ထိုင်းနိုင်ငံ ဗုဒ္ဓဘာသာ သာသနာတော်ပျံ့ပွါးရေး ဆောင်ရွက်နေသည့် အဖွဲ့အစည်းများစုပေါင်းကာ သာသနာတော်ပျံ့ပွါးရေးအတွက်ဆောင်ရွက်နေသည့် သံဃာတော်များလူပုဂ္ဂိုလ်များအား Moral Award ဆုချီးမြှင့်ရာတွင် သျှမ်းပြည်သား ၅ ဦးလည်း ပါဝင်ကြောင်းလည်းသိရသည်။
ဆုပေးပွဲအခမ်းအနားအား ထိုင်းနိုင်ငံ နခွန်းပထုမ်းခရိုင် နခွန်းပထုမ်းမြို့နယ် ဗုဒ္ဓမွန်းထွန်း ခန်းမတွင် ကျင်းပရာ နတ်ရွာစံသွားသည့် ထိုင်းဘုရင်ကြီး၏ ဝမ်းကွဲညီမ ကိုယ်တိုင်ဆုချီးမြှင့်ခဲ့ကြောင်း သိရသည်။
ဆုလက်ခံရရှိသည့် တောင်ကြီးမြို့ ဗုဒ္ဓတက္ကသိုလ်မှ ဆရာတော်နော်ခမ်းလှ ဓမ္မသာမိ က- “သာသနာတော်ပျံ့ပွါးရေး၊ လူမှုရေး၊ ပညာရေး နိုင်ငံရေး စီးပွါးရေးတွေမှာ စေတနာရင်းခံပြီး လှုပ်ရှားဆောင်ရွက်နေတဲ့လူပုဂ္ဂိုလ်တွေအဖွဲ့အစည်းတွေကို ပေးအပ်ချီးမြှင့်တဲ့ဆုဖြစ်ပါတယ်။ ဘယ်နကြိမ်မြောက်လဲဆိုတာကတော့ သူတို့လည်းမပြောပြဘူး။ ဒီဆုကိုလက်ခံဖို့အရည်အချင်းပြည့်တဲ့ လူပုဂ္ဂိုလ်တွေနဲ့သင့်တော်တဲ့အရေအတွက် ရှာတွေ့တဲ့အချိန်မှာ ဒီဆုကိုချီးမြှင့်တယ်လို့တော့ ပြောပါတယ် ” – ဟု မိန့်တော်မူသည်။
အဆိုပါအခမ်းအနားတွင် ဆုလက်ခံရရှိသူ ထိုင်းနိုင်ငံသားများအပြင် နိုင်ငံပေါင်း ၃၀ ကျော်မှ လူ ပုဂ္ဂိုလ်များ အဖွဲ့အစည်းများ ရာနှင့်ချီရှိကြောင်း၊ ထိုအနက် မြန်မာနိုင်ငံသားများလည်းပါဝင်ပြီး သျှမ်းပြည်သားမှာမူ ဆရာတော်အပါအဝင် ၅ ဦးပါဝင်ကြောင်း ဆုလက်ခံရရှိသည့် ယိင်းလောဝ်အွန် ကပြောသည်။
“ ယိင်းတို့ သျှမ်းထဲမှာ ၅ ဦးလက်ခံရရှိပါတယ်။ ဆရာတော် စဝ်နော်ခမ်းလှ ရယ်၊ ရှမ်းပြည်နယ်စွန့်ဦး တီထွင် အမျိုးသမီးလုပ်ငန်းရှင် Women Entrepreneur Working Group Shan State WEWG အသင်းဥက္ကဌ ဆရာမဒေါ်နန်းမိုမိုသီတာ ရယ်၊ သုဇာတာ နန်းကလျာရှမ်းဓမ္မစကြာအဖွဲ့ ဥက္ကဌ ဒေါ်နန်းခမ်းဖောင် ရယ်၊ နောက်ပြီးတော့ ကျိုင်းတုံမြို့က ဒေါ်နန်းမြင့်မြင့်စိုးရယ်၊ နောက်ပြီးတော့ ကျမ ယိင်းဆိုင်အွန် ရယ်ပေါ့။ သာသနာအကျိုးပြုလုပ်ငန်းတွေမှာအစဉ်လိုက်ပါကူညီဆောင်ရွက်ခြင်းကြောင့် ဆုပေးတာလို့ပြောပါတယ် ” – ဟု ဆုလက်ခံရရှိသည့် သျှမ်းပြည်တောင်ပိုင်း ညောင်ရွှေမြို့မှ ယိင်းလောဝ်အွန် ကသျှမ်းသံတော်ဆင့်အားပြောသည်။
ပြီးခဲ့သည့် ၂၀၁၈ နှောင်းပိုင်းကလည်း ထိုင်းနိုင်ငံရှိလူမှုအကျိုးပြုအဖွဲ့အစည်းများစုပေါင်းကာ စံပြလူပုဂ္ဂိုလ်များအားဆုချီးမြှင့်ရာတွင်လည်း သျှမ်းပြည်သား ၃ ဦး ရွေးချယ်ဆုချီးမြှင့်ခံခဲ့ရပါသည်။