လယ်ယာခြံမြေအတွင်းသီးနှံများ ဆွတ်ခူးရန်နှင့် ကျောင်းနေအရွယ်ကလေးများ စာမေးပွဲဖြေဆိုခွင့်ရရေးအတွက် သျှမ်းပြည်မြောက်ပိုင်း သီပေါမြို့နယ်အတွင်း စစ်ရေးတင်းမာနေမှုများ လျှော့ချ၊ ရပ်တန့်ပေးရန် စစ်ဘေးရှောင်များက လိုလား ကြောင်း သျှမ်းသံတော်ဆင့်အားပြောသည်။
ဘုန်းကြီးကျောင်းများတွင် တလနီးပါး စစ်ဘေးရှောင်ခိုလှုံကာ နေရပ်မပြန်နိုင်သေးသော စစ်ဘေးရှောင်များက ဇန်နဝါရီလ ၂၁ ရက်နေ့က သျှမ်းသံတော်ဆင့်မှဆက်သွယ်မေးမြန်းရာတွင် ပြောဆိုခဲ့ခြင်းဖြစ်သည်။
နားမခေါ်ဘုန်းကြီးကျောင်းရောက် စစ်လေးရှောင်အမျိုးသမီးတဦးက – “ကျမတို့အရမ်းကိုအခက်အခဲဖြစ်ရပါတယ်။ လယ်ယာတွေထဲမှာလည်း သီးနှံတွေမဆွတ်ရဘူး။ ဒီတိုင်းဘဲပစ်ထားခဲ့ရတာ။ နှမ်းတွေ၊ ပြောင်းတွေမယူရဘူး။ ရှုံးပြီပေါ့ဒီနှစ်တော့။ တွန်ကျိုင်းရွာမှာစ ဖြစ်လာတဲ့တိုက်ပွဲဟာ ကနေ့အထိ မရပ်သေးတော့ ရွာမပြန်နိုင်ကြသေးဘူး။ ကျောင်းစာမေးပွဲလည်းဖြေချိန်နီးပြီဆိုတော့ ကလေးတွေစာမေးပွဲဖြေခွင့်ရဖို့ စစ်ရေးတင်းမာနေတဲ့ သျှမ်းတပ်ဖွဲ့ ၂ ဖွဲ့ လူထုရဲ့ခံစားချက်ကို စာနာနားလည်ပေးပါ။ ခေါင်းဆောင် ၂ ယောက် အမြန်ဆုံးတွေ့ဆုံပြီး တိုက်ပွဲမြန်မြန်ရပ်ပေးပါ လို့တောင်းဆိုချင်တယ် ”- ဟု သျှမ်းသံတော်ဆင့်မှ ဆက်သွယ်မေးမြန်းရာတွင်ပြောဆိုခဲ့သည်။
လက်ရှိ သီပေါမြို့နယ်တွင် စစ်ဘေးရှောင် ၉၀၀ ကျော်ရှိနေရာ နားမခေါ်ဘုန်းကြီးကျောင်း၊ တုန်ကာဘုန်းကြီးကျောင်း၊ နားကန်ဘုန်းကြီးကျောင်း၊ နောင်အန်ဘုန်းကြီးကျောင်း ၊ ခရိယာန်လီဆူးဘုန်းကြီးကျောင်းတို့တွင်အသီးသီးခိုလှုံနေလျှက်ရှိရာ နေရပ်မပြန်နိုင်ကြသေးကြောင်းသိရသည်။
စစ်ဘေးရှောင်လာသောရွာသားများမှာ နိုင်းလုံရွာ၊ တွန်ကျိုင်းရွာ၊ ဟိုနားရွာ၊ ၀မ့်ဟုန့်ရွာ၊ တာ့လုံရွာ၊ ကျိတ်ဖွန်ရွာ၊ ခိုင်းဟျိုးရွာ၊ လုံဝိုင်ရွာ၊ဖတ်းနမ်ရွာ၊ လွယ်မောက်နှင့် ဆိုင်းခေါင်ရွာမှရွာသား များဖြစ်ကြောင်းသိရသည်။
ဇန်နဝါရီလ ၁၀ ရက်နေ့ကလည်း စစ်ဘေးရှောင် ၁၄ ရွာမှ ရွာသား ၄၀၀၀ ကျော်သည် စုပေါင်းလက်မှတ်ရေးထိုးကာ သျှမ်းတပ် ၂ ဖွဲ့အမြန်ဆုံးပူးပေါင်းနိုင်ရေးအတွက် ခေါင်းဆောင် ၂ ဦးအမြန်ဆုံးတွေ့ဆုံကြရန် ရေးသားတိုက်တွန်းကာ သီပေါမြို့ ကျားခေါင်းပါတီလွှတ်တော်ကိုယ်စားလှယ် ထံပေးပို့ထားသည်။
၄င်းနှင့်ပတ်သက်ပြီး RCSS/SSA နှင့်အမြန်ဆုံးတွေ့ဆုံနိုင်အောင်စီစဉ်သွားမည်ဟု SSPP/SSA က ဇန်နဝါရီလ ၂၀ ရက်နေ့ရက်စွဲဖြင့် ကြေငြာချက်တစောင်ထုတ်ပြန်လိုက်သည်။
၂၀၁၈ နှစ်နှောင်းပိုင်းကတည်းကစပြီးသျှမ်းပြည်မြောက်ပိုင်း သီပေါမြို့နယ်အတွင်း စစ်ရေးတင်းမာမှု ပစ်ခတ်တိုက်ခိုက်မှုများရှိခဲ့ရာ ဒေသခံလူထု ထောင်နှင့်ချီ စစ်ဘေးရှောင်ကာ ဘုန်းကြီးကျောင်းများတွင်ခိုလှုံနေခဲ့ကြရသည်။
