သျှမ်းပြည်တောင်ပိုင်းလဲချားမြို့နယ်အတွင်း နမ့်တောင်းရေသွယ်တန်းပေးဝေမှုအတွက် သျှမ်းပြည်နယ်အစိုးရလုပ်ဆောင် နေသော်လည်း ရေအမှန်တကယ်လိုအပ်နေသော ကျေးလက်များနှင့် တောင်ကုန်းပေါ်ရှိ ဒေသခံများ မှာယနေ့တိုင်ရေအခက်အခဲ ရှိနေသေးသည်ဟုသိရသည်။
လက်ရှိတွင် လဲချားမြို့တွင်းသို့ နမ့်တောင်းချောင်းရေ သွယ်တန်းပေးဝေရေးအတွက် အစိုးရလုပ်ဆောင်နေသည့် ကိစ္စနှင့်ပတ်သက်ပြီး လဲချားမြို့နယ် ပြည်နယ်လွှတ်တော်ကိုုယ်စားလှယ် စိုင်းကျော်ဇေယျက ဖေဖော်ဝါရီလ ၁၁ ရက်နေ့ ကကျင်းပသော လွှတ်တော် အစည်းအဝေးတွင် မေးမြန်းရာ သျှမ်းပြည်နယ်အစိုးရ စည်ပင်သာယာရေးဝန်ကြီး စိုင်းစွံဆိုင်းက ရေသန် ့စင်မှု အားထပ်မံစစ်ဆေးဦးမည်ဟုပြောဆိုဖြေကြားခဲ့သည်။
“ရေတကယ်လိုအပ်တဲ့နေရာတွေမှာ ရေပိုက်သွယ်တန်းမှုက မရောက်ဘူး။ ရေပေါများတဲ့မြို့တွင်းရပ်ကွက်တွေမှာ သွယ်တန်းထားပေးတယ်။ ဒီစီမံကိန်းလုပ်ဖို့ ဒေသတွင်း လွှတ်တော်ကိုယ်စားလှယ်တွေနဲ့လည်း မတိုင်ပင်ဘူး။ အချိန် ၆ နှစ်ကြာပြီ။ တကယ်တမ်းပြောရရင် လဲချားမြို့ထဲမှာ ရပ်ကွက် ၃ ခုဘဲရှိတယ် ရေအခက်အခဲရှိတာ။ ဒီရပ်ကွက်တွေကို အရင်ဆုံးရေပေးဝေစေချင်တယ်။” – လဲချားမြို့နယ် ပြည်နယ်လွှတ်တော်ကိုယ်စားလှယ် စိုင်းကျော်ဇေယျ က သျှမ်းသံတော်ဆင့်အားပြောသည်။
အမှန်တကယ်ရေအခက်အခဲရှိနေသော ရွာများမှာ ကုန်းပေါ်ရှိနေအိမ်များ၊ ရပ်ကွက်၄ ၊ နောင်တောင်းရွာ တို့ရှိဒေသခံလူတို့များဖြစ်ကြောင်းသိရသည်။
နမ့်တောင်းချောင်းမှရေကို လဲချားမြို့သို့ ၂၀၁၂ ခုနှစ်ကတည်းက သျှမ်းပြည်နယ်အစိုးရက သွယ်တန်း ပေးခဲ့သည်။ ငွေကျပ်သိန်းပေါင်း ၆,၀၀၀ ကျော် သုံးစွဲခဲ့ပြီး ၆ နှစ်ကျော်ကြာ ရေပိုက်သွယ်တန်းသော်လည်း လုပ်ငန်းမပြီးပြတ်သေးကြောင်း စီမံကိန်း အမြန်ဆုံးပြီးမြောက်ဖို့ သျှမ်းပြည်နယ်အစိုုးရက သိန်း ၄၀၀ ထပ်မံ ချပေးမည်ဖြစ်ကြောင်းဖြေကြားသည်ဟု သိရသည်။
“နောက်တခုက ရေပိုက်သွယ်တုုန်းက လမ်းတွေပျက်စီးသွားတာ အစိုးရအနေနဲ့ လဲချားလူထုကို ဘယ်လိုလုပ်ပေးမလဲ။ ဒါတွေကိုမေးပါတယ်။ နမ့်တောင်းချောင်းရေကို သောက်သုံးရေအဖြစ်လုပ်မယ်။ နမ့်တောင်းချောင်းဖျားမှာ တောင်ယာခြံတွေ လုပ်တယ်။ တောင်ယာခြံလုပ်တာ ပေါင်းသတ်ဆေးပိုးသတ်ဆေးအများကြီး သုံးကြတယ်။ ဒါတွေဟာ နမ့်တောင်းချောင်း ထဲ စီးဝင်လာနိုင်တယ်။ ဒါကြောင့် နမ့်တောင်းချောင်းဟာ သောက်သုံးနိုင်ရဲ့လားလို့မေးတယ်။ အဲတာ ၀န်ကြီးကနေ နမ့်တောင်း ချောင်းရေ သောက်သုံးဖို့ သင့်/မသင့်ကို နောက်ထပ်စမ်းသပ်စစ်ဆေးမယ်လိုဖြေကြားသွားပါတယ်”- ဟု စိုင်းကျော်ဇေယျ က ပြောသည်။
လဲချားမြို့တွင် လူဦးရေ ၆ သောင်းကျော်ရှိပြီး သောက်ရေသုံးရေအတွက် ရေတွင်းနှင့်အဝီစိတွင်းတူးဖော်ကာ အသုံးပြုကြသည်။ စိုက်ပျိုးရေးအတွက် နောင်ခမ်းကန်မှရေကိုလည်းကောင်း နမ့်တိန်းချောင်းမှရေကို လည်းကောင်းအသုံးပြုကြသည်။
မြို့တွင်းရပ်ကွက် အိမ်တိုင်းက သူ့ဟာနဲ့သူရေတွေက လုံလောက်နေတော့ အသုံးမလိုဘူးလေ။ အခုလုပ်ပေးတဲ့ဟာက မီတာပါတပ်ထားမယ်သုံးသလောက်လည်းပေးရမယ်ဆိုတော့ ဘယ်သူမှ မသုံးဘူး။ ရေလုံးဝမထွက်တဲ့ ရွာတွေကိုသွားပေးရမှာ။ အဲ့ဘက်ကိုမရောက်ဘူး။ လူမြင်သာတဲ့နေရာဘဲလုပ်ထားတာကိုး -ဟုလည်း လဲချားဒေသခံ တဦးကပြောသည်။
သျှမ်းပြည်နယ်လွှတ်တော် ပုံမှန်အစည်းအဝေးကို ဖေဖော်ဝါရီလ ၈ ရက်၊ ၁၁ ရက်၊ ၁၃ ရက်နှင့် ၁၄ ရက်တို့တွင် ကျင်းပခဲ့ပါသည်။ နမ့်တောင်းချောင်းသည်လဲချားမြို့အနောက်ဘက်မှပတ်စီးဆင်းကာ လဲချားမြို့ အရှေ့တောင်ဘက်ရှိ နမ့်တိန်းချောင်းအတွင်းသို့စီးဝင်ကြောင်းသိရပါသည်။
