အစိုးရ၏ တပ်မတော်ကိုယ်စားလှယ်အဖွဲ့နှင့် သျှမ်းပြည်တိုးတက်ရေးပါတီ/သျှမ်းပြည်တပ်မတော် တို့ နေပြည်တော်စစ်တိုင်းရုံးတွင် တွေ့ဆုံခဲ့ကြကြောင်း သိရသည်။
ဖေဖော်ဝါရီလ ၂၅ ယနေ့ မနက် ၉ နာရီအချိန်ခန့်က SSPP မှ ဒုဥက္ကဋ္ဌ ဗိုလ်ချုပ်ခွန်ဆိုင် ဦးဆောင်သည့် ကိုယ်စားလှယ်အဖွဲ့နှင့် တပ်မတော် ညှိနှိုင်းရေးအဖွဲ့ ခေါင်းဆောင် ဒုတိယ ဗိုလ်ချုပ်ကြီး ရာပြည့် ဦးဆောင်သည့် ကိုယ်စားလှယ်အဖွဲ့တို့ အလွှတ်သဘော တွေ့ဆုံခဲ့ကြခြင်းဖြစ်ကြောင်း သိရသည်။
တွေ့ဆုံမှုတွင် ပါ၀င်သည့် SSPP မှ ဗိုလ်မှူးဖုန်းဟန် က သျှမ်းသံတော်ဆင့်အား -“ဒီဇင်ဘာ ၂၁ ရက်နေ့နဲ့ ဇန်နဝါရီလ ၂၅ ရက်နေ့က စစ်တပ်ကနေ ထုတ်ပြန်တဲ့ ကြေငြာချက်တွေကို ပြန်ဖတ်ပြတယ်။ ငြိမ်းချမ်းရေးနဲ့ ပတ်သက်ပြီး တပ်မတော်ဘက်က ဖြစ်ချင်တာတွေကို ရှင်းလင်းပြောပြတယ်”- ဟု ပြောသည်။
၄င်းတို့တွေ့ဆုံမှုတွင် တလတကြိမ် အနည်းဆုံး တွေ့ဆုံနိုင်ဖို့၊ မြောက်ပိုင်း ပဋိပက္ခတွေ အပါအဝင် ဖြစ်ပွါးနေသည့် ပဋိပက္ခများအား လျှော့ချနိုင်ဖို့ နည်းလးမ်းများကိုပါ ဆွေးနွေးခဲ့ကြကြောင်း၊ ထိုု့အပြင် အပြန်အလှန် ယုံကြည်မှု၊ နားလည်မှု တည်ဆောက်ပြီး ဆွေးနွေးပွဲများ ဆက်လက်လုပ်ဆောင်သွားကြမည်ဟုလည်း သဘောတူခဲ့ကြကြောင်း ၄င်းက ဆိုပါသည်။
“ကျနော်တို့ဘက်က ဆွေးနွေးဖြစ်ခဲ့တာကတော့ – ၁၉၄၇ ခုနှစ်ကတည်းက ပင်လုံမြို့မှာ သဘောတူထားတဲ့ တိုင်းရင်းသားတွေ တန်းတူညီမျှရေး၊ ကိုယ်ပိုင်ပြဌာန်းခွင့် စတာတွေကို အရင်ကိုင်တွယ်ဖြေရှင်းရမယ်။ ဒါတွေကို တခုမှ အကောင်အထည်မဖော်ရသေးဘူး။ ပြဿနာအရင်းကို မဖြေရှင်းဘဲ အဖျားကိုပဲ ဖြေရှင်းခဲ့တာကြောင့် တိုင်းရင်းသားလက်နက်ကိုင်တွေ တောပြန်ခိုရတဲ့သာဓကတွေ ကျနော်တို့မှာ အများကြီး ရှိခဲ့ဖူးပါတယ်။ ပင်လုံစာချုပ်ပါ အချက်အလက်တွေကို အကောင်အထည်မဖော်နိုင်ဘဲ နိုင်ငံရေးကို စစ်ရေးနည်းနဲ့ဖြေရှင်းနေတာ နှစ်ပေါင်း ရ၀ ကျော်ပြီ။ ဒီနိုင်ငံရေးပြဿနာတွေကို နိုင်ငံရေးနည်းနဲ့ ရှင်းလင်းအဖြေရှာမယ်ဆိုရင် လက်နက်ကိုင်တိုက်ခိုက်စရာအကြောင်း မရှိဘူး။ ပင်လုံစာချုပ်ကို ကနေ့ထိ တချက်မှ အကောင်အထည် မဖော်နိုင်သေးလို့ ဒီနေ့ထိ ပြဿနာဖြစ်နေရတာဖြစ်တယ်- စတဲ့အချက်တွေ ဖြစ်တယ်”- ဟု စိုင်းဖုန်းဟန်က ပြောသည်။
ထို့အပြင် အပစ်အခတ်ရပ်စဲရေးနှင့် ငြိမ်းချမ်းရေးတွင် ပါဝင် ဆောင်ရွက်ရန် အခက်အခဲများ ကြုံတွေ့သည့်အပေါ် တင်ပြဆွေးနွေးခဲ့ပြီး အစိုးရတပ်မတော်မှဖမ်းဆီးထားသော SSPP တပ်ဖွဲ့ဝင် ၁၇ ဦး ပြန်လွှတ် ပေးရန်လည်း တောင်းဆိုခဲ့ကြောင်း ဗိုလ်မှူး စိုင်းဖုန်းဟန်က ပြောသည်။
နိုင်ငံတော်၏ အတိုင်ပင်ခံရုံး ဝန်ကြီးဌာန ညွှန်ကြားရေးမှူးချုပ် ဦးဇော်ဌေးက “NCA ထိုးနိုင်ဖို့အတွက် ကြားထဲမှာ ဘာတွေအခက်အခဲရှိလဲ။ တဆင့်တဆင့် ဘယ်လိုတွေသွားကြမလဲဆိုတာ ကျနော်တို့ ဆွေးနွေးတယ်။ သို့သော် သူတို့ဘက်ကလည်း ဟိုဘက်မှာ တင်ပြရမဲ့ကိစ္စတွေရှိတယ်။ ကျနော်တို့ဘက်ကလည်း ပြန်ပြီး တင်ပြပြီး လုပ်ရမှာတွေရှိတယ်။ နောက်ထပ်လည်း ထပ်ပြီး အမြန်ဆုံးတွေ့ဆုံသွားဖို့ရှိပါတယ်”ဟု ဖေဖော်ဝါရီ ၂၂ ရက်နေ့ SSPP နှင့် NRPC တွေ့ဆုံဆွေးနွေးမှုအပြီး ပြောသည်ဟု ဧရာဝတီသတင်းဌာနက ဖော်ပြထားသည်။
SSPP သည် ဖေဖော်ဝါရီ ၂၂ ရက်က အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) နှင့် လည်းကောင်း၊ ဖေဖော်ဝါရီ ၂၅ ရက်တွင်မူ တပ်မတော်ညှိနှိုင်းရေးအဖွဲ့ဖြင့်လည်းကောင်း အသီးသီး တွေ့ဆုံ ဆွေးနွေးခဲ့ပါသည်။
SSPP သည် ပြည်နယ်အဆင့်၊ ပြည်ထောင်စုအဆင့် အပစ်အခတ်ရပ်စဲရေးစာချုပ်ကို ၂၀၁၂ ခုနှစ်က လက်မှတ် ရေးထိုးထား သည်။
