ဒီဗီဘီ ရုပ်မြင်သံကြားအစီအစဉ် အပြောင်းအလဲကြောင့် တိုင်းရင်းသားဘာသာရုပ်သံသတင်းနှင့် ဆောင်းပါးအစီအစဉ်(ELTV)လည်း အချိန်ပြောင်းလဲထုတ်လွှင့်သွားမည်ဖြစ်ကြောင်း သိရသည်။

၂၀၁၉ ဖေဖော်ဝါရီလမှစပြီး ဒီဗီဘီရုပ်မြင်သံကြားတွင် အပတ်စဉ် အလှည့်ကျ တင်ဆက်နေသော တိုင်းရင်းသားဘာသာ ၈ မျိုး ( ကချင်၊ ကယား၊ ကရင်၊ ချင်း၊ မွန်၊ ဗမာ ၊ ရခိုင်၊ သျှမ်း) တို့၏ အစီအစဉ်များအားလည်း ထုတ်လွှင့်နေသော မူရင်းအချိန်မှ ရွှေ့ဆိုင်းထုတ်လွှင့်ရမည်ဖြစ်သည်ဟု တိုင်းရင်းသားဘာသာရုပ်မြင်သံကြားအစီအစဉ် ELTV ၏ Assistant Producer နန်းမွေခေါဝ် က ပြောသည်။

“အစီအစဉ်ပြောင်းလဲထုတ်လွှင့်မယ်ဆိုတဲ့အကြောင်း ဒီဗီဘီက မနေ့ကမှ အကြောင်းကြားလာပါတယ်။ တီဝီအစီအစဉ်အချိန်တွေပြောင်းလို့ တိုင်းရင်းသားအစီအစဉ်လည်း လိုက်ပြီးပြောင်းလဲပါတယ်”- ဟု ပြောသည်။

ယခင်က ဒီဗီဘီ တိုင်းရင်းသားဘာသာအစီအစဉ်မှ သျှမ်းဘာသာရုပ်သံအစီအစဉ်အား အင်္ဂါနေ့မနက် ၇ နာရီ ၁၅ မိနစ်တွင်တကြိမ်၊ ည ၉ နာရီ ၄၅ မိနစ်တွင်တကြိမ် ထုတ်လွှင့်ခဲ့သည်။ ဖေဖော်ဝါရီလဆန်းပိုင်းမှစပြီး  သျှမ်းဘာသာရုပ်သံအစီအစဉ်အား အင်္ဂါနေ့ညပိုင်း ၉ နာရီ ၁၅ မိနစ်တွင်တကြိမ် ၊ ဗုဒ္ဓဟူးနေ့မနက်ပိုင်း ၇ နာရီ ၁၅ မိနစ်တွင်တကြိမ် ဒီဗီဘီ ရုပ်သံလိုင်းမှ ထုတ်လွှင့်ပေးသွားမည်ဖြစ်ကြောင်း သိရသည်။

တိုင်းရင်းသားဘာသာ ရုပ်သံအစီအစဉ် ELTV အား နိုင်ငံတကာ မြန်မာ့သတင်း Burma News International (BNI) မှ စီစဉ်ပေးမှုဖြင့် DVB  Democratic Voice of Burma ဒီမိုကရက်တစ်မြန်မာ့အသံ ရုပ်သံလိုင်းတွင်  ၂၀၁၅ ခုနှစ်က စတင်ထုတ်လွှင့်ခဲ့သည်။ တိုင်းရင်းသားဘာသာတခုလျှင် သတင်းနှင့်ဆောင်းပါးအစီအစဉ် ၁၃ မိနစ်ခန့် တရက်စီ အချိန်ပေး ထုတ်လွှင့်ပေးခဲ့သည်။ သျှမ်းဘာသာ သတင်းနှင့်ဆောင်းပါးရုပ်သံအား  သျှမ်းသံတော်ဆင့်သတင်းဌာနမှ တာဝန်ယူထုတ်လုပ်ခဲ့ပါသည်။