(သျှမ်းသံတော်ဆင့်သတင်းဌာန တည်ထောင်သူ ၊ လက်ရှိ ပြည်ထောင်စုအင်စတီကျု ဒါရိုက်တာ ဦးခွန်စိုင်း ၏ ၂၁၁၃ သျှမ်းနှစ်သစ်ကူး ဆုမွန်စကား)
အိမ်ထောင်မှုတခုမှာဆိုရင် အိမ်ထောင်ဦးစီးနဲ့ အိမ်ထောင်ရှင်မ တို့ မသင့်မြတ်ကြဘူးဆိုရင် သားသမီးတွေ မြေးမြစ်တွေ အိမ်သားအားလုံးက ပျော်ရွှင်မှုရှိမှာမဟုတ်ဘူး။ သင့်မြတ်မှုလည်းရှိမှာမဟုတ်ဘူး။ ပျော်ရွှင်မှုမရှိရင် တခြားကိုပြောင်းရွှေ့မယ် တခြားအိမ်မှာသွားပြီးမှီခိုနေထိုင်မယ် – ဒါတွေဟာ လောကဓမ္မတာ ပါဘဲ။
အဲတာကြောင့် သျှမ်းမဟုတ်တဲ့ သျှမ်းပြည်တိုင်းရင်းသားခေါင်းဆောင် တဦးက အမှာစကားပြောလာတာကို ပြန်လည်ပြောပြရမယ်ဆိုရင်…. “ကျနော်တို့ဟာ သျှမ်းပြည်မှာ သျှမ်းညီကိုတိုင်းရင်းသားတွေနဲ့အတူတကွနေလာတာ ကြာရှည်လှပါပြီ။ သျှမ်းတွေကို ကျနော်တို့အားကိုးပါတယ်။ ဆက်ပြီးတော့လည်း အားကိုးချင်ပါတယ်။ တခြားတပါးသူကိုမအားကိုးချင်ပါဘူး။ တခြားတပါးသူတွေဆိုတာ ကျနော်တို့အပေါ် အထင်အမြင်ဘယ်လောက်သေးကြောင်း ကျနော်တို့သိပါတယ် ။ သို့ပေမယ့်အခုအခြေအနေက သျှမ်းတွေက ကျနော်တို့ကို အားကိုးအားထားရတဲ့ပုဂ္ဂိုလ် မဖြစ်တော့ပါဘူး။ ကျနော်တို့အတွက်မပြောသေးနဲ့ သျှမ်းအချင်းချင်းအတွက်တောင်မှ အားကိုးလို့မရတဲ့အခြေအနေဖြစ်နေပါတယ်။ စည်းလုံးညီညွတ်ခြင်း တစိတ်တဝမ်းတည်းရှိခြင်း ဆိုတာထက် – ငါပြောသလိုလုပ် ငါလုပ်သလိုမလုပ်နဲ့ ဆိုတာမျိုးဖြစ်နေတဲ့ခါကျတော့ ဘယ်သူမှ အေးအေးချမ်းချမ်းမနေရဘူး။ အဲလို အေးချမ်းမှုမရှိဘဲ စစ်ဘေးရှောင်နေရရင်တော့ ခုနပြောသလိုပါဘဲ .. ကိုယ့်ကိုဘယ်လောက်ဘဲ အထင်အမြင်သေးသေး သူများကိုဘဲ အားကိုးအားထားပြုသွားရပါလိမ့်မယ် ”- လို့ပြောပါတယ်။
“အဲတာကြောင့် ကျနော်တို့ သျှမ်းခေါင်းဆောင်တွေကို တိုက်တွန်းချင်တာက သျှမ်းနှစ်သစ်ကူးကစပြီး သျှမ်းပြည်လူထုတရပ်လုံးက အားကိုးအားထားပြုရတဲ့ ပုဂ္ဂိုလ်ဖြစ်အောင် စွမ်းဆောင်ပေးပါ။ စည်းလုံးညီညွတ်စွာဖြင့် တစိတ်တဝမ်းတည်းရှိမှသာ သျှမ်းပြည်သားအားလုံး အေးချမ်းစွာနေရပါမယ်။ သျှမ်းပြည်တွင်းမှာ အတူတကွနေထိုင်လာတဲ့ တိုင်းရင်းသားညီအကိုမောင်နှမ တိုင်းရင်းသားတွေအားလုံးကလည်း အေးချမ်းပျော်ရွှင်စွာနေရပါလိမ့်မယ်။ သူတို့အေးချမ်းပျော်ရွှင်ရင် တခြားတပါးသူဆီမှာ သွားပြီးအားကိုးခိုလှုံစရာမလိုတော့ပါဘူး။ သျှမ်းပြည်ကြီးအေးချမ်းသာယာရင် ပြည်ထောင်စုကြီးလည်းအေးချမ်းသာယာပါလိမ့်မယ် ” – လို့ အဲဒီခေါင်းဆောင်က တိုက်တွန်းပြောဆိုလာပါတယ်။ အရမ်းကိုမှန်ကန်တဲ့တိုက်တွန်းချက်ဖြစ်ပါတယ်။
