သျှမ်းပြည်နယ်အတွင်း ဘွဲ့ရများအလုပ်အကိုင်ရရှိရေးအတွက် အစိုးရမှ စီစဉ်ဆောင်ရွက် ပေးနေ သည်ဟုဆိုသော်လည်း သျှမ်းပြည်နယ်ရှိ တချို့မြို့နယ်များအတွင်း အထူးလိုအပ်လျှက်ရှိသော ကျန်းမာရေးဝန်ထမ်းများကိုမူ မခန့်အပ်ပေးနိုင်သေးသလောက် နည်းပါးနေသေးကြောင်း သိရသည်။
၂၀၁၈ ခုစက်တင်ဘာ၂၄ ရက်နေ့ တောင်ကြီးမြို့တွင်ကျင်းပသော ဒုတိယ အကြိမ် သျှမ်းပြည် နယ် လွှတ် တော်(၁၁)ကြိမ်မြောက်ပုံမှန် အစည်းအဝေး သတ္တမမြောက်နေ့ ၌ ပင်းတယမြို့နယ် မဲ ဆန္ဒနယ် အမှတ် (၂)ကိုယ်စားလှယ်မှ ဦးညီညီ(ခ) ဦးညီလေးချမ်းက ၂၀၁၈-၂၀၁၉ ပညာသင်နှစ်၌ သျှမ်းပြည်နယ် အတွင်း တက္ကသိုလ်များ၊ ကောလိပ်များ၊ အဝေးသင် တက္ကသိုလ်များ နှင့် ဘွဲ့ရများ အလုပ်အကိုင်ရရှိရေး အတွက် ကြယ်ပွင့်ပြမေးခွန်းမေးမြန်းသည်။
၄င်း၏မေးမြန်းချက်အား လူမှုရေးဝန်ကြီး ဒေါက်တာမျိုးထွန်းက သျှမ်းပြည်နယ်မှ အသက်မွေးဝမ်းကျောင်းပညာ တက်ရောက်ပြီး ကျွမ်းကျင်သူများကိုလည်း အမျိုးသား အဆင့်ကျွမ်းကျင်မှုအသိအမှတ်ပြုလက်မှတ် ရရှိရန် စာမေးပွဲ ၀င်ရောက်ဖြေဆို နိုင်ရေးကိုလည်း စီစဉ်ဆောင်ရွက်ပေး နေကြောင်းနှင့် တခြားတက္ကသိုလ်မှ ဘွဲ့ရလူငယ်များ အလုပ်အကိုင်အခွင့်အလမ်းရရှိစေရေး ဒေသခံလုပ်ငန်းရှင်များ၊ သက်ဆိုင်ရာ ဌာနများနှင့် ချိတ်ဆက်ကာ စီစဉ်ဆောင်ရွက် ပေးကြောင်း၊ ၂ နှစ်အတွင်း အစိုးရဌာနတွင် ၀န်းထမ်းပေါင်း ၁၇၀၀ ကျော် နှင့် ပုဂ္ဂလိက လုပ်ငန်းများတွင်ဝန်ထမ်း ၆၉၀၀ ကျော်အလုပ်ခန့်အပ်ပေး နိုင်ခဲ့ကြောင်း ဖြေကြားခဲ့သည်။
သို့သော် သျှမ်းပြည် တောင်ပိုင်း မိုင်းကိုင်မြို့နယ်အတွင်းလိုအပ်နေသည့် ကျန်းမာရေးကြီးကြပ်ရေး (၂) တစ်ဦး ကို ခန့်အပ်ထားရေးနှင့် ပတ်သက်ပြီး စက်တင်ဘာလ ၁၉ ရက်နေ့ ပြည်သူ့လွှတ်တော် အစည်း အဝေး တွင် ကိုယ်စားလှယ်စိုင်းဆိုင်မိန်း၏ မေးမြန်းချက်ကို ကျန်းမာရေးနှင့်အားကစား ဒုဝန်ကြီး ဒေါက်တာဒေါ်မြလေးစိန်က လတ်တလောခန့်အပ်ထားပေးနိုင်ခြင်းမရှိသေးကြောင်း ၊ ၂၀၁၉ ခုနှစ် ကျန်းမာရေးကြီးကြပ်(၂) အသစ် ခန့်ထား ပေးမည့်အချိန်တွင် ဦးစားပေး ခန့်ထားပေးသွားမည်ဖြစ်ပါကြောင်း ဖြေကြားခဲ့သည်။
သျှမ်းပြည်နယ်တွင် တက္ကသိုလ်/ကောလိပ်ပေါင်း ၁၃ ခုရှိပါသည်။ ၂၀၁၆ ခုနှစ်ဧပြီလ ၁ ရက်နေ့မှ ၂၀၁၈ ခုနှစ်ဂျူလိုင်လ ၃၁ ရက်နေ့အထိ အစိုးရဌာနပေါင်း ၆၁၃ ဌာန နှင့် ပုဂ္ဂလိကဌာန ၆၈၇ ခုတို့တွင် အလုပ်အကိုင် အခွင့်အလမ်းများစီစဉ်ဆောင်ရွက် ပေးခဲ့ ကြောင်း ဒေါက်တာမျိုးထွွန်းက ကဖြေကြားသွားခဲ့ပါသည်။
ထို့အပြင် သျှမ်းပြည်နယ် အလုပ်သမား ညွှန်ကြား ရေးဦးစီးဌာန ပြည်နယ်ရုံးမှ တောင်ကြီးမြို့၊ လွိုင်လင်မြို့၊ ကျောက်မဲ ၊လားရှိူး၊မူဆယ်မြို့ ၊ ကျိုင်းတုံ ၊ တာချီလိတ်မြို့တို့တွင် ရုံးများဖွင့် ထားပြီး အလုပ်အကိုင် နှင့် အလုပ်သမားရှာဖွေရေးရုံးများကို လင်းခေးမြို့၊ မိုင်းဖြတ်မြို့၊ အောင်ပန်းမြို့ ၊လောင်ကိုင်မြို့၊ ကွန်းလုံမြို့၊ မိုင်းဆတ်မြို့တို့တွင် ဘတ်ဂျတ်ပေါ်မူတည်ပြီးတိုးချဲ့ ဖွင့်လှစ်သွားမည်ဖြစ်ကြောင်း သိရသည်။
