တရုတ်နိုင်ငံ အာရှရေးရာအထူးကိုယ်စားလှယ် မြောက်ပိုင်းမဟာမိတ်တပ်ဖွဲ့ဝင်များနှင့်တွေ့ဆုံ

တရုတ်အစိုးရ၏ နိုင်ငံခြားရေးဝန်ကြီးဌာန ၊ အာရှရေးရာ အထူးကိုယ်စားလှယ် မစ္စတာ ဆွန်းကော်ရှန် ဦးဆောင်သည့် အဖွဲ့သည် နှစ်သစ်ကူးမေးမြန်းရေးခရီးစဉ်ဟုဆိုကာ မြောက်ပိုင်းမဟာမိတ်တပ်ဖွဲ့နှင့် တွေ့ဆုံမှုပြုခဲ့ကြောင်းသိရသည်။

ဇန်နဝါရီလ ၉ ရက်နေ့က မစ္စတာ ဆွန်းကော်ရှန်နှင့်အဖွဲ့သည် သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA နှင့် တရုတ် နယ်စပ်တနေရာတွင်တွေ့ဆုံခဲ့ပြီး SSPP/SSA ဘက်မှ ဗိုလ်ချုပ်ခွန်ဆိုင် ဦးဆောင်သည့်အဖွဲ့ သွားရောက် တွေ့ဆုံဆွေးနွေးခဲ့ကြောင်း သိရသည်။

SSPP/SSA ၏ပြန်ကြားရေးဌာနက – ၂ ဦး ၂ ဖက်ကြားယုံကြည်မှုတည်ဆောက်နိုင်ခဲ့ပြီး ရှေ့ဆက်မြန်မာ့ငြိမ်းချမ်းရေးနှင့် တရုတ်-သျှမ်းနယ်စပ်တည်ငြိမ်အေးချမ်းရေးအတွက် ဆွေးနွေးခဲ့ကြောင်း – သိရသည် ။

အဆိုပါတွေ့ဆုံပွဲတွင် တရုတ်အစိုးရ၏ နိုင်ငံခြားရေးဝန်ကြီးဌာန ၊ အာရှရေးရာ အထူးကိုယ်စားလှယ် မစ္စတာ ဆွန်းကော်ရှန်က – မြန်မာ့ငြိမ်းချမ်းရေးရှေ့ဆက်အကောင်အထည်ဖော်နိုင်ရေးအတွက် တွေ့ကြုံရသည့် ပြသနာများအား ငြိမ်ချမ်းသောနည်းဖြင့်ဖြေရှင်သွားရန်စ တိုက်တွန်းလိုက်သည်ဟုသိရသည်။

၁ နာရီကြာ တွေ့ဆုံမှု ၂ ဦး ၂ ဘက်ကြား ကျယ်ကျယ်ပြန့်ပြန့်အမြင်ချင်းဖလှယ် ဆွေးနွေးနိုင်ခဲ့ကြောင်းသိရသည်။
အဆိုပါနေ့တွင်ပင် တရုတ်နိုင်ငံနိုင်ငံခြားရေးဝန်ကြီးဌာနမှ မစ္စတာ ဆွန်းကော်ရှန်သည် အထူးဒေသ ၄ NDAA ခေါင်းဆောင် ဦးစိုင်းလင်း ဦးဆောင်သောအဖွဲ့နှင့် မိုင်းလားမြို့ အရှေ့တိုင်းဟိုတယ်တွင်ထပ်မံတွေ့ဆုံခဲ့သည်။

တရုတ်နိုင်ငံနှင့် မြန်မာနိုင်ငံ ချစ်ကြည်ရင်းနှီးမှုအတွက်၊ မိုင်းလားထိန်းချုပ်နယ်မြေ အေးချမ်းရေးနှင့်ဖွံ့ဖြိုးတိုးတက်ရေးအတွက်ဒေသတွင်းလူထု အေးချမ်းစွာနေထိုင်နိုင်ရေးအတွက် စသည်များဆွေးနွေးပြောဆိုခဲ့ကြကြောင်း မိုင်းလား အထူးဒေသ ၄ ၏ ပြန်ကြားရေးဌာနက သတင်းထုတ်ပြန်ထားသည်။

ယခုခရီးစဉ်တွင် တရုတ်နိုင်ငံ နိုင်ငံခြားရေးဝန်ကြီးဌာန အာရှရေးရာအထူးကိုယ်စားလှယ်နှင့်အဖွဲ့သည် မိုင်းလားနှင့် SSPP တို့အပြင် ကချင်၊ ၀ တပ်ဖွဲ့များ၏ ကိုယ်စားလှယ်များနှင့်လည်းတွေ့ဆုံခဲ့ကြောင်း သိရသည်။