ငြိမ်းချမ်းရေးဆိုတာကတော့ သူများဆီကနေ မျှော်လင့်နေတာထက် ကိုယ့်ဟာကိုလုပ်ယူရမယ်လေ။ ဗုဒ္ဓမြတ်စွာဘုရားလည်းဟောကြားထားတယ်။ ငြိမ်းချမ်းရေးဆိုတာ ကိုယ့်ရဲ့အတွင်းစိတ်ကနေလာတာ။ သျှမ်းပြည်သားတိုင်းရဲ့နှလုံးသားမှာ ငြိမ်းချမ်းရေးတရားရှိရင် တယောက်အပေါ်တယောက်က ငြိမ်းချမ်းရေးစိတ်တွေရှိနေမယ်ဆိုရင် သျှမ်းပြည်အနှံ့သာမက ပြည်ထောင်စုတဝှမ်းလုံးကို ငြိမ်းချမ်းရေး ကလွှမ်းမိုးသွားပါလိမ့်မယ်။ ဒါ့အပြင် အိမ်နီးချင်းနိုင်ငံအထိပါ ကူးစက်လွှမ်းမိုးသွားပါလိမ့်မယ်။
ခုနက ပြောသွားသလိုပါဘဲ။ အိမ်ထောင်ဦးစီးနဲ့ အိမ်ထောင်ရှင်မ တို့ အဆင်ပြေ သင့်မြတ်ချစ်ကြည်ပြီး ငြိမ်းချမ်းကြမယ်ဆိုရင် အိမ်သားအားလုံးလည်း ငြိမ်းချမ်းစွာအတူတကွနေထိုင်ကြမှာဖြစ်ပြီးတော့ တခြားအိမ်၊ အိမ်နီးချင်း တွေမှာ သွားပြီးခိုလှုံမှာဟုတ်ဘူး။ အဲလိုဆိုရင် ကိုယ်လည်း အေးချမ်းမယ် သူများလည်းအေးချမ်းမယ်။ အရမ်းကိုအကျိုးရှိပါတယ်။
အဲဒီအကျိုးရှိတဲ့အချက်တွေကို အဖွဲ့အစည်းအတွင်းမှာလည်း သုံးမယ်ဆိုရင် ဥပမာ ကျနော်တို့ သျှမ်းသံတော်ဆင့်သတင်းဌာနအဖွဲ့ထဲမှာလည်းဘဲ စည်းလုံးညီညွတ်ရေး တည်ဆောက်ရမယ်။ ငါပြောသလိုလုပ် ငါလုပ်သလိုမလုပ်နဲ့ဆိုတာကိုမလုပ်ဘဲနဲ့ စည်းချက်ညီညီ စည်းလုံးညီညွတ်ကြမယ်ဆိုရင် အဖွဲ့အစည်းအတွင်းမှာဘဲ ငြိမ်းချမ်းရေးရသည်သာမက တခြားသော စစ်တပ်ဖက်ကလား၊ ပါတီလား၊ လူမှုအခြေပြုအသင်းအဖွဲ့လား၊ စာပေယဉ်ကျေးမှုအဖွဲ့လား စတာတွေမှာလည်း ငြိမ်းချမ်းရေး ကူးစက်ပျံ့နှံ့သွားမယ်။ ငြိမ်းချမ်းရေးတည်ဆောက်ခြင်းဆိုတာ တခြားအဖွဲ့ကို ရန်သွားမူတာမဟုတ်ဘဲနဲ့ မိမိကိုယ်ကိုကာကွယ်တာတော့ဖြစ်ရပါမယ်။
ငြိမ်းချမ်းရေးဆိုတာ တပါးသူကို ရန်သွားမမူဘူး ဆိုရင် ဒီ ၂၀၁၉ ခုနှစ်ဟာ ကျနော်တို့အတွက် နှစ်ကောင်းနှစ်မြတ် ဖြစ်မယ်လို့ယုံကြည်ပါတယ်။ ဒီနှစ်ဟာဆိုရင်တော့ သျှမ်းပြည်သားအားလုံးအတွက် အမိသျှမ်းပြည်ကြီးဟာ အမှောင်တိုက်ဖုံးနေပါပြီ။ သန်းခေါင်ယံထက်ညနက်တာမရှိတော့ဘူးဆိုတဲ့အခြေအနေမျိုးဖြစ်နေတယ်။ ဒါပေမယ့် အမှောင်ရဲ့ တခြားတဘက်မှာတော့ အလင်းတော့ရှိစမြဲဘဲ။ အလင်းရောင်ခြည်လေးသန်းလာရင် ကျနော်တို့လည်းအခွင့်ကောင်းယူပြီးတော့ ငြိမ်းချမ်းရေးကိုတည်ဆောက်ရပါမယ်။ ဖွံ့ဖြိုးတိုးတက်ရေးအတွက်အတူတကွ တည်ဆောက်ကြပါမယ်။
ကျနော်တို့သက်တမ်းမကုန်ဆုံးခင်အချိန်လေးမှာတော့ ဒီအတိုင်း လုပ်သွားရမယ်လို့ကျနော်မြင်မိပါတယ်။ ကျနော်ကိုယ်တိုင်လည်း ငြိမ်းချမ်းရေးကိုတည်ဆောက်သွားမယ်။ နောက်လိုက်ဗိုလ်ပါတွေကိုလည်း ဖွံ့ဖြိုးတိုးတက်အောင်ထူထောင်ပေးမယ်။ ညီကိုမောင်နှမတွေ၊ မိတ်ဆွေအပေါင်းအဖော်တွေကို ကူညီဖေးမ မယ်။ သျှမ်းပြည်အတွင်းရှိ အဖွဲ့အစည်း ကြီးငယ်မရွေး ထူထောင်သွားမယ်လို့ ကျနော်က ကတိပေးရင်း မင်္ဂလာနှစ်သစ်အတွက် စကားလက်ဆောင်ပါးချင်ပါတယ်ခင်ဗျ။
