သျှမ်းပြည်မြောက်ပိုင်း လားရှိုးမြို့နယ် မိုင်းယော်တိုက်နယ်တွင် အစိုးရတပ်နှင့်တအာင်းတပ်ဖွဲ့တို့ကြားတိုက်ပွဲ များငြိမ်သွားပြီ ဟုဆိုသော်လည်း ဒေသခံများစိုးရိမ်မှုရှိနေသေးသဖြင့် ရွာသား ၁၀၀ ၀န်းကျင်မှာ လားရှိုးသို့ တိမ်းရှောင်နေကြောင်းသိရသည်။
ယမန်နေ့က တိုက်ပွဲဖြစ်ပွါးခဲ့သည့် လွယ်ပန်ထီးနှင့် ၀မ့်ပန်ခုတ်ရွာတိုက်ပွဲကြောင့် သြဂုတ်လ ၂၂ ရက်မနက်ပိုင်းက ဒေသခံ တအာင်းလူထု ၁၀၀ ၀န်းကျင်ခန့် မိုင်းယော်သို့ရောက်ရှိကာ ကား ၂ စီးဖြင့် လားရှိုးသို့ဆင်းသွားကြောင်း မိုင်းယော်ဒေသခံ ကျေးရွာအကြီးအကဲ တဦးကပြောသည်။
“တိုက်ပွဲသံတော့ ငြိမ်နေတယ်။ ဒါမယ့် ဒီမနက်စောစော ရွာသား ၁၀၀ လောက် မိုင်းယော်ကနေကား ၂ စီးအပြည့်နဲ့ လားရှိုး ကိုသွားတာ။ တမြန်နေ့တုန်းကတော့ ဒေသခံတရုတ်ရွာသူရွာသားတွေလေ မိုင်းယော်ကိုရောက်လာတာ။ သူတို့တော့ နီးစပ်ရာဆွေမျိုးတွေ အိမ်မှာနေနေတာ။ ရွာဘက်ကအခြေအနေက တင်းမာနေတုန်းမို့ အခြေအနေစိတ်မချသေးလို့နေမယ် “– ဟု ပြောသည်။
လားရှိုးမြို့အရှေ့ဘက်အရပ် မိုင် ၃၀ ကျော်အကွာရှိ မိုင်းယော်တိုက်နယ်တွင် သြဂုတ်လ ၂၁ ရက်နေ့ မနက်ပိုင်းက တအာင်းတပ်နှင့်အစိုးရတပ် (တပ်မ ၉၉ လက်အောက်ခံတပ်ရင်းများ) ပစ်ခတ်တိုက်ခိုက်မှုဖြစ်ပွါးခဲ့ရာ မိုင်းယော်မှ ၈ မိုင်ခန့်အကွာ တိုက်ပွဲဖြစ်ပွါးသည့်ရွာမှ ဒေသခံလူထု လယ်ယာမဝင်ရဲသေးဘဲ စစ်ဘေးရှောင်နေရကြောင်းသိရသည်။
“မနေ့ကတိုက်ပွဲက အစိုးရတပ်ဘက်က ထိခိုက်ဒဏ်ရာရ အရာရှိတယောက်နဲ့ တပ်သားတယောက် လားရှိုးဆေးရုံကိုပို့ကြတာ တွေ့လိုက်တယ် “– ဟု လည်းမိုင်းယော်မှဒေသခံ စိုင်းလူ ကလည်းပြောသည်။
ယခင်အပတ်ကလည်း မိုင်းယော်အရှေ့ဘက် ပန်ခါးရွာဘက်တွင်လည်းအစိုးရတပ်နှင့် တအာင်းတပ်တို့တိုက်ပွဲဖြစ်ပွါးခဲ့သေးသည်။
Leave a Comments