သျှမ်းပြည်မြောက်ပိုင်း သီပေါမြို့နယ်အတွင်း တိုက်ပွဲကြောင့် စစ်ဘေးရှောင်သည့်ဒေသခံတဦး မတော်တဆထိခိုက်မှုဖြစ်ပွါးကာ သေဆုံးခဲ့မှုဖြစ်ပွါးခဲ့သည်။
ဇန်နဝါရီလ ၁၄ ရက်ညပိုင်းက သီပေါမြို့နယ်ခိုင်းဟျိုးရွာအနီး ပစ်ခတ်တိုက်ခိုက်မှုကြောင့် ခိုင်းဟျိုးရွာသားများ ဘုန်းကြီးကျောင်းသို့ ခိုလှုံရန်နေအိမ်မှထွက်ပြေးကြရာ ဒေသခံရွာသား တဦး မောင်းနှင်လာသော ဆိုင်ကယ်တစီး သစ်ပင်နှင့်တိုက်မိကာ သေဆုံးသွားခဲ့ခြင်းဖြစ်သည်။
နားမခေါ်ဘုန်းကြီးကျောင်းရောက် ခိုင်းဟျိုးရွာသားတဦးက – “ည ၈ နာရီအချိန် သေနတ်သံထွက်တော့ ကျနော်တို့လည်းလှန့်ပြီးအသီးသီးထွက်ပြေးကြတယ်လေ။ အိုက်လွတ် (အသက် ၄၅ နှစ်) ကဆိုင်ကယ်တစီးနဲ့ထွက်ပြေးတယ်။ ဆိုင်ကယ်မီးလည်းသိပ်မလင်းတော့ ရွာအထွက်မှာဘဲ သစ်ပင်နဲ့တိုက်မိပြီး သူသတိမေ့သွားတာ။ နယ်စည်းမခြားပရဟိတက သူ့ကိုလာယူပြီး သီပေါဆေးရုံကိုပို့တယ်။ အခြေအနေသိပ်မကောင်းလို့ မန္တလေးဆက်ပို့တယ်။ ၁၆ ရက်နေ့ မန္တလေးရောက်တော့ ဆုံးသွားတယ် ”- ဟု သျှမ်းသံတော်ဆင့်အားပြောပြသည်။
၁၄ ရက်ညတိုက်ပွဲကြောင့် ခိုင်းဟျိုးဘုန်းကြီးကျောင်းတိုက်တွက် စစ်ဘေးရှောင်လူထု ၈၂ ဦး ခိုလှုံနေခဲ့ရသည်။ လက်ရှိတွင် နားမခေါ်ဘုန်းကြီးကျောင်းတွင်မူ စစ်ဘေးရှောင် ၉၈၂ ဦးရှိနေပါသည်။
