သျှမ်းပြည်တောင်ပိုင်း ၊ ရွာငံမြို့နယ်တွင် ဓနုဒေသအခြေစိုက် (၁၀၀၃) တပ်ရင်း အမည်ကို အလွှဲသုံးစားလုပ်၍ ဓားပြတိုက်သူ အမျိုးသားတစ်ဦးကို ဖမ်းဆီးထားကြောင်း (၁၀၀၃) တပ်ရင်းမှ ပြီးခဲ့သည့် ဇွန်လ (၂၂)ရက်နေ့တွင် ထုတ်ပြန်ထားသည်။
ပြီးခဲ့သည့် (၂၀၂၅) ခုနှစ်မှ စ၍ ရွာငံမြို့နယ်နှင့် ပင်းတယမြို့နယ်ဘက်တွင် ဓားပြတိုက်ခံရမှုများ ဖြစ်ပွားခဲ့ပြီး အဆိုပါ ဓားပြတိုက်မှုဖြစ်စဉ်များမှာ ဓနုဒေသ အစိုက် (၁၀၀၃) တပ်ရင်း အမည်ကိုသုံး၍ ဓားပြတိုက်ခဲ့ကြောင်း သိရသည်။
အဆိုပါ ဓားပြတိုက်မှုဦးဆောင်သူနှင့် အဖွဲ့ဝင်အချို့မှာ ထွက်ပြေးတိမ်းရှောင်လျက်ရှိပြီး တစ်ဦးကိုသာ ဖမ်းဆီးရမိသေးကြောင်းနှင့် ဓားပြတိုက်သူများမှာ အွန်လိုင်းစလော့ဂိမ်းဆော့ကစားသူများ၊ မူးယစ်ဆေးသုံးစွဲသူများ ဖြစ်ကြောင်း သိရသည်။
“ဖမ်းမိထားတဲ့ တစ်ယောက် ပြောပြချက်အရဆိုရင် သူတို့ဂိမ်းရှုံးတော့ ဓားပြသွားတိုက်ကြတာတဲ့၊ လက်နက်ကြတော့ ဘုရားပွဲက သေနတ်တွေကို ပုဆိုးနဲ့ ပတ်ပြီး အစစ်ထင်အောင် ဟန်ပြပြီး ပိုက်ဆံတောင်းတာတဲ့။ဒီလိုလုပ်တော့ ကျနော်တို့ တပ်ရင်း နာမည်ထိခိုက်တယ်။”ဟု( ၁၀၀၃) တပ်ရင်းမှ တပ်ဖွဲ့ဝင်တစ်ဦးက ပြောသည်။
ထိုသို့ ဓားပြတိုက်မှုများကြောင့် တော်လှန်ရးတပ်ဖွဲံ အချင်းချင်းကြား ယုံကြည်မှုကင်းမဲ့စေရန် သတင်းးအမှားများဖြန့်ဝေခဲ့သောကြောင့် အထင်မြင်လွဲမှားမှုများ ကြုံခဲ့ရကြောင်း ၎င်း တပ်ဖွဲ့ဝင် အမျိုးသားတစ်ဦးက ပြောသည်။
ယခုကဲ့သို့ ဓားပြတိုက်မှုများ ထပ်မံ မဖြစ်ပွားစေရန် ဓနုဒေသအတွင်း စလော့ဂိမ်းကစားသူများနှင့် မူးယစ်ဆေးသုံးစွဲ ရောင်းဝယ်နေသူများကို ဖော်ထုတ်အရေးယူသွားမည်ဟု အသိပေးထုတ်ပြန်ထားသည်။
ထို့အပြင် ဓနုဒေသအတွင်း မိဘများအနေဖြင့် မိမိတို့၏ သား၊သမီးများကို အွန်လိုင်းလောင်းကစားများ မူးယစ်ဆေးဝါးသုံးစွဲ ရောင်းဝယ်ခြင်းများ မရှိအောင် ဂရုစိုက်စောင့်ကြည့်ရန် လိုအပ်ကြောင်းလည်း ထုတ်ပြန်ထားသည်.
“ကျနော်တို့အနေနဲ့တော့ စလော့ဂိမ်းဆော့တဲ့သူတွေ၊ မူးယစ်ဆေး ရောင်း၊ဝယ်တဲ့သူတွေကို ဖော်ထုတ်သွားမှာပါ၊ ကိုယ့်ပတ်ဝန်းကျင်မှာ ဒီလိုမျိုး တွေ သုံစွဲ ရောင်းဝယ် နေရင် ကျနော်တို့ တပ်ရင်းကို တိုင်လို့ရတယ်၊ အခုလက်ရှိ ဖမ်းမိထားတဲ့ လူငယ်ကိုတော့ အကြီးကဲတွေက ဘယ်လို လုပ်မလဲတော့ မသိဘူး။”ဟု တပ်ဖွဲ့ဝင်တစ်ဦးက ပြောသည်။
အဆိုပါ ဓားပြတိုက်မှုဖြစ်စဉ်နှင့် ပတ်သက်၍ (၁၀၀၃) တပ်ရင်းမှ ပြီးခဲ့သည့် ဇွန်လ (၁၉)ရက်နေ့တွင် ထုတ်ပြန်ရှင်းလင်းမှုများ ပြုလုပ်ခဲ့သည်။
ဓနုဒေသအခြေစိုက် ပြည်သူ့ကာကွယ်ရေးတပ်မတော် (၁၀၀၃) တပ်ရင်းသည် အမျိုးသားညီညွတ်ရေး အစိုးရ၊ ကာကွယ်ရေးဝန်ကြီးဌာန၊ ရှမ်းတောင်-ကယား(ကရင်နီ) တိုင်းစစ်ဌာနအောက်တွင် ရှိပြီး ရွာငံနှင့် ရှမ်း-ကယားနယ်စပ်တွင် အခြေစိုက် လှုပ်ရှားသည့် အဖွဲ့ဖြစ်ကြောင်း သိရသည်။
Leave a Comments