၇၂ နှစ်မြောက် သျှမ်းပြည်အမျိုးသားနေ့အထိမ်းအမှတ်အဖြစ် သျှမ်းပြည်မြောက်ပိုင်း သီပေါမြို့နယ် နမ့်လန်မြို့ မြို့အဝင်အထွက် ဆိုင်းဘုတ်အား ဖွင့်လှစ်ခြင်းအခမ်းအနားပြု လုပ်ခဲ့ကြောင်းသိရသည်။

အဆိုပါဖွင့်ပွဲသို့ ဆိုင်းဘုတ်အားတာဝန်ယူဆောက်လုပ်ပေးသည့် ကုမ္မဏီ၊ မြို့နယ်စည်ပင်သာယာ ဦးစီးဌာနမှ တာဝန်ခံအင်ဂျင်နီယာ ဦးပြည့်ဖြိုးဟိန်း၊ မြို့နယ်အုပ်ချုပ်ရေးဌာန၊ မြို့မိမြို့ဖများ ဒေသခံများနှင့် သျှမ်းစာပေယဉ်ကျေးမှုအဖွဲ့၊ သံဃာတော်များ တက်ရောက်ခဲ့ကြသည်။

ဆိုင်းဘုတ်ထောင်ရေးတွင်ပါဝင်ဦးဆောင်ခဲ့သူ စိုင်းဆာမ်လျန်းက – “ကျနော်တို့လုပ်ထားတဲ့ ဆိုင်းဘုတ်ကတော့တခြားမြို့ကဆိုင်းဘုတ်နဲ့မတူတာတချက်ရှိတယ်။ နမ့်လန် မြို့နာမည်ကိုစာလုံးအကြီးကြီးနဲ့ရေးထားတယ်။ ကျန်တာဘာမှမရေးဘူး။ ဥပမာ ကြိုဆိုပါ၏ ။ နှုတ်ခွန်းဆက်ပါ၏ တို့ဘာတို့ထည့်မရေးဘူး။ ရှုပ်ယှက်ခတ်ကုန်မှာစိုးလို့လေ ”- ဟု သျှမ်းသံတော်ဆင့်အားပြောသည်။

ဆိုင်းဘုတ်အား ၂၀၁၈ ခုနှစ် အောက်တိုဘာလ ၆ ရက်နေ့ကစတင်တည်ဆောက်ခဲ့သည်။  ဆိုင်းဘုတ်ပုံစံ ၊ စာလုံးအပြင်အဆင်တို့အား အုပ်ချုပ်ရေးပိုင်းနှင့် ရပ်မိရပ်ဖများက ဆွေးနွေးသဘောတူပြီး သျှမ်းပြည်အလှ ကုမ္မဏီက ၄ လအကြာအချိန်ယူတည်ဆောက်ခဲ့ သည်။

နမ့်လန်မြို့အဝင်အထွက် ဆိုင်းဘုတ်သည် သျှမ်းစာ ၊မြန်မာစာ  နှင့်အင်္ဂလိပ်စာတို့ဖြင့်ရေးသားထားပါသည်။ ဆိုင်းဘုတ် အကျယ်က ပေ ၂၀ ပတ်လည်ရှိပြီး  အုဋ်ခုံမှာ  အလျား ၁၅ ပေ အနံ ၉ ပေရှိကြောင်း၊  ဆိုင်းဘုတ်ပြား  ၁၃ ပေကျယ်ကြောင်း၊ အမြင့်  ၁၀ ပေရှိပြီး ဆိုင်းဘုတ်အထူမှာ   ၂ ပေ ရှိကြောင်းသိရပါသည်။

မြို့အဝင် အထွက်  ဆိုင်းဘုတ် ၂ နေရာလုံးကို တရက်တည်းတပြိုင်တည်းပြုလုပ်ခဲ့ပြီး စုစုပေါင်းငွေကျပ်သိန်း ၁၀၀ ခန့် ကုန်ကျခဲ့ကြောင်းလည်းသိရပါသည်။       ( Source : Naw Seng Jai )