သျှမ်းပြည်မြောက်ပိုင်းကျောက်မဲမြို့နယ်အတွင်း တိုင်းရင်းသားလက်နက်ကိုင်တပ်ဖွဲ့ အချင်းချင်းပစ်ခတ်တိုက်ခိုက် စစ်ရေးတင်းမာမှုများကြောင့် ကျောက်မဲသို့ စစ်ဘေးရှောင် ၁၀၀၀ ကျော်ရှိပြီဖြစ်ကြောင်းသိရသည်။
ဖေဖော်ဝါရီလ ၉ ရက်နေ့ကစပြီး နားပုံ၊ နားပိန်း၊ ကောင်းဟုန်း၊ နားခွန်၊ လွယ်မွန်း၊ နမ့်ပျဉ်၊ ပန်လော့ ၊ခေါက်ဝိုးရွာများမှဒေသခံ ၄၀၀ ခန့် ကျောင်းယွက်ကျောင်းတိုက်သို့ လည်းကောင်း၊ ၃၀၀ ခန့်မှာ အောင်ဆုပန်ကျောင်းတိုက်သို့ လည်းကောင်း၊ ၆၀ ကျော်မှာ နမ့်ကျိတ်လင်းသို့လည်းကောင်း၊ ရောက်ရှိခိုလှုံနေကြကြောင်းသိရသည်။
“နီးစပ်ရာဆွေမျိုးတွေထံမှာခိုလှုံနေကြတဲ့သူတွေအပါအဝင်ဆိုရင် ဒီနေ့ဆိုရင် ၁၀၀၀ ကျော်ရှိတယ်။ တိုက်ပွဲက ပန်လော့အုပ်စု ဝမ်နမ့်ပျဉ်ရွာနားမှ စဖြစ်တယ်။ စစ်မြေပြင်နဲ့နီးတဲ့ရွာတွေဆိုရင်လည်း ကြိုတင်ထွက်ပြေးလာတာရှိတယ်။ လောလောဆယ်တော့ စစ်ဘေးရှောင်တွေကို ရှိတဲ့ရံပုံငွေလေးနဲ့ ကူညီပေးနေပါတယ်။” – ဟု ကျောက်မဲမြို့နယ် ပြည်နယ်လွှတ်တော်ကိုယ်စားလှယ် စိုင်းထွန်းဝင်း ကသျှမ်းသံတော်ဆင့်အားပြောသည်။
ကျောက်မဲမြို့နယ်အတွင်း မြောက်ပိုင်းမဟာမိတ်တပ်ဖွဲ့ဝင် SSPP နှင့် TNLA တို့ပူးပေါင်းထားသည့် တပ်ဖွဲ့နှင့် RCSS/SSA တို့အကြား သျှမ်းပြည်အမျိုးသားနေ့နောက်ပိုင်း တိုက်ပွဲများဆက်တိုက်ဖြစ်ပွါး လာခဲ့ရာ ယနေ့တိုင် ၆ ရက်မြောက်ရှိပြီဖြစ်ပြီး ၂ ဖက် ၂ တန် စစ်အင်အားဖြည့်တင်းမှုမပြတ်ရှိနေ သေးသဖြင့် ရက်ရှည်တိုက်ပွဲဖြစ်ပွါးမည်ကိုစိုးရိမ်ကာ ဒေသခံများ နေရပ်မှထပ်မံစွန့်ခွါနေကြ ကြောင်းသိရသည်။
“မပြင်းထန်ပေမယ့် တိုက်ပွဲက နေ့တိုင်း ဖြစ်နေတယ်။ ဒီမနက်လည်း နမ့်ဖတ်၊ အက်ကီးရွာဘက်မှာ ချနေကြတယ်။ သူတို့အချင်းချင်းချတာမကဘူး ဒီမနက် ဗမာစစ်ကြောင်းတွေ ထပ်တက်သွားတယ်။ ရွာမှာဘယ်သူကနေရဲတော့မလဲ ” – ဟု ကျောက်မဲရောက် စစ်ရှောင် ပါ့နန်း ကပြောသည်။
ကျောက်မဲမြို့နယ်အတွင်း အစိုးရတပ်၊ မြောက်ပိုင်းမဟာမိတ်တပ်ဖွဲ့နှင့် RCSS/SSA တို့လှုပ်ရှားပါသည်။
