စစ်ခေါင်းဆောင် မင်းအောင်လှိုင် စီးပွားရေး သင်ခန်းစာ ဟောပြော ပို့ချနေသည့် ရုပ်သံဖိုင်ကို ယခုရက်ပိုင်း အတွင်း စစ်တပ် ထောက်ခံသူများက လူမှုကွန်ရက်များတွင် ပြန်လည်မျှဝေ၍ လှောင်ပြောင်နေသည်ကို တွေ့ရသည်။

အဆိုပါ ရုပ်သံဖိုင်၌ စစ်ခေါင်းဆောင် မင်းအောင်လှိုင်က စစ်အရာရှိကြီးများအား စီးပွားရေး သင်ခန်းစာ ဟောပြော ပို့ချနေသည်ကို တွေ့ရပြီး နိုင်ငံ့ စီးပွားရေး ဖွံ့ဖြိုးတိုးတက်ရေး အတွက် လျှပ်စစ်မီး၊ ဆက်သွယ်ရေး၊ သယ်ယူပို့ဆောင်ရေးနှင့် လူသားအရင်အမြစ် စသည့် အချက် ၄ ချက် အလွန်အရေးကြီးသည်ဟု ဆိုသည်။

“လျှပ်စစ်ဓာတ် မရှိရင်ဘာမှလုပ်လို့မရဘူး။ နိုင်ငံဖွံ့ဖြိုးရေးလုပ်လို့မရဘူး၊ လုပ်မယ်ဆိုရင်တောင် အခက်အခဲ ကြီးမားမယ်၊ စရိတ်စက ကြီးမားမယ်” ဟု စစ်ခေါင်းဆောင်က ဆိုသည်။

ယင်ရုပ်သံမှတ်တမ်းသည် ၂၀၂၁ ခုနှစ် စစ်တပ် အာဏာမသိမ်းမီ စစ်ခေါင်းဆောင် မင်းအောင်လှိုင် စစ်တပ်ကို လိုက်လံ စည်းရုံးနေသည့် ကာလက နေပြည်တော်ရှိ နိုင်ငံတော် ကာကွယ်ရေး တက္ကသိုလ် တက်ရောက်နေသည့် သင်တန်းသား စစ်အရာရှိများကို ဟောပြောသည့် ရုပ်သံ ဖြစ်ကြောင်း စစ်ရေးသတင်းရင်းမြစ်က ဆိုသည်။

“ကျနော် မှတ်မိသလောက်က အာဏာမသိမ်းခင်လေး စည်းရုံးရေးဆင်းတဲ့ ရုပ်သံဖိုင်ပါ။ အဲဒီကာလက နိုင်ငံရေး၊ စီးပွားရေး၊ လူမှုရေး ဟောပြောတာတွေကို အပိုင်းလိုက် ဖြန့်ခဲ့တာ ရှိပါတယ်။ အချိန်ကာလ ကျနော် အမှတ်မှားတာလည်း ဖြစ်နိင်တယ်” ဟု ၄င်းကရှင်းပြသည်။

အဆိုပါ ရုပ်သံမှတ်တမ်းတွင် စစ်အရာရှိများ နှာခေါင်းစည်းတပ်ထားသည်ကိုလည်း တွေ့ရသည် ဖြစ်ရာ ရွေးကောက်ပွဲ အပြီး စစ်တပ် အာဏာမသိမ်းမီ ကိုဗစ်ကက်ရောဂါ အတန်ငယ် ငြိမ်သက်နေသည့် ကာလဟု ယူဆရသည်။

လက်ရှိ လျှပ်စစ်မီးပြတ်တောက်၍ တနိုင်ငံလုံး မှောင်မဲ နေကာ စစ်ပွဲများတွင် ရှုံးနိမ့်နေစဥ် စစ်တပ် ထောက်ခံသူများက ၄င်းရုပ်သံဖိုင်ကို လူမှုကွန်ရက် အသီးသီးတွင် ပြန်လည် ဖော်ပြ လှောင်ပြောင် မျှဝေနေသည်ကိုလည်း တွေ့ရသည်။

အကျင်ပျက် ခြစားမှု၊ သားနှင့် သမီး၏ လောဘတကြီး အခွင့်အရေး အလွဲသုံးစား စီးပွားရှာဖွေမှုများဖြင့် နာမည်ပျက်နေသည့် စစ်ခေါင်းဆောင်မင်းအောင်လှိုင် သည် လက်ရှိ စစ်ရှုံးနေစဥ◌်မှာပင် ပွဲလမ်းများ တက်ရောက်၍ စီးပွားရေး ဆိုင်ရာ ကိစ္စရပ်များသာ အလေးထား ပြောဆိုနေရာ စစ်တပ်ထောက်ခံသူများကြား ဝေဖန်မှုများစွာ ရှိနေသည်။

ယခင် ဗိုလ်ချုပ်မှူးကြီးသန်းရွှေ အုပ်စိုးစဥ် ကာလက စစ်ဗိုလ်ချုပ်များအဖြစ် အရေးကြီး တာဝန် ပေးအပ်ခံရရေး အတွက် မဖြစ်မနေ တက်ရောက်ရသည့် နိုင်ငံတော် ကာကွယ်ရေး တက္ကသိုလ်တွင် စစ်ခေါင်းဆောင် မင်းအောင်လှိုင် သည် ကျောင်းအုပ်အဖြစ် တာဝန် ထမ်းဆောင်ခဲ့ဖူးသူ ဖြစ်သည်။