သျှမ်းပြည် နယ်အမျိုးသမီးရေးရာအဖွဲ့နှင့် သျှမ်းပြည်နယ်ကုသရေးနှင့် ပြည်သူ့ ကျန်းမာ ရေးဦးစီးဌာန တို့ ပူးပေါင်း၍ သားအိမ်ခေါင်းကင်ဆာ အကြိုအဆင့် စမ်းသပ်ရှာဖွေကုသခြင်းအားအခမဲ့ ဆောင်ရွက် ပေး လျှက်ရှိကြောင်း သိရသည် ။
နိုင်ငံတကာနှင့် နှိုင်းယှဉ်လျှင် မြန်မာနိုင်ငံသည် သားအိမ်ခေါင်းကင်ဆာဖြစ် ပွားနှုန်းမြင့်မား နေ ဆဲဖြစ်ပြီး သျှမ်းပြည်နယ် (တောင်ပိုင်း) တောင်ကြီးမြို့ အမျိုးသမီးနှင့်ကလေး ဆေးရုံကြီးတွင် တစ်လလျှင် သားအိမ်ခေါင်းကင်ဆာ အဆင့်မြင့်လူနာ အမျိုးသမီး(၅) ဦး ထက်မနည်း တွေ့နေရကြောင်း တောင်ကြီးမြို့ အမျိုးသမီးနှင့်ကလေးဆေးရုံကြီး မှ သားဖွားမီး ယပ်အထူးကု ဆရာဝန်ကြီး ဒေါက်တာဇော်မြင့်နိုင်ကပြောသည် ။
” သားအိမ်ခေါင်းကင်ဆာဟာ ကုသလို့ရတဲ့ရောဂါတစ်မျိုးဖြစ်ပြီး ရောဂါအ စပျိုးတဲ့အဆင့်မှာ စစ်ဆေးရင် စောပြီးသိနိုင်ပါတယ်၊ သိပြီးရင် ကင်ဆာ အဆင့်ကိုမရောက်အောင်လို့ ရောဂါပျိုးတဲ့အဆင့်မှာ ကုသမှု ခံယူလို့ရပါ တယ် ။ ဒီနေ့လုပ်တဲ့ အစီအစဉ်ကလဲ အမျိုးသမီးထုတွေမှာ အဲ့ဒီရောဂါပျိုး တဲ့အဆင့်မှာ ရှိနေသလား စစ်ဆေးပြီးရှိရင် တစ်ခါတည်းကုသမယ့် အစီအစဉ်ပါပဲ ” ဟု ၄င်းကရှင်းပြသည် ။
ဂျန္နဝါရီ ၂၃ ရက်နေ့က တောင်ကြီးမြို့အမျိုးသမီးရေးရာရုံးတွင် တောင်ကြီး ခရိုင် ၊ လင်းခေး ခရိုင် ၊ လွိုင်လင်ခရိုင်မှ သားအိမ်ခေါင်းကင်ဆာ အကြိုအ ဆင့်လာရောက်စမ်းသပ်ရှာဖွေကုသသည့် အမျိုးသမီးပေါင်း (၅၃) ဦးရှိကြောင်း၊ ဖေဖော်ဝါရီလမှ စ၍ သျှမ်းပြည်နယ်အတွင်းရှိ မြို့နယ်များအား သားအိမ်ခေါင်း ကင်ဆာ အကြိုအဆင့် စမ်းသပ်ရှာဖွေကုသခြင်းနှင့် ပတ်သက်၍ ကွင်းဆင်း ဆောင်ရွက်သွားမည်ဖြစ်ကြောင်း သျှမ်းပြည်နယ် အမျိုးသမီးရေးရာအဖွဲ့ ယာယီ ဥက္ကဌ ဒေါ်ညိုညိုလွင်ထံ မှသိရသည် ။
” သျှမ်းပြည်နယ်အတွင်းမှာရှိတဲ့ အိမ်ထောင်ရှင်အမျိုးသမီးများ အသက် (၃၀) မှ (၄၉) နှစ်အတွင်း သားအိမ်ခေါင်းကင်ဆာအကြိုကာကွယ်ကုသခြင်းဖြစ်ပြီး ပူးပေါင်းပါ၀င်ဆောင်ရွက် မယ့်အဖွဲ့က သျှမ်းပြည်နယ် ကျန်းမာရေး ကုသရေးဌာနတွေက အိုဂျီဒေါက်တာ များအဖွဲ့ဖြစ်ပါတယ် ။ (၂၅) ရက်နေ့မှာလဲ ထပ်ပြီးကုသဖို့ရှိပါသေးတယ် ၊ ကျမတို့သျှမ်းပြည်နယ်အတွင်းမှာ ဒီလိုကုသ တဲ့နေရာမှာအားလုံးပူးပေါင်း ပါ၀င်ဆောင်ရွက်ဖို့လူထုကလဲလိုအပ်ပါတယ် ” ဟု ဒေါ်ညိုညိုလွင် ကပြောသည် ။
မြန်မာနိုင်ငံတွင်သားအိမ်ခေါင်းကင်ဆာသည် ဒုတိယအဖြစ်အများဆုံးနှင့် အသေအပျောက်အများဆုံးကင်ဆာဖြစ်ပြီး ပထမ အဖြစ်များဆုံးရောဂါ တစ်မျိုးမှာ ရင်သားကင်ဆာဖြစ်သည် ။ သားအိမ်ခေါင်း ကင်ဆာနှင့်ပတ် သက်၍ ကမ္ဘာ့ကျန်းမာရေးအဖွဲ့မှမြန်မာနိုင်ငံရှိ အမျိုးသမီးများတွင်နှစ်စဉ် (၅၂၈၆) ဦးဖြစ်ပွားပြီး (၂၉၉၈) ဦးသေဆုံးသည် ဟုခန့် မှန်းခဲ့သည် ။ ကုသရန်ခက်ခဲပြီး သေစေနိုင်သော် လည်း ကာကွယ်၍ရ သောကင် ဆာရောဂါတစ်မျိုးဖြစ်သည်ဟုသိရပါသည် ။
Leave a Comments