သျှမ်းပြည် တောင်ပိုင်း နှင့် မြောက်ပိုင်း နယ်စပ်တွင် RCSS နှင့် SSPP တိုက်ပွဲဖြစ်မှုကြောင့် စစ်ဘေးရှောင် ၅၀၀ ကျော်နှင့်မိုင်းထိမှန်သူ ၂ ဦး ရှိကြောင်း သိရသည်။

ဖေဖော်ဝါရီလ ၂၀ ရက်မနက်ပိုင်းကဖြစ်ပွါးသော တိုက်ပွဲသည် သီပေါမြို့နယ် နမ့်လန်မြို့ မန်လီအုပ်စုအတွင်းရှိ လွယ်ငင်းကျေးရွာ နှင့် ပါကမ်းကျေးရွာ အနီးတွင် တောင်ကြောတွင်ဖြစ်ပွါးခဲ့ခြင်းဖြစ်ကြောင်းသိရသည်။

တိုက်ပွဲကြောင့် စစ်ဘေးရှောင် ၅၂၀ ကျော်သည် သျှမ်းပြည် မြောက်ပိုင်း နမ့်လန်မြို့နယ် မန်လီကျေးရွာ ဘုန်ကြီးကျောင်းတွင် လာရောက်ခိုလှုံနေကြပြီး၊ မိုင်းထိမှန်သည့် အမျိုးသား ၂ ဦးအား နယ်စည်းမခြားနှင့် Dear Ranger (နမ့်လန်) လူမှု ကူညီရေး အသင်းတို့မှ ကူညီကယ်ထုတ်ရန်ကြိုးစားနေကြောင်း သိရသည်။

“ စစ်ရှောင်တွေအတွက်တော့ စားဝတ်နေရေး လိုအပ်နေပါတယ်။ ကျနော်တို့ ဘက်ကတော့ တတ်နိုင်သလောက် လှူဒါန်းထားပါတယ်။ နောက်မိုင်းထိတဲ့ ၂ ဦးကို အမြန်ဆုံးကယ်ထုတ်နိုင်ဖို့ ကျနေ်ာတို့ ကြိုးစားနေကြပါတယ်” ဟု Dear Ranger (နမ့်လန်) လူမှု ကူညီရေး အသင်းမှ ကိုဇော်ညီညီ ကပြောသည်။

မိုင်းထိမှန်သည့် အမျိုးသား၂ ဦးသည် လက်ရှိ တိုက်ပွဲဖြစ်ပွားနေသည့် မန်လီအုပ်စုမြောက်ဘက် လွယ်ငင်း ကျေးရွာ ဘုန်းကြီးကျောင်းတွင် စောင့်ဆိုင်းနေကြကြောင်း ကိုဇော်ညီညီ က ဆိုပါသည်။

တိုက်ပွဲဖြစ်သည့် နေရာသည် လွင်ငင်းကျေးရွာ နှင့် တမိုင်အကွာတွင်သာ ရှိကြောင်း သီပေါ၊ မိုင်းကိုင်၊ ကျေးသီး ထိစပ်ရာ တောင်ကြောတွင်ဖြစ်ကြောင်း သိရသည်။

သျှမ်းတပ် ၂ဖွဲ့သည် ၂၀၁၈ ခုနစ် နိုဝင်ဘာ လကုန် တွင် စတင်ဖြစ်ပွားခဲ့ရာ လက်ရှိ စစ်မီးမှာ ပိုမိုတင်းမာလာပြီး ပြည်သူများ ထိခိုက်မှု ပိုများလာကြောင်းလည်း လူမှုကူညီရေးအသင်းများက ပြောဆိုကြသည်။