သျှမ်းပြည်မြောက်ပိုင်း နမ့်ခမ်းမြို့တွင် ပြည်ထောင်စုလမ်းမကြီး တိုးချဲ့ရေးဧရိယာအတွင်းပါ သည်ဟုဆိုကာ လမ်းမ ကြီးဘေးနေအိမ်များ ပုံစံ ၁၀၅ အား မူလမြေဧရိယာထက် လျော့သည့် အတိုင်းအတာထုတ်ပေးသည့်အပေါ် ဒေသခံများက သျှမ်းပြည်နယ်ဝန်ကြီးရုံးထံ စာပေးပို့ခဲ့သည်။

ဂျန္နဝါရီလ ၂၉ ရက်နေ့က ဒေသခံများ တောင်ကြီးမြို့ရှိ သျှမ်းပြည်နယ်ဝန်ကြီးချုပ်ထံ အဆိုပါတိုင်ကြားစာပေးပို့ခဲ့ခြင်းဖြစ်ကြောင်းသိရသည်။

နမ့်ခမ်းမြို့ ပြည်ထောင်စုလမ်းမဘေး နှင့် နမ့်ခမ်း – မိုင်းဝီး လမ်းမ ဘေးရှိ နေအိမ်ဆောက်နေသူများအား လမ်းစီမံကိန်းနယ်မြေအတွင်း နေအိမ်များဟုဆိုကာ မြေစာရင်းရုံးမှ မြေပုံစံ ၁၀၅ ထုတ်ပေးရာ နဂိုမူလ ဧရိယာ မဟုတ်ဘဲ လျော့နေခြင်းဖြစ်ကြောင်း ဒေသခံ ဦးစိုင်းပီး ကဆိုသည်။

“အိမ်အဟောင်းဖျက်ပြီး အိမ်သစ်ဆောက်မိန့်ရဖို့ မြေပုံစံ ၁၀၅ သွားလျှောက်ပါတယ်။ မြေစာရင်း ရုံးက ချပေးတော့ မူလဘိုးဘွားပိုင်မြေဧရိယာ ထက် လျော့နေတယ်။ မေးကြည့်တော့ လမ်းတိုးချဲ့ရေးစီမံကိန်းမှာပါတာကြောင့် အနည်းဆုံး ၃၅ ပေ နောက်ဆုတ် ပေးရမယ်လို့ပြောတယ်။ အိမ်ရှင်ဘက်က သဘောမတူရင် ပုံစံ ၁၀၅ မပေးဘူးလို့ပြောတယ်” ဟု ၄င်းကဆိုသည်။

အိမ်ဆောက်မည့်သူများမှာ နမ့်ခမ်းမြို့နယ်အုပ်ချုပ်ရေးမှူးထံ သွားရောက်တွေ့ဆုံဆွေးနွေးခဲ့ သော်လည်း အစိုးရစီမံကိန်းဟုသာပြောဆိုကြောင်း နမ့်ခမ်း – မိုင်းဝီး ကားလမ်းဘေးတွင် နေထိုင်သော နန်းအေ ဆိုင် ကဆိုသည်။

“နမ့်ခမ်းမြို့နယ်အုပ်ချုပ်ရေးမှူး ဦးထွန်းသိန်းအောင်ဆီကိုလည်း လူထုကိုယ်စားလှယ် ကော်မတီ ၁၂ ဦးအဖွဲ့က သွားတွေ့တော့ ဒီစီမံကိန်းက အစိုးရစီမံကိန်းဘဲ လို့ဘဲပြောတယ်။ သူကိုယ်တိုင် လည်း လူထုကိုကွင်းဆင်းရှင်းပြတာမရှိခဲ့ဘူး။ ဒီစီမံကိန်းကြီးက ဘယ်တော့ စ မလဲမသိရ ဘူး။ လူထုဆီကိုတရားဝင် ရှင်းလင်းတာ ဘာမှမရှိတော့ ပွင့်ပွင့်လင်းလင်းမသိရဘူး။ ဒီတော့ ဒေသခံ လူထု က အလိုလိုနေရင်းကျူးကျော်နေထိုင်သူ လိုလိုဖြစ်သွားတယ်။ လူထုလုံခြုံမှုကင်းမဲ့နေတယ် ” ဟု ၄င်းက သျှမ်းသံတော် ဆင့်အားပြောသည်။

လမ်းဦးစီးဌာနမှ ထုတ်ပြန်သော လမ်းနယ်နမိတ်သတ်မှတ်ချက်များမှာ အမြန်လမ်းကြီး အကျယ် ၄၀၀ ပေ ၊ အထူးသတ်မှတ်လမ်းများ ၃၀၀ ပေ ၊ နိုင်ငံတကာဆက်သွယ်ရေးလမ်းမကြီး ၂၃၀ ပေ၊ ပြည်ထောင်စုလမ်းမကြီး -တိုင်းပြည်နယ် – ခရိုင်/မြို့နယ် ဆက်သွယ်လမ်းမကြီး ၁၅၀ ပေ၊ မြို့နယ်ကျေးရွာ ဆက်သွယ် သည့်လမ်း ၁၀၀ ပေ တို့ဖြစ်ကြောင်း လမ်းဦးစီးဌာနမှ သိရှိရသည်။

နန်းသီရိ (မူစယ်)