သူတို့ ၂ ဦးတည်း နေထိုင်သော ကျေးသီးမြို့နယ် နားပန်ရွာရှိနေအိမ်တွင် မီးလောင်မှုဖြစ်ပွါးရာ နန်နွန်းပန်အားလည်း တကိုယ် လုံးမီးလောင်သဖြင့် ကျေးသီးဆေးရုံတွင် တလကျော် ဆေးကုသခံယူနေရခြင်းဖြစ်သည်။
“ နေအိမ်လည်းပြာကျသွားတော့ ဘာမှ မရှိတော့ဘူး။ စားဖို့လည်း ခက်နေတယ်။ သူ့အဖွားလည်းမီးလောင်ထိတယ် ဒါမယ့်သက်သာပြီ။” ဟု ဖခင်ဖြစ်သူ က ဆိုသည်။
မီးလောင်မှုဖြစ်ပွါးသည့်နေ့တွင် စိုင်းလူးနှင့် နန်းရွှေစိန်တို့လင်မယားမှာ အလုပ်လုပ်ရန် ထိုင်းနိုင်ငံသို့ရောက်ခါစဖြစ်ပြီး နေအိမ်မီးလောင်သည့်သတင်းကြားသည်နှင့် ချက်ချင်းနေရပ်ပြန်လာသဖြင့် လက်ကျန်ငွေမရှိတော့ကြောင်း ၄င်းက ရှင်းပြသည်။
မီးသည် မီးဖိုခန်းမှစတင်လောင်ကျွမ်းပြီး နေအိမ်ထဲအထိကူးစက်လောင်ကျွမ်းကြောင်း၊ ထို့ကြောင့် လှောင်ထားသည့် စပါးများပါ မီးလောင်ကြောင်း၊ လက်ရှိတွင် စားစရာ နေစရာ မရှိသည့်အပြင် သမီးအား ဆေးကုရန်အတွက်လည်း လိုအပ်သဖြင့်အမှန်တကယ်အခက်အခဲရင်ဆိုင်နေရကြောင်း စိုင်းလူးက ပြောပါသည်။
