သျှမ်းပြည်မြောက်ပိုင်း ကျောက်မဲမြို့နယ် နမ့်မန်းရွာ အတွင်း လက်နက်ကိုင်တပ်ဖွဲ့ မှ လက်နက်ကြီး ဖြင့် လှမ်းပစ် သဖြင့် ရွာသား ၃ ဦး ဒဏ်ရာရရှိကာ ကျောက်မဲမြို့ ဆေးရုံသို့ တက်ရောက် ဆေးကုသမှုခံယူနေရကြောင်း သိရသည်။
ဖေဖော်ဝါရီ ၂၁ ရက် မနက်ပိုင်းက နမ့်မန်းရွာတွင်လက်နက်ကြီးထိမှန်ခဲ့သူများမှာ အသက် (၄၆) နှစ်အရွယ် မသန်းအေး၊ အသက် (၅၀)အရွယ် ဦးစိုင်း နှင့် အသက် ၈နှစ် အရွယ် ကလေး နန်းဆိုင်လင်း တို့ဖြစ်ကြောင်း၊ ၄င်းတို့သည် ကျောက်မဲ ဆေးရုံကို နေ့လည်ပိုင်းက ရောက်ရှိလာကြောင်း၊ လက်ရှိတွင် ထိခိုက်ဒဏ်ရာရသူများ အခြေအနေမှာ စိုးရိမ်စရာ မရှိကြောင်း ကျောက်မဲမြို့ ဇီဝိတ လူမှုကူညီရေး အသင်း မှ ဦးတင်မောင်သိန်း က ပြောသည်။
“ မသန်းအေးကတော့ ပေါင်တွေ၊ တင်ပါးတွေ မှာဒဏ်ရာရတယ်။ နန်းဆိုင်လင်းက ညာညှပ်ရိုးနဲ့လက်မောင်း၊ ၊ဦးစိုင်းကတော့ညာပေါင် ဒူးခေါင်းနဲ့ ညာလက်မောင်းမှာဒဏ်ရာရတာပါတယ်။ မသန်းအေး က ဒဏ်ရာ ပြင်းထန်တယ်။ ဒါပေမယ့် ဒီနေ့ ခွဲစိတ်ပြီးတော့ အခြေအနေ ကောင်းပါတယ်။ စိုးရိမ်စရာ မရှိတော့ဘူး” ဟု ဦးတင်မောင်သိန်း ကဆိုသည်။
အဆိုပါဒေသ ရွာဘက်ပိုင်းတွင် RCSS/SSA တပ်များဖြတ်သန်းသွားလာပြီး တောပိုင်းတွင်မူ မြောက်ပိုင်းမဟာမိတ်တပ်ဖွဲ့ဝင် တအာင်းတပ်များလှုပ်ရှားနေကြောင်း၊ သို့သော် ရွာဘက်သို့လက်နက်ကြီးပစ်ခတ်သည့်အဖွဲ့ကိုမသိရကြောင်း ရွာသားများကပြောသည်။
“အရင်နေ့တွေတုန်းက သျှမ်းတပ်က သွားလာတော့ ဒီမှာသျှမ်းတပ်ရှိနေတယ်အထင်နဲ့ပစ်လိုက်တာထင်တယ် တပ်ပေါင်းစုဘက်က ”- ဟု ကျောက်မဲရောက် ဒေသခံကပြောသည်။
အဆိုပါဒေသတွင် အစိုးရတပ်၊ RCSS/SSA နှင့် TNLA တို့ လှုပ်ရှားပါသည်။
ထိုနည်းတူ သျှမ်းပြည်နယ် တောင်ပိုင်း နမ့်လန် လွယ်ငင်းကျေးရွာ ဘက်တွင် RCSS နှင့် SSPP ကြားတိုက်ပွဲကြောင့် မိုင်းထိမှန်သူ ၂ ဦးကို မကယ်ထုတ်နိုင်သေးပေ။
သျှမ်းပြည် မြောက်ပိုင်း နှင့် တောင်ပိုင်း တွင် တိုက်ပွဲများဆက်တိုက် ဖြစ်ပွားကာ သီပေါမြို့နယ် အတွင်း စစ်ဘေးရှောင် ၁၂၀၀ ကျော် ထိ တိုးလာကာ စစ်ဘေးရှောင်များအတွက် စားဝတ်နေရေး အခက်အခဲ ကြုံနေရသည်။
