သျှမ်းပြည်နယ်မြို့တော် တောင်ကြီး၏ ပြယုဂ်တစ်ခုဖြစ်သော ချယ်ရီပန်းများအား ခူးယူခြင်း၊ ရောင်းချနေခြင်း များ အတွက် သက်ဆိုင်ရာ သစ်တောဦးစီးဌာနမှ တားမြစ်ပေးစေချင်ကြောင်း တောင်ကြီးမြို့ သစ်ပင်စိုက်အသင်းများက တောင်းဆိုလိုက်သည် ။
တောင်ကြီးမြို့ဒေသခံတစ်ချို့မှာ ချယ်ရီပန်းကိုင်းများခူးယူကာ လူမှုကွန်ယက် စာမျက်နှာများပေါ်တွင် အလှဓါတ်ပုံများရိုက်တင်ထားကြသည်ကို တွေ့မြင်နေရပြီး အချို့မှာ စျေးတွင်ရောင်းချနေကြသည့်အပေါ် သစ်ပင်စိုက်ပျိုးသည့့်အဖွဲ့များက အပြင်းအထန်ကန့်ကွက်ကြောင်း သိရသည် ။
“ဒီကိစ္စကိုကျနော်တို့က နည်းဥပဒေဖြစ်စေချင်တာ ၊ ပုဒ်မ ၆၁ လိုမျိုး အများနဲ့သက်ဆိုင်တဲ့ ဥပဒေထုတ်စေချင်တာ ၊ ကျနော်တို့ကစိုက်တယ်။ သူတို့က ချိုးကြ ခူးရောင်းကြတဲ့အပေါ် ကျနော်တို့ အနေနဲ့ ဘာမှပြောလို့မရ ဘူးဖြစ်နေတယ် ” ဟု ပန်းပျိုးလက် အဖွဲ့ မှ ဦးအောင်လင်းကပြောသည် ။
ပန်းပျိုးလက် သစ်ပင်စိုက်သည့်အဖွဲ့အနေနှင့် ၂၀၁၅ ခုနှစ်မှစ၍ ချယ်ရီပင်ပေါင်း ငါးထောင်ကျော်ခန့် စိုက်ပျိုး ခဲ့ပြီး အခြားသောနှစ်ရှည်ပင်များကိုလည်း တောင်ကြီးမြို့နယ်အတွင်း စိုက်ပျိုးနေဆဲဖြစ်ကြောင်း သိရသည် ။
“ချယ်ရီပင်တွေက အရင်တုန်းကဆို စိုက်စရာမလိုဘူး သဘာဝအလျောက် တစ်တောလုံးတစ်တောင်လုံးပွင့်တာ ၊ ရှားမီးလှုံ တဲ့အချိန်တွေဆိုလူတွေတော်တော်များများအသုံးပြု ကြတယ် ၊ ထင်းခုတ်တဲ့လူတွေက လည်း ချယ်ရီကိုင်းတွေကခြောက်မြန်တယ် ဆိုပြီး ခုတ်ကြတယ် ဒါကြောင့်ချယ်ရီပင်တွေကရှားပါးကုန်တာ ၊ ချယ်ရီတစ်ခုတည်းမဟုတ်ဘူး သက်ဆိုင်ရာ သစ်တောထွက် အပင်တွေ တွေကို သစ်တောဦးစီးဌာနကနေ ထိန်းသိမ်းစေချင်တယ် ” ဟု Living Earth Green အဖွဲ့မှ ဒေါ်ချယ်ရီကျော်က ပြောသည် ။
ချယ်ရီပင်သည် စိုက်ပျိုးသည့်နှစ်မှစ၍ ၃ နှစ်ကျော် ၄ နှစ် အတွင်း အပွင့်ပွင့်ပြီး အေးမြသောရာတီဥတု ရှိသည့် သျှမ်းပြည်နယ်အတွင်းသာ စိုက်ပျိုးနိုင်သော အပင်အမျိုးအစားဖြစ်သည် ။
ချယ်ရီပင်များ ရှားပါးလာချိန်တွင် သျှမ်းပြည်အလယ်ပိုင်းမှမြို့နယ်တော်တော်များများတွင်လည်း ယခု ၁ နှစ် ၂ နှစ်အတွင်း သျှမ်းလူငယ်အဖွဲ့က ချယ်ရီပင်စိုက်လှုပ်ရှားမှုများပြုလုပ်လာနေပါသည်။
Leave a Comments