သျှမ်း – ကရင်နီနယ်စပ် ဖယ်ခုံမြို့နယ်ရှိ မိုးဗြဲမြို့ အနီးတဝိုက်တွင် စစ်ကော်မရှင်တပ်မှ နေ့စဉ်နီးပါး လက်နက်ကြီးများဖြင့် ရမ်းသမ်းပစ်ခတ်မှု ပြုလုပ်နေကြောင်း စုံစမ်းသိရသည်။
ယခု ဇန်နဝါရီလ နောက်ဆုံးပတ်တွင် ဖယ်ခုံမြို့နယ်အတွင်း တိုက်ပွဲများ ငြိမ်သက်နေသော်လည်း မိုးဗြဲမြို့အခြေစိုက် စစ်ကော်မရှင်တပ် ခြေမြန်တပ်ရင်း ခမရ – ၄၂၂ ဘက်မှ အနီးအနား ကျေးရွာများသို့ လက်နက်ကြီးများဖြင့် တစ်ဖက်သက် ရမ်းသမ်းပစ်ခတ်နေခြင်းကြောင့် ပြည်သူများ စိုးရိမ်ထိတ်လန့်နေရကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။
“အဲ့ဒီ မိုးဗြဲ (ခမရ – ၄၂၂) ထဲကနေ မြို့ပြင်ဘက်ကို ပစ်နေတာ၊ နှစ်ရက် သုံးရက်ရှိပြီ။ မနက်ပိုင်းနဲ့ ညပိုင်းတွေကတော့ ပုံမှန်ကို ရမ်းသမ်းပြီး ပစ်နေတာ။ အခုအခြေအနေ အရတော့ တိုက်ပွဲတွေက ငြိမ်နေတယ်”ဟု ဖယ်ခုံမြို့နယ်မှ စစ်ရေးသတင်းရင်းမြစ်တစ်ဦးက ပြောသည်။
ပြီးခဲ့သည့် ဇန်နဝါရီလဆန်းပိုင်းတွင် မိုးဗြဲမြို့ အနီးတဝိုက်တွင် စစ်ကော်မရှင်တပ်နှင့် ကရင်နီတော်လှန်ရေး တပ်ပေါင်းစုတို့အကြား နှစ်ဖက်ထိတွေ့တိုက်ပွဲများ ပြင်းထန်ခဲ့ကြောင်း ဒေသခံများက ပြောသည်။
မိုးဗြဲမြို့ကို စစ်ကော်မရှင်တပ်က ယမန်နှစ် ၂၀၂၅ ခုနှစ် ဇူလိုင်လအတွင်း ပြန်လည်ထိန်းချုပ်နိုင်ခဲ့ပြီး စစ်ကော်မရှင်ဘက်မှ မြေပြင်ထိုးစစ်ဆင် စစ်ရေးလှုပ်ရှားမှုများ ရှိနေသည့်အပြင် ကရင်နီတော်လှန်ရေး တပ်ပေါင်းစုများနှင့်လည်း မကြာခဏ ထိတွေ့ တိုက်ပွဲများ ဖြစ်ပွားလေ့ရှိကြောင်း သိရသည်။
အလားတူ ယခု ရက်သတ္တပတ်အတွင်း ဖယ်ခုံမြို့နယ် အနောက်ဘက်ခြမ်း ဆောင်းပြောင်းကျေးရွာ အနီးတစ်ဝိုက်ရှိ စစ်ကော်မရှင်တပ်နှင့် ၎င်းလက်အောက်ခံ ပအိုဝ်းပြည်သူ့စစ် (PNO) တို့က တောင်စလုံးကျေးရွာ၊ မြောက်စလုံးကