တနိုင်ငံလုံးပစ်ခတ်တိုက်ခိုက်မှုရပ်စဲရေးစာချုပ် NCA လက်မှတ်ရေးထိုးထားသည့် သျှမ်းပြည်တပ်မတော် RCSS/SSA နှင့် ပတ်သက် ဆက်နွယ်သူများဟုစွပ်စွဲခံရကာ အဖမ်းခံရသည့် ရွာသား ၉ ဦးအား တပ်မတော်မှ အမှု ပေါင်း (၁၃) မှုဖြင့် တရားစွဲဆိုထားရသည်ဟု အမှုလိုက်ပေးနေသော တရားလွှတ်တော်ရှေ့နေ စဝ်မြဝတီက ပြောသည် ။

” ဥပဒေနဲ့အညီဆောင်ရွက်ရင်တော့လွတ်နိုင်တာပေါ့ ၊ ဒါပေမဲ့ တရားသူကြီးအပိုင်းကပြတ်ပြတ်သားသား မဆုံးဖြတ်ရဲ သေးတဲ့ အပိုင်းတွေတော့ရှိတာပေါ့ ၊ ဖြစ်စေချင်တာကတော့ NCA ကိစ္စတွေ ၊ ငြိမ်းချမ်းရေးကိစ္စတွေ လုပ်နေချိန်မှာ တရားလိုဖြစ်တဲ့ စစ်တပ်ဖက်ကနေ ကျေအေးတယ် ၊ ရုပ်သိမ်းတယ်ဆိုရင် အားလုံးအတွက်သိပ်ကောင်းသွားမှာပေါ့ ” ဟု ၄င်းကပြောသည် ။

သျှမ်းပြည်တောင်ပိုင်း ၊ ဟိုပုံးမြို့နယ် ၊ နမ့်ခုတ်ကျေးရွာအုပ်စု မှ ဒေသခံတောင်သူ ၉ ဦးအား သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် RCSS/SSA နှင့်ပက်သက်၍ ဟိုပုံးမြို့နယ်မြောက်ဘက် တွင် လှုပ်ရှားသည့် ခမရ ၄၂၄ ၊ ခလရ ၂၂၅ ၊ ခလရ ၂၄၉ တို့မှ လက်နက်မှု ၊ပို့ကုန်သွင်းကုန်ဥပဒေ ၊ ဆက်သွယ်ရေးဥပဒေနှင့် စစ်ဆင်ရေးနယ်မြေအတွင်း ၀င်ရောက်မှု ၊ ကာကွယ်ရေးဥပဒေ စသည်တို့ဖြင့် အရေးယူထားလျှက်ရှိသည် ။

အဆိုပါဖမ်းဆီးခံထားရသူ (၉) ဦးအနက် အသက် (၁၂) အရွယ်ကျောင်းသားငယ် တစ်ဦးပါရှိပြီး ယင်းကျောင်းသားအား ဆက်သွယ်ရေးဥပဒေဖြင့် တရားစွဲဆိုထားခြင်းဖြစ်သည်ဟု သိရသည် ။

“၁၂ နှစ်ဘဲ ရှိသေးတယ်။ ကလေးက။ ဘာမှ သိတာမဟုတ်ဘူး။ တရားရုံးကို သွားသွားနေရတော့ ကျောင်းတက်ပျက်ကွက်တယ်။ အမှန် တော့ ကလေးဆိုတာ အနာဂါတ်တိုင်းပြည်အတွက် လူကြီးဘဲ။ မဟုတ်တာ လုပ်မိတယ်လို့ အကျင့်စာရိတ္တ ပိုမိုကောင်းမွန်လာ အောင် လျှောက်နေတဲ့ လမ်းဖြောင့်မတ်မှန်ကန်အောင် အဘက်ဘက်က ၀ိုင်းဝန်းပြုပြင်ပေးရမယ်လေ” – ဟု အမျိုးတော်စပ်သူ တဦးကပြောသည်။

လက်ရှိတွင် တရားခံဘက်မှစစ်ချက်တစ်ဝက်နီးပါးပြီးမြောက်ထားပြီး ရုံးချိန်းပေါင်း (၁၅) ကြိမ် ၀န်းကျင်ရှိပြီဖြစ်ကာ အချိန်အားဖြင့် ခြောက်လနီးပါးကြာမြင့် ပြီးဖြစ်သည်ဟု စဝ်မြဝတီကပြောသည် ။

“ငြိမ်းချမ်းရေး ဒီဆောက်နေတဲ့အချိန်မှာ ရွာသားတွေကို နိုင်ငံရေးဓါးစာခံအဖြစ် မလုပ်သင့်ဘူး။ RCSS ဆိုတာ ကလဲ တနိုင်ငံလုံး အပစ်ခတ်ရပ်စဲ ရေးစာချုပ်လက်မှတ်ရေးထိုးထားတဲ့အဖွဲ့တွေဆိုတော့ ငြိမ်းချမ်းရေးဖြစ်စဉ် နဲ့ မကိုက်ညီဘူး။ နိုင်ငံတော် အစိုးရမှာ လဲ တာဝန်ရှိတယ်။ အဖမ်းခံထားရတဲ့ ရွာသားတွေ ချွန်းချက်မရှိ အမြန်လွတ်ပေးသင့်တယ် – ဟု သျှမ်းလူ့အခွင့်အရေးမဏ္ဌိုင်က စိုင်းဟော်ဆိုင်ကပြောသည်။

၂၀၁၇ ဂျူလိုင်လတုန်း က ဖမ််းဆီးခံထားရသည့် ဟိုပုံးကျေးလက်ဒေသခံ ၉ ဦးမှာ နားပုံကျေးရွာအုပ်စု နမ့်ခုတ်ရွာသား ၃ ဦး၊ နမ့်ပါခီးကျေးရွာအုပ်စု ၀မ့်ခုတ်လောင်းရွာသား ၂ ဦး နှင့် ၀မ့်ခိုတောင်းရွာသား ၂ ဦး ၊ လိုင်ဆတ်ကျေးရွာအုပ်စု ၀မ့်မတ်လန်း ရွာသား ၁ ဦး၊ မိုင်းပြင်းကျေးရွာအုပ်စု ၀မ့်ကွန်ကွန်း ရွာသး ၁ ဦး တို့ဖြစ်ကြသည်။