သျှမ်းပြည်တောင်ပိုင်း ညောင်ရွှေမြို့ရှိ ညောင်ရွှေဟော်နန်းအတွင်း ရှေးဟောင်းအမွေအနှစ်အသုံး အဆောင်များအား ရန်ကုန်သို့အမျိုးသားပြတိုက်သို့ ယူဆောင်ကာပြုပြင်မည်ဟူသော အစီအစဉ်အား မဖြစ်သင့်ကြောင့် သျှမ်းသမိုင်းပညာရှင်များ၊ သျှမ်းပြည်ယဉ်ကျေးမှုအမွေအနှစ်ထိန်းသိမ်းသူများအဖွဲ့က ပြောဆိုလိုက်သည်။

“သျှမ်းစော်ဘွားတွေရဲ့အသုံးအဆောင် တခြားကိုယူဆောင်ပြီး သန့်ရှင်းရေုးလုပ်တာ မကောင်းပါဘူး။ နေရာရွှေ့လေ ပျက်စီးပျောက်ရှလေဘဲ။ ရှေးဟောင်းအမွေအနှစ်ကိုနေရာမရွေ့သင့်ဘူး။ လုပ်ချင်ယင် ရှိတဲ့နေရာမှာဘဲလာလုပ်သင့်ပါတယ်။ ”- ဟု သျှမ်းပြည်အရှေ့ပိုင်း ကျိုင်းတုံမြို့နယ် ရှေးဟောင်းအမွေအနှစ်ထိန်းသိမ်းစောင့်ရှောက်ရေးအဖွဲ့က လုံးဆမ်တစ်ဆေကပြောဆိုသည်။

A.D ၁၃၆၉ ကစတင်တည်ဆောက်လာခဲ့သော ညောင်ရွှေဟော်နန်းအတွင်းရှိ စော်ဘွားများ၏ နောက်ဆုံးလက်ကျန် အသုံးအဆောင်ပစ္စည်းအမျိုးပေါင်း ၂၇၀ ကျော်ကို ရန်ကုန်သို့သယ်ဆောင်ကာ ခေတ်မှီစက်ကြီးများဖြင့် ဆေးကြောသန့်စင်မည်ဖြစ်ကြောင်း ဂျန္နဝါရီလ ၁၇ ရက်နေ့က ယဉ်ကျေးမှုဝန်ကြီးဌာန က ညောင်ရွှေဟော်နန်းတွင် သတင်းစာရှင်းလင်းပွဲပြုလုပ်ခဲ့သည်။

ရန်ကုန်မြို့အမျိုးသားပြတိုက်ဒါရိုက်တာ နန်းလောဝ်ငင်းက -“ ရန်ကုန်ကိုသယ်ယူလာပြီးဆေးကြောမှာ ကအသုံးအဆောင်ပစ္စည်းအမျိုးပေါင်း ၂၇၀ ကျော်နဲ့ အဝတ်အစား ၁၃၈ စုံ။ အချိန် ၁ နှစ်ယူပါမယ်။ ဆေးကြောသန့်စင်ဖို့အတွက် သျှမ်းပြည်နယ်အစိုးရက ကျပ်သန်းပေါင်း ၁၀၀ သုံးမယ်။ ယဉ်ကျေးမှုဦးစီးဌာနက ကျပ်သန်းပေါင်း ၅၀ သုံးစွဲမယ်။ ဆေးကြောသန့်စင်ပြီးရင် ညောင်ရွှေဟော်နန်းကိုပြန်ယူလာထားမယ် ”- ဟုသတင်းစာရှင်းလင်းရာတွင်ပြောကြားခဲ့ကြောင်းသိရသည်။

ခေတ်မှီစက်ကြီးများဖြင့် သမိုင်းဝင်ပစ္စည်းများအား ဆေးကြောသန့်စင်ခြင်းမှာ မြန်မာနိုင်ငံတွင် ပထမဆုံးအကြိမ်ဖြစ်ကြောင်းလည်းသိရသည်။

သျှမ်းသမိုင်းသုတေသီ စာရေးဆရာစဝ်ပင်ခမ်းက – “သမိုင်းဝင်ပစ္စည်းဆိုတော့ ပြင်ချင်ရင် တည်ရှိတဲ့နေရာမှာဘဲ လာပြင်သင့်ပါတယ်။ ပညာရှင်တွေကို ဖိတ်ခေါ်ပြီးတော့ပေါ့နော်။ အမျိုးပေါင်းရာချီဟာ ခရီးဝေးကို သယ်သွားသယ်လာနဲ့ ဆိုရင် လမ်းမှာကျပျောက်နိုင်တယ်လေ။” – ဟု ပြောသည်။

ညောင်ရွှေစော်ဘွားကြီး၏ သမီးဖြစ်သူ စဝ်ဟေမာသိုက်က – “၀န်ကြီးဌာနကလုပ်ပေးမယ်ဆိုတော့ ပါပါတို့ဝမ်းသာတယ်။ တချို့ကဆိုရင်တအားဟောင်းနွမ်းနေပြီ။ ခေတ်မှီနည်းစနစ်နဲ့ပြန်လုပ်ပြီးတော့ သန့်ရှင်းရေးလုပ်ပြီးပြန်ယူလာရင် မပျက်စီးလွယ်အောင် လေမဝင်နိုင်တဲ့ဘီဒိုနဲ့ ကောင်းကောင်းထိန်းသိမ်းထားမယ်။ ဒီတိုင်းထားမယ့်အတူတူ နိုင်ငံခြားကိုယူသွားမယ့်အတူတူ ကိုယ့်ယဉ်ကျေးမှုမပျက်စီးအောင်ဒီလိုလုပ်ပေးတာ ကောင်းတယ်။ နန်းလောင်ငင်းကိုဆိုရင် ပါပါက ယုံကြည်စိတ်ချတယ်လေ ” – ဟု သျှမ်းသံတော်ဆင့်သို့ပြောသည်။

ညောင်ရွှေစော်ဘွားကြီး စဝ်ရွှေသိုက်သည် မြန်မာနိုင်ငံ၏ ပထမ ဆုံး သမ္မတကြီး ဖြစ်သည်။

အဆိုပါ ညောင်ရွှေ ယဉ်ကျေးမှု ပြတိုက်သည် ၁၉၆၀ ခုနှစ် နောက်ပိုင်းတွင် စော်ဘွားကြီးများပြတိုက် ၊ယဉ်ကျေး မှုပြတိုက် ၊ဗုဒ္ဓဝင်ပြတိုက် စသည့်အမည် များဖြင့် ယဉ်ကျေးမှု ဝန်ကြီးဌာနက ထိန်းသိမ်း စောင့်ရှောက်ခဲ့ရာမှ ၂၀၁၃ ဂျူလိုင်လ မှစ၍ သျှမ်းပြည်နယ် အစိုးရအဖွဲ့သို့ လွှဲပြောင်းပေး ခဲ့ခြင်း ဖြစ်ပြီးပြတိုက်တွင် စော်ဘွား မှတ်တမ်းဓါတ်ပုံ (၉၁)ပုံ ၊အဝတ်အထည် (၁၃၈) မျိုး၊ ပစ္စည်း အမယ်ပေါင်း (၃၃၈) မျိုးကိုပြသထားကြောင်း ၊ နိုင်ငံခြားသား ဧည့်သည် တစ်ဦးလျှင် နှစ်ဒေါ်လာ ၊ ပြည်တွင်း ဧည့်သည် တစ်ဦးလျှင် ၂၀၀ ကျပ် နှင့် ကျောင်းသား/သူ များအခမဲ့ လေ့လာ ကြည့်ရှု နိုင်ကြောင်း နိုင်ငံပိုင်သတင်း စာများတွင်ဖော်ပြခဲ့ဖူးသည် ။