သျှမ်းပြည်မြောက်ပိုင်း ကျောက်မဲမြို့နေ ဒေသခံလူထုနှင့်သံဃာတော်များ စုပေါင်းကာ သျှမ်းတပ် ၂ ခုပေါင်း စည်းရေး အတွက် တိုက်တွန်းနှိုးဆော်မှုပြုလုပ်ကြောင်းသိရသည်။

စက်တင်ဘာလ ၁၄ ရက်နေ့က ကျောက်မဲမြို့ကျောင်းယွက် ဘုန်းကြီးကျောင်းတွင် တွေ့ဆုံမှုပြုကြရာ ၀င်ရောက်ဆွေးနွေးသူအင်အား ၂၀၀ ခန့်ရှိကြောင်း၊ သဘောတူညီချက် ၄ ချက်ရရှိခဲ့ကြောင်းသိရပါသည်။

သျှမ်းသံဃာတော်များအဖွဲ့၊ လူထု၊ ကျားခေါင်းပါတီ၊ ကျားဖြူပါတီ၊ စာပေယဉ်ကျေးမှုအဖွဲ့၊ နမ့်ခုံးသျှမ်း များ ပရဟိတအသင်း၊ ၀ုန်းမေတ္တာ အဖွဲ့တို့စုပေါင်းကာ သျှမ်းပြည်အနာဂတ်နိုင်ငံရေး၊ လက်ရှိကြုံတွေ့နေရသော သျှမ်းတပ် ၂ ခု ပေါင်းစည်းရေးတွင်ကြုံတွေ့နေရသော ပြသနာများ ကိုဆွေးနွေးနိုင်ခဲ့ကြောင်းသိရသည်။

ကျောက်မဲသျှမ်းသံဃာတော်များအဖွဲ့မှ တာဝန်ရှိသံဃာတော်တပါးက – အဓိကကတော့ သျှမ်းလက်နက် ကိုင်တပ်ဖွဲ့ ၂ ဖွဲ့ပေါင်းစည်းနိုင်ရေး၊ အချင်းချင်းပစ်ခတ်နေမှုမှရပ်တန့်ရေး၊ သူ့နယ်မြေ ကိုယ့်နယ်မြေ ခွဲခြား နေမှုကနေရပ်တန့်ရေး အဲဒီအတွက်ဆွေးနွေးတယ်။ သူတို့အချင်းချင်းမပူးပေါင်းနိုင်တာ တောင်မှ မပူးပေါင်း ချင်တာတောင်မှ အချင်းချင်းမပစ်ခတ်ဖို့ တိုက်တွန်းချင်တယ်။ အဲဒါကြောင့်ဒီအစည်းအဝေးကနေ ကြေငြာ ချက်တစောင်ထုတ်ပြန်လိုက်တယ်။ သျှမ်းတပ် ၂ ဖွဲ့ကနေ ဒီကြေငြာချက်သဘောထားကို သေချာဖတ်ကြည့်ပြီး ဒီအကြံပြုတဲ့အတိုင်း ဆောင်ရွက်သွားစေချင်တယ်- ဟု သျှမ်းသံတော်ဆင့်အား မိန့်တော်မူသည်။

အဆိုပါတွေ့ဆုံပွဲသို့ ကျောက်မဲမြို့တွင်းမှ သံဃာတော် ၆၀ ပါး၊ လူထု ၁၄၀ ကျော် တက်ရောက်ဆွေးနွေး ကြောင်းသိရသည်။

ထုတ်ပြန်ထားသောကြေငြာချက်တွင် – သျှမ်းပြည်တပ်မတော်အချင်းချင်းပစ်ခတ်နေမှုမှ ရပ်တန့်ရန်၊ မျိုးဆက် သစ်များအား သမိုင်းဆိုးမချန်ထားပေးရန်နှင့် ကမ္ဘာ့အလယ်တွင် အရှက်တကွဲ အကျိုးနည်းအောင်မပြုရန်၊ သျှမ်းပြည်တပ်မတော်အချင်းချင်း အပစ်အခတ်ရပ်စဲနိုင်ရေးအတွက် ၂ ဖက်ခေါင်းဆောင်များ တွေ့ဆုံမှုပြုရန်၊ သျှမ်းပြည်လူထုနှင့်သံဃာတော်များ၏ ဆန္ဒသဘောထားကို ဂရုမမူဘဲ အချင်းချင်း ပစ်ခတ်မှုဖြစ်ပွါးအောင် စတင်လုပ်ဆောင်ပါက အဆိုပါတပ်ဖွဲ့အား ပြင်းပြင်းထန်ထန်ဆန့်ကျင်ကန့်ကွက်သွားမည်- စသည်တို့ပါရှိ ပါသည်။