ထိုင်းနိုင်ငံမြောက်ပိုင်း၏ အဓိကခရီးသွားမြို့တော်ဖြစ်သော ချင်းမိုင်မြို့တွင် တရုတ်နှစ်သစ်ကူးပွဲတော်ကို ချင်းမိုင်ဒုတိယခရိုင်အုပ်ချုပ်ရေးမှူး Mr. Chatchawal Panya၊ တရုတ်ကောင်စစ်ဝန်ချုပ် Mr. Chen Hai Long နှင့် ချင်းမိုင်ဒုတိယမြို့တော်ဝန် Mr. Sunthorn Yamsiri တို့က ယနေ့ (ဖေဖော်ဝါရီလ ၁၇ ရက်)တွင် တက်ရောက်ဖွင့်လှစ်ခဲ့သည်။

ယခု ၂၀၂၆ ခုနှစ် တရုတ်နှစ်သစ်ကူးပွဲတော်သည် ယခင် ၂၀၂၅ ခုနှစ် “မြွေနှစ်”ကုန်ဆုံး၍ အသစ်ရောက်ရှိလာသော “မြင်းနှစ်”သို့ ကူးပြောင်းသည့် အထိမ်းအမှတ်အဖြစ် ကျင်းပခြင်း ဖြစ်သည်။

ထို့နောက် မိခင်ဘုရင်မကြီး သီရိခေတ်အား ဂုဏ်ပြုသောအားဖြင့် ငြိမ်သက်ဂါရဝပြုခြင်းနှင့်အတူ ပွဲတော်ကို စည်တော်တီး၍ ဖွင့်လှစ်ပေးခဲ့ကြသည်။

တရုတ်နှစ်သစ်ကူးပွဲတော်ကို ဖေဖော်ဝါရီလ ၁၇ ရက်မှ ၁၈ ရက်အထိ နှစ်ရက်တိုင်တိုင် ကျင်းပသွားမည်ဖြစ်ကာ တာဖဲဂိတ် (The Phae Gate )မှ ဝရိုရုတ်စျေး (Waroros Market) သို့ သွားရာလမ်းတလျှောက်တွင် မီးပုံးနီထောင်ပေါင်းများစွာဖြင့် အလှဆင်ထားပြီး လမ်းဘေးအစားအစာ အရောင်းဆိုင်ပေါင်း (၁၀၀) ကျော် တည်ခင်းရောင်းချသွားမည် ဖြစ်သည်။

ယခုနှစ် ချင်းမိုင်တရုတ်နှစ်သစ်ကူးပွဲတော်၏ အဓိကဆွဲဆောင်မှုမှာ တာဖဲဂိတ် (Tha Phae Gate) မှ ဝရိုရုတ်ဈေး (Waroros Market) အထိ လှည့်လည်သည့် ဂုဏ်ပြုစီတန်းလှည့်လည်ပွဲ ဖြစ်သည်။

ပွဲတော်အတွင်း လူအုပ်ကြားထဲတွင် တိုးဝှေ့ကပြသည့် ရွေနဂါးအက၊ ထိုင်း-တရုတ် ယဉ်ကျေးမှုပေါင်းစပ်ထားသော အကများ၊ နတ်သမီးအကများနှင့် ထူးခြားဆန်းပြားသည့် အိန်ဂေါ (Enggor) အကများလည်း ပါဝင်သည်။

တရုတ်နှစ်သစ်ကူးကာလအတွင်း တရုတ်နိုင်ငံနှင့် ထိုင်ဝမ်ရှိ မြို့ကြီးများမှ ချင်းမိုင်သို့ တိုက်ရိုက်ပျံသန်းသည့် လေကြောင်းလိုင်းပေါင်း (၆၉) လိုင်းအထိ ရှိနေသဖြင့် ခရီးသွားများ စည်းကားလျက်ရှိကြောင်း Chiang Mai News က ဖော်ပြထားသည်။

အဆိုပါပွဲတော်မှ ဒေသတွင်းစီးပွားရေးအတွက် ဘတ်သန်း ၁၀၀ မှ ၂၀၀ ကြား (အမေရိကန်ဒေါ်လာ ၃ သန်းမှ ၆ သန်းခန့်)အထိ ဝင်ငွေရရှိရန် ခန့်မှန်းထားကြောင်း တာဝန်ရှိသူများက ပြောကြားခဲ့သည်။

ဓာတ်ပုံ – စိုင်းဟန်လင်း / သျှမ်းသံတော်ဆင့်