သျှမ်းပြည် တောင်ပိုင်း နှင့် မြောက်ပိုင်း နယ်မြေ အစပ်တွင် ယခုတပတ်အတွင်းဖြစ်ပွါးသော တိုက်ပွဲကြောင့် မိုင်းစထိမှန်သူ ရွာသား ၂ ဦး ကို ယနေ့ ထိ မကယ်ထုတ်နိုင်သေးကြောင်း သတင်းရရှိသည်။

တိုက်ပွဲသည် သျှမ်းပြည်နယ်မြောက်ပိုင်း သီပေါမြို့နယ်အတွင်းရှိ နမ့်လန်မြို့ မန်လီအုပ်စု လွယ်ငင်းကျေးရွာ နှင့် ပါကမ်းကျေးရွာ အနီးတွင် RCSS နှင့် SPPP တို့ကြား ဖြစ်ပွါးခဲ့ခြင်းဖြစ်ပါသည်။

တိုက်ပွဲကြောင့် မိုင်းထိမှန်သည် ရွာသား အမျိုးသား၂ ဦးအား လက်ရှိအခြေအနေထိ သွားရောက် ကယ်ထုတ်နိုင်ခြင်းမရှိသေးကြောင်း ၊ ကူညီကယ်ထုတ်ရန် အတွက် လက်နက်ကိုင်အဖွဲ့ အစည်းများအား ညှိနှိုင်းရန်ကြိုးစားသော်လည်း အဆင်မပြေသေးကြောင်း Dear Ranger (နမ့်လန်) လူမှု ကူညီရေး အသင်းမှ ကိုဇော်ညီညီ က သျှမ်းသံတော်ဆင့်သို့ ပြောသည်။

“ မိုင်းထိတဲ့ ၂ ဦးက အခုလွယ်ငင်းကျေးရွာ ဘုန်းကြီးကျောင်းမှာပါ။ ကျနော်တို့ ကို တောင်ပေါ် ပေးမတက်ဘူး။ ထိမှန်မှာ ကြောက်လို့ထင်တယ်။ မိုင်းထိမှန်တဲ့ ၂ အခြေအနေ သိပ်မစိုးရိမ်ရဘူးလို့ ကြားသိရပါတယ်” ဟု ကိုဇော်ညီညီ က ဆိုသည်။

မိုင်းထိမှန်သူ ၂ ဦးကို ကယ်ထုတ်ရန် အတွက် တောင်တက်လမ်းတွင် အန္တရာယ် ရှိနေသဖြင့် ပေးမတက်ကြောင်း၊ လက်ရှိမှာ မိုင်းထိမှန်သူ ၂ ဦး နေထိုင်သည့် ကျေးရွာတွင် ကျန်းမာရေး လုပ်သားရှိကြောင်းလည်း ကိုဇော်ညီညီ က ပြောသည်။

သျှမ်းလက်နက်ကိုင် ၂ ဖွဲ့သည် ဖေဖော်ဝါရီ ၂၀ ရက်မနက်ပိုင်း တွင် စတင်ကာ သီပေါမြို့နယ် နမ့်လန်မြို့ မန်လီအုပ်စု အတွင်းရှိ လွယ်ငင်းကျေးရွာ နှင့် ပါကမ်းကျေးရွာ အနီးရှိ တောင်ကြာတွင် တိုက်ပွဲများဖြစ်ပွားခဲ့ သည်။

လက်ရှိတွင် မန်လီကျေးရွာ ဘုန်းကြီးကျောင်းတွင် စစ်ဘေးရှောင် ၅၈၇ ဦး ရှိပြီး၊ အစားအသောက် အတွက် ဖူလုံ သော်လည်း အိပ်ယာ စောင်ခင်းများ လိုအပ်နေကြောင်းလည်း သိရသည်။

သျှမ်းလက်နက်ကိုင် ၂ ဖွဲ့ ကြား ဖြစ်ပွားသည် တိုက်ပွဲကြောင့် သီပေါမြို့နယ် အတွင်း စစ်ရှောင် ၁၂၀၀ ကျော် ရှိနေကြောင်း၊ သီပေါမြို့ နားမခေါ်၊ ဧဝံဂေလိ လီဆူဘုရားကျောင်း၊ နမ့်မော်ဆွေဘုန်းကြီးကျောင်း၊ ဆွန်အွိုက်ဘုန်းကြီးကျောင်း၊ ဘိုးတော်ကျောင်းနှင့် ကျင်သီ ဘုန်းကြီးကျောင်းတို့တွင်ခိုလှုံနေကြကြောင်း စစ်ရှောင် များကို ကူညီပေးနေသည့် အဖွဲ့များထံမှ သိရသည်။

သျှမ်းတပ် ၂ ဖွဲ့သည် ၂၀၁၈ ခုနှစ် နိုဝင်ဘာ လကုန် တွင် စတင်ဖြစ်ပွားခဲ့ရာ လက်ရှိ စစ်မီးမှာ ပိုမိုတင်းမာလာပြီး ပြည်သူများ ထိခိုက်မှု ပိုများလာကြောင်းလည်း လူမှုကူညီရေးအသင်းများက ပြောဆိုကြသည်။