အဝေးသင် ဝိဇ္ဇာဘာသာရပ်အထူးပြု ကျောင်းသားများ အနီးကပ် ၂ ကြိမ် တက်ရမည့်အတွက် အခက်အခဲများစွာ ရှိကြောင်း သိရသည်။
အဝေးသင် ပညာရေး အရည်အသွေး မြင့်မားစေရန် တနိုင်ငံလုံးရှိ အဝေးသင် (ဝိဇ္ဇာ) အနီးကပ် ၁၀ ရက်အစား ၅ ရက် ၂ ကြိမ် တက်ရန် လုပ်ဆောင်နေကြောင်း အဆင့်မြင့် ပညာ ဦးစီးဌာန ထုတ်ပြန်ခဲ့သည်။
“ ငွေကြေးဆိုင်ရာ အခက်အခဲ ရှိလို့အဝေးသင်တက်တာပါ။ အဝေးသင် တက်နိုင်ဖို့ကလည်း အလုပ်လုပ်ပြီးတက်ရတာလေ။ စနစ်ဟောင်းတုန်းကဆိုရင် အဆင်ပြေပါတယ်။တနှစ်လုံး ငွေစုပြီး သွားတက်ရုံပဲ” ဟု မူဆယ်မြို့ မှ တတိယ နှစ် ဒဿနိက ဗေဒ အထူးပြု စိုင်းဆိုင်လျန်း က ပြောသည်။
လက်ရှိ အဝေးသင် ဝိဇ္ဇာ အထူးပြုကို တနှစ် လျှင် ၂ ကြိမ် တက်ရပါက အဆင်မပြေကြောင်း၊ တကြိမ်ကို ၅ ရက်သွားပါက ကုန်ကျစရိတ်များမည်ဖြစ်သဖြင့် တချို့ ကျောင်းသားများ ကျောင်းတက်ရန် ခက်ခဲကြောင်း လည်း စိုင်းဆိုင်လျန်းက ပြောသည်။
“ တချို့ကျောင်းသားဆိုရင် ကျောင်းသွားတက်လို့ ပြန်လာရင် အလုပ်အသစ်ပြန်ရှာရတယ်။ တချို့ဆိုရင် ၂လ၊ ၃လ နေမှ အလုပ်ပြန်ရတယ်။ အခု စနစ် က ကျောင်းသားဘက်ကနေ ကြည့်ရင် ဘယ်လိုမှ အဆင်မပြေဘူး” ဟု စိုင်းဆိုင်လျန်း က ဆိုပြန်သည်။
အဝေးသင်တက်ရောက်သူများသည် လုပ်ငန်းခွင်တွင် ဝင်ရောက် လုပ်ကိုင်သူများဖြစ်ကြပြီး၊ တချို့ မှာ ကုမ္ပဏီ ဝန်ထမ်းများဖြစ်သည့်အတွက် ခွင့်ယူရန် ခက်ခဲကြောင်း၊ ခွင့်ယူသည့်အခါတွင်လည်း လုပ်ငန်းရှင်များက မကြည်ဖြူမှုများခံရကြောင်းလည်း အဝေးသင် တက္ကသိုလ်ကျောင်းသားများက ပြောသည်။
“ ပညာရေးမှာ ဘယ်လို အထောက်အကူ ဖြစ်လို့ အဲ့လိုစနစ် ပြင်လိုက်လဲ တော့ မသိဘူး။ ကျနော် အမြင်ကတော့ ဒီလို ပြင်လိုက်တာဟာ ပညာရေး တိုးတက်ဖို့အတွက် မယောင်ရာ ဆီလူးနေတာပဲ လို့ မြင်မိတယ်” ဟု စိုင်းဆိုင်လျန်းက ထောက်ပြပြောဆိုလိုက်သည်။
ဆက်လက်ပြီး ဒုတိယနှစ် သမိုင်းအထူးပြု နန်းမို့ က “ အဝေးသင် ၂ ကြိမ်ခွဲ တက်တာတော့ အဆင်မပြေဘူး။ အလုပ်တဖက်နဲ့ ကျောင်းတက်ရတာ သွားဖို့ခက်တယ်။ အဝေးသင် စနစ်သစ်တကယ်ပြောင်းရင်တော့ ကျောင်းပြန်တက်ဖို့ခက်ခဲပါမယ် ” – ဟု နန်းမို့ ကပြောသည်။
အဝေးသင် တက်ရောက်သည့် ကျောင်းသားများအတွက် နှစ်ကြိမ်ကျောင်းတက်ရမည့်ကိစ္စသည့် အခက်အခဲရှိနိုင်သော်လည်း အဝေးသင် ပညာရေး အရည်အသွေး မြင့်မားဖို့ အဓိက ဦးတည်ချက်ကြောင်း ပြုလုပ်ရခြင်းဖြစ်ကြောင်းသိရသည်။
အဝေးသင်ပညာရေး စနစ် ဝိဇ္ဇာ ဘာသာတွဲများတွင် ပညာသင်ကြားနေသည့် ကျောင်းသား၊ကျောင်းသူများအား ပုံမှန် တက်ရောက်နေသည့် မေလ ၅ ရက်တကြိမ်၊ နိုဝင်ဘာ လ တွင် နောက်ထပ် ၅ ရက် အဖြစ် နှစ်ကြိမ်ခွဲ တက်ရောက်ရမည် ဖြစ်သည်။
အဝေးသင် ဝိဇ္ဇာ ဘာသာရပ်အထူးပြု ကျောင်းသားများ အနီးကပ် နှစ်ကြိမ် တက်ရမည်ကို ပတ်သတ်ပြီး “ ကျောင်းသားထု ဆန္ဒမပါသော အဝေးသင် စနစ်သစ်အလိုမရှိ” “ ဖဲကြိုးနီလှုပ်ရှားမှု” ကို လူမှုကွန်ရက်တွင် ယနေ့ စတင်ပြုလုပ်ကြောင်းသိရသည်။
Leave a Comments