သျှမ်းပြည်တောင်ပိုင်း၊ တောင်ကြီးမြို့ ရွှေဘုန်းပွင့် သွားလမ်း လူပြတ်သည့်နေရာတွင် စစ်ကော်မရှင်က စောင့်ဆိုင်းပြီး အမျိုးသမီးများကိုပါ ပေါ်တာဆွဲဖမ်းဆီးမှု ပြုလုပ်နေကြောင်း စုံစမ်းသိရသည်။
ပြီးခဲ့သည့် ဖေဖော်ဝါရီလ နောက်ဆုံးပတ်တွင် တောင်ကြီးမြို့နယ် ရွှေဘုန်းပွင့် ဘုရားသွားလမ်းတွင် စစ်ကော်မရှင် တပ်သားများသည် လူပြတ်သည့်နေရာတွင် စောင့်ဆိုင်းပြီး အမျိုးသမီးအပါအဝင် လူငယ် ၅ဉီးကို ဖမ်းဆီးခဲ့ကြောင်း တောင်ကြီးမြို့ခံ အမျိုးသမီးတစ်ဉီးက သျှမ်းသံတော်ဆင့်ကိုပြောသည်။
“သူငယ်ချင်းတွေ့နဲ့ ညနေဘက်ကို ရွှေဘုန်းပွင့်သွားတာ စစ်သားတွေ အုပ်စုလိုက်ပဲ ဘယ်သွားလဲ။ ရပ်စမ်းဘာညာနဲ့ ရှေ့က လူတွေကို မေးတာ ကြားတော့ ချက်ချင်း လှည့်ပြန်လာခဲ့ရတာ၊ပေါ်တာဆွဲခံရတာ ငါးယောက်လောက်ရှိပြီ ၊ မိန်းကလေးမို့လို့ မဆွဲဘူးမထင်နဲ့ အကုန်ဆွဲတာ၊ အဲနေ့ကတည်းက ဘယ်မှ မသွားရဲတော့ဘူး။”ဟု ကိုယ်တိုင်ကြုံတွေ့ရသည့် တောင်ကြီးမြို့ခံ အမျိုးသမီးတစ်ဦးက ပြောသည်။
ထို့အပြင် တောင်ကြီးမြို့တွင်း ညအချိန် လူပြတ်သည့်နေရာများတွင်လည်း စစ်ကော်မရှင် တပ်သားများက စောင့်ဆိုင်းကာ ဖမ်းဆီးမှုများပြုလုပ်ပြီး စစ်မှုထမ်း လူစားထိုးရန် ခေါ်ဆောင်မှုများလည်းရှိကြောင်း သိရသည်။
“ခုတလောက အခြေနေ သိပ်မကောင်းဘူး၊ အပြင်မှာ အကြာကြီးနေလို့ မကောင်းဘူး၊ အသိတစ်ယောက်ဆို ရပ်ကွက်လမ်းမှာ အလုပ်ကအပြန် ဖမ်းခံရတာ ပိုက်ဆံပေးပြီးလိုက်တာ အဆင့်ဆင့် စစ်မှုထမ်းဖို့ ရောင်းစားလိုက်ပြီတဲ့၊ ခုထိ အဆက်သွယ်မရတော့ဘူး။”ဟု တောင်ကြီးဒေသခံ အမျိုးသားတစ်ဦးက ပြောသည်။
ထို့ကြောင့် ဒေသခံလူငယ်များကို ညဘက်တွင် မလိုအပ်လျှင် အပြင်မထွက်ကြရန်နှင့် ညနေဘက် အလုပ်ဆင်းချိန် စောစောပြန်ကြရန် လိုအပ်ကြောင်း အဆိုပါ အမျိုးသားက အသိပေးပြောထားသည်။
ဖေဖော်ဝါရီလ ဒုတိယပတ်မှ စတင်ပြီး တောင်ကြီးမြို့ပေါ် ရပ်ကွက်များရှိ အမျိုးသားအဆောင်များကို စစ်ကော်မရှင်လက်အောက်ခံ ဌာနဆိုင်ရာ ပူးပေါင်းအဖွဲ့များမှ ရှောင်တခင် ဧည့်စာရင်း ဝင်ရောက်စစ်ဆေးပြီး ဖမ်းဆီးမှုများ ရှိနေကြောင်း၊ ညအချိန်တွင်လည်း လမ်းပေါ် မထင်မှတ်ဘဲ ပေါ်တာဆွဲခြင်းများ ရှိနေကြောင်း တောင်ကြီးဒေသခံများက ပြောသည်။
စစ်ကော်မရှင်တပ်သည် ၂၀၂၄ ခုနှစ်တွင် ပြည်သူ့စစ်မှုထမ်းဥပဒေကို အသက်သွင်းခဲ့ပြီးနောက် စစ်မှုထမ်းသင်တန်းအတွက် အသက် (၁၈) နှစ်မှ (၂၇)နှစ် အတွင်း အမျိုးသမီးများနှင့် အသက် (၁၈)နှစ်မှ (၃၅) နှစ်ကြား အမျိုးသားများကို သတ်မှတ်ခေါ်ဆောင်နေကြောင်း သိရှိရသည်။
Leave a Comments