သျှမ်းပြည် လားရှိုးခရိုင်၊ လားရှိုးမြို့နယ် အတွင်းရှိ ဒေသခံများ ကိုယ်ထူကိုယ်ထ ဆောက်လုပ်ထားသည့် တအာင်း စာပါ ရွာအဝင် ဆိုင်းဘုတ် ၃ ခုကို စစ်ကောင်စီတပ်ဖွဲ့က ထပ်မံ ဖျက်ဆီးလိုက်ကြောင်း စုံစမ်းသိရသည်။

ယမန်နေ့ ဇွန်လ ၁၃ ရက်နေ့တွင် လားရှိုးမြို့နယ် ခေးနင်းကျေးရွာအုပ်စု ခေးနင်းရွာ၊ ပိန်းညောင် နှင့် စံဖြတ်ရွာ တို့မှ ရွာအဝင် ဆိုင်းဘုတ်များကို စစ်ကောင်စီက လာရောက် ဖျက်ဆီးလိုက်ခြင်း ဖြစ်ကြောင်း ဖြစ်စဥ်ကို သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

“မနက်ပိုင်းမှာ ခေးနင်းရွာက ဆိုင်းဘုတ်ကို ဖျက်ဆီးပြီး ပြန်သွားကြတယ်၊ မွန်းလွဲပိုင်းမှာ နောက်တစ်ခေါက် ပြန်လာပြီးတော့ ပိန်းညောင်ရွာ နဲ့ စံဖြတ်ရွာက ဆိုင်းဘုတ်ကို ထပ်ဖျက်ဆီးတယ်။ မနေ့က တစ်နေ့တည်းကို ၃ ခု ဖျက်ဆီးသွားတယ်။ စစ်ယူနီဖောင်း နဲ့ သေနတ်တွေနဲ့ စစ်သားအင်အား ၃၀ နီးပါးလောက်ရှိတယ်” ဟု ဖြစ်စဥ်ကို သိရှိသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

ယင်းကဲ့သို့ ကျေးရွာ ဆိုင်းဘုတ်များကို ဖျက်ဆီးပြီးသည့် စစ်ကောင်စီ တပ်ဖွဲ့သည် ရွာလူကြီး နှင့် တွေ့ဆုံပြီး အထက် အမိန့်အရ လာရောက်လုပ်ဆောင်ရခြင်းသာ ဖြစ်ကြောင်း ပြောဆိုခဲ့သည်ဟု ရွာသားများက သျှမ်းသံတော်ဆင့်ကို ဆက်ပြောသည်။

လက်ရှိတွင် လားရှိုးမြို့နယ်အတွင်းမှ တအာင်းစာပါသည့် ကျေးရွာဆိုင်းဘုတ်များ (၈) ခု ထက်မနည်း ဖျက်ဆီး ခံရပြီး တအာင်းစာပါ ဆိုင်းဘုတ်များ မလုပ်ဆောင်ရန် စစ်ကောင်စီက ခြိမ်းခြောက် ပြောဆိုမှု ရှိခဲ့ကြောင်းလည်း အထက်ပါ အမျိုးသားက ပြောသည်။

“ဖျက်ဆီးခံရတဲ့ ဆိုင်းဘုတ်တွေက အသစ်လုပ်ထားတဲ့ ဆိုင်းဘုတ်တွေပဲ ဖြစ်တယ်။ ပြီးတော့ သူတို့ ပြောသွား တာက တအာင်းစာ နဲ့ ဆိုင်းဘုတ်တွေ လုပ်လို့ မရဘူးတဲ့၊ ဆိုင်းဘုတ်တွေမှာ သူတို့စာ (မြန်မာစာ) ကိုပဲ ရေးဖို့ ပြော သွားတယ်” ဟု အထက်ပါ အမျိုးသားက ဆက်ဆိုသည်။

တအာင်းစာ ပါသည့် ဆိုင်းဘုတ်များ၊ ရွာလမ်းညွှန် ဆိုင်းဘုတ်များကို စစ်ကောင်စီတပ်ဖွဲ့က ကား နှစ်စီးရှိ လူအင်အားအတူ တူရွင်း၊ သံချောင်း နှင့် တခြား လက်နက်ပစ္စည်းများ အသုံးပြုကာ ဖျက်ဆီးခြင်း ဖြစ်ကြောင်းလည်း သိရသည်။

ယင်းကဲ့သို့ ဒေသခံများကိုယ်ထူကိုယ်ထ တည်ဆောက်ထားသည့် ကျေးရွာဆိုင်းဘုတ်များသည် တစ်ခုကို ကျပ်သိန်း ၂၀ နီးပါး ကုန်ကျထားသဖြင့် စစ်ကောင်စီတပ်ဖွဲ့ကို ပြန်လည် တည်ဆောက် ပေးစေလိုကြောင်း ဒေသခံများက တောင်းဆိုနေကြသည်။

“ကျနော်တို့ ရွာသားတွေ တစ်အိမ်နည်းနည်းစီ စုပြီး ဆောက်လုပ်ထားတာတွေပါ။ အခုလို ဖျက်ဆီးခံရတော့ စိတ်မကောင်းဘူးပေါ့၊ ရွာအဝင်ဆိုင်းဘုတ်တွေ၊ လမ်းညွှန်တွေကို ပြန်ဆောက်ပေးစေချင်ပါတယ်၊ သူတို့ပိုက်ဆံ နဲ့ သူတို့ လုပ်ပေးပြီး သူတို့စာရေးလည်း ရတယ်၊ အဓိက ကတော့ ဆိုင်းဘုတ်တွေ ပြန်ဆောက်ပေးစေချင်တယ်” ဟု အထက်ပါ အမျိုးသားက ဆက်ဆိုသည်။

စစ်ကောင်စီ တပ်ဖွဲ့သည်ပြီးခဲ့သည့် ဇွန်လ ၉ ရက်နေ့တွင်လည်း လားရှိုးမြို့နယ်မှ ကျေးရွာ ၅ ရွာရှိ တအာင်းစာပါ ဆိုင်းဘုတ်များကို ဖျက်ဆီးပြီးနောက် ကျေးရွာလူကြီးများကို စခန်းသို့ခေါ်သွားတာ ခံဝန်လက်မှတ် ရေးထိုးခိုင်း သည့် အကြောင်းလည်း သိရသည်။