ချင်းမိုင်မြို့လယ်ခေါင်ရှိ Lotus’s Go Fresh စူပါမားကတ်တွင် မုန့်နှင့် ကုန်ပစ္စည်းအချို့ခိုးယူကာ ဆိုင်ကယ်ဖြင့် ထွက်ပြေးခဲ့သည့် သျှမ်း “တိုင်းယိုင်”လူငယ် ၃ ဦးအနက် ၂ ဦးကို ချင်းမိုင်ရဲတပ်ဖွဲ့က ဖမ်းဆီးခဲ့ကြောင်း ချင်းမိုင်သတင်းများတွင်ဖော်ပြသည်။

ယမန်နေ့ (ဇွန်လ ၁၇ ရက်) ညနေ ၄နာရီခွဲတွင် ချင်းမိုင်မြို့လယ်ရှိ Lotus’s Go Fresh စူပါမားကတ်သို့ လူငယ် ၃ ဦးသည် ဈေးဝယ်ဟန်ဆောင်ကာ ဝင်ရောက်လာခဲ့သည်။ ၎င်းတို့သည် ဆိုင်အတွင်းရှိ အစားအစာနှင့် မုန့်အများစုကို ရွေးချယ်ပြီးနောက် ငွေရှင်းကောင်တာသို့ သွားရောက်ခြင်းမပြုဘဲ ဆိုင်အပြင်ဘက်သို့ ရုတ်တရက် ထွက်ပြေးခဲ့ကြသည်။

ထို့နောက် ဆိုင်ပြင်ပတွင် အသင့်စောင့်ဆိုင်းနေသည့် မော်တော်ဆိုင်ကယ်တစ်စီးဖြင့် Phra Pok Klao လမ်း အတိုင်း အရှိန်ပြင်းစွာ မောင်းနှင်ထွက်ပြေးခဲ့ကြသဖြင့် ဆိုင်ဝန်ထမ်းများက ရဲတပ်ဖွဲ့၏ အရေးပေါ်ဌာနသို့ ချက်ချင်း ဆက်သွယ်အကြောင်းကြားခဲ့သည်။

သတင်းရရှိပြီးနောက် ချင်းမိုင်ယာဉ်ထိန်းရဲတပ်ဖွဲ့သည် တရားခံများ ထွက်ပြေးနိုင်သည့် လမ်းကြောင်းများကို ချက်ချင်း ကြားဖြတ်ပိတ်ဆို့ခဲ့ပြီး လူငယ် ၂ ဦးဖမ်းဆီးခံခဲ့ရသည်။

လက်ရှိ ဖမ်းဆီးရမိမှု အခြေအနေအရ အသက် ၁၈ နှစ်နှင့် ၁၉ နှစ်အရွယ်ရှိ သျှမ်း (တိုင်းယိုင်) လူငယ် ၂ ဦးကို ခိုးရာပါ မုန့်ထုတ်ကုန်များနှင့်အတူ ဖမ်းဆီးရမိခဲ့သည်။

ရဲတပ်ဖွဲ့က ဆိုင်ကယ်ကို လိုက်လံပိတ်ဆို့ဖမ်းဆီးနေစဉ် ဆိုင်ကယ်နောက်ဆုံး၌ လိုက်ပါလာသည့် လူငယ်တစ်ဦးမှာ ဆိုင်ကယ်ပေါ်မှ ခုန်ချကာ Wat Phuak Hong ဘုန်းကြီးကျောင်း အနီး၌ ခြေလျင်ဖြင့် လွတ်မြောက်သွားခဲ့သည်။

စစ်ဆေးမေးမြန်းချက်များအရ ဖမ်းဆီးခံရသူများသည် ချင်းမိုင်တွင် ရွှေ့ပြောင်းအလုပ်သမားအဖြစ် မှတ်ပုံတင်ထားသည့် အသက် ၂၀ ကျော်အရွယ် သျှမ်းလူမျိုး (တိုင်ယိုင်) များ ဖြစ်ကြပြီး ပြစ်မှုကျူးလွန်ခဲ့ကြောင်း ဝန်ခံခဲ့ကြသည်။​

၎င်းတို့ရရှိသည့် နေ့စားလုပ်အားခမှာ နေ့စဉ်လူမှုဘဝ စားဝတ်နေရေးအတွက် မလုံလောက်သဖြင့် ငွေကြေးကျပ်တည်းမှုကြောင့် သူငယ်ချင်းဖြစ်သူများနှင့် တိုင်ပင်ကာ Lotus’s ဆိုင်အတွင်းမှ မုန့်များ၊ အသင့်စားအစာများနှင့် ရေခဲမုန့်များကို ခိုးယူခဲ့ခြင်းဖြစ်ကြောင်း ထွက်ဆိုခဲ့သည်။

လက်ရှိတွင် ထွက်ပြေးလွတ်မြောက်သွားသည့် လူငယ်ကို ခြေရာခံဖမ်းဆီးနိုင်ရန် စုံစမ်းစစ်ဆေးရေးဌာနခွဲက CCTV မှတ်တမ်းများကို ပြန်လည်စစ်ဆေးလျက်ရှိပြီး၊ ဖမ်းဆီးရမိသူ ၂ ဦးကို တရားဝင်ဥပဒေကြောင်းအရ ထိရောက်စွာ အရေးယူနိုင်ရန် ချင်းမိုင်ရဲစခန်းသို့ လွှဲပြောင်းအပ်နှံကာ အမှုဖွင့်လှစ်ထားကြောင်း သတင်းရရှိသည်။

ကိုးကား – Chiang Mai News