သျှမ်းပြည်တောင်ပိုင်းလဲချားမြို့နယ် ၀မ့်ယိမ်းကျေးရွာရှိ ကျောင်းဆရာ ဆရာမများ၊ ကျောင်းသားများ အား ကူညီထောက်ပ့ံပေးရေးအတွက် လဲချားမြို့ လူငယ်များကစုပေါင်းကာ ရံပုံငွေရှာဖွေရေးလှုပ်ရှားမှု တခုပြုခဲ့ ကြောင်း သိရသည်။

ကျနော်တို့လဲချားလူငယ်အဖွဲ့ထဲက လူငယ် ၁၀ ယောက်လောက်က ပြီးခဲ့တဲ့ တနင်္ဂနွေနေ့ နို၀င်ဘာလ ၂၆ ရက်နေ့က လဲချားမြို့ထဲမှာ လှည့်လည်ပြီးအလှူခံတယ်။ စေတနာရှင်တွေ မြို့ခံတွေက သဒ္ဓါထက် သန်ကြ ပါတယ်။ ကျေးဇူးအထူးတင်ရှိပါတယ်။ သျှမ်းပြည်မှာ အမျိုးသားကျောင်းဖွံ့ဖြိုးတိုးတက်ရေးအတွက်ပါ။ အလှူငွေများများ စားစားမရှိသေးတော့ ကလေးတွေပညာရေးအတွက်ကူညီထောက်ပ့ံကြဖို့ တိုက်တွန်းပါတယ် – ဟု လဲချားလူငယ် စိုင်းလိုင်းဟိန်းက သျှမ်းသံတော်ဆင့်အားပြောပြသည်။

ကျောင်းသူကျောင်းသားများအတွက် သျှမ်းနှစ်သစ်ကူးပွဲတော်အမှတ်တရ သျှမ်းဝတ်စုံဝယ်ပေးနိုင်ရေး အတွက် ရည်ရွယ်ကာ လဲချားမြို့နယ် အတွင်း လှည့်လည်အလှူခံခြင်းဖြစ်ကြောင်း လဲချားမြို့ လူငယ်ခေါင်းဆောင် စိုင်းလိုင်းဟိန်းက သျှမ်းသံတော်ဆင့်အားပြောပြသည်။

“ဒီကျောင်းက မနှစ်ကမှ စဖွင့်တာပါ။ ကလေးတွေကို အင်္ဂလိပ်စာ၊ သင်္ချာ၊ သမိုင်းနဲ့ သျှမ်းစာ အဓိက သင်ကြားပေးတယ်။ ကျမတို့ကျောင်းသားမိဘတွေဘက်ကတော့ ကျောင်းစရိတ်မကုန်ရပါဘူး။ ဒီက ၃ နှစ်တက်ပြီးရင်ကာလိမှာကျောင်းသွားတက်ရမယ်လို့ပြောပါတယ်။အဲတာကို သဘောကျလို့ပါ”- ဟုကျောင်းသားမိဘတဦးဖြစ်သည့် နန်းခမ်းအွန်က ပြောသည်။

လဲချားမြို့အနောက်ဘက် ၁၈ မိုင်ခန့်အကွာ ၀မ့်ယိမ်းအုပ်စုရှိ အဆိုပါကျောင်းတွင် ကျောင်းသူ ကျောင်းသား လေးများ ၄၀ ခန့်ရှိပြီး လက်ရှိသင်ကြားပေးနေသည့်ဆရာ ဆရာမ ၃ ဦး သာရှိကြောင်းသိရသည်။

“ဆရာ ၊ဆရာမတွေကလည်း ကာလိမှာရှိတဲ့ကော်တိုင်းအမျိုးသားကောလိပ်ကနေ ပ့ံပိုးပေးတယ်။ သင်ရိုးညွန်း တမ်းတွေ စာအုပ်စာတမ်းတွေကလည်း ကော်တိုင်းကနေပံ့ပိုးပေးတယ်။ ကော်တိုင်းအမျိုးသားကျောင်း နဲ့ အခြေခံပညာ ဆက်လက်သင်ကြားနိုင်အောင် ချိတ်ဆက်ထားတယ် ”- ဟုလည်း စိုင်းလိုင်းဟိန်းက ပြောဆိုပါသည်။

အဆိုပါ သျှမ်းအမျိုးသားကျောင်း ဖြစ်မြောက်ရေးအတွက် ၀မ့်ယိမ်းကျောင်းတိုက်မှ ဆရာတော်က ကမကထပြု ကာ ၂၀၁၆ ခုနှစ်က စတင်ဖွင့်လှစ်ခဲ့ပါသည်။ လက်ရှိတွင် ကော်တိုင်းအမျိုးသားကောလိပ်ကျောင်းပံ့ပိုးမှုဖြင့် ၃ တန်း အထိ ဖွင့်လှစ်သင်ကြားသွားမည်ဟု ဆိုသည်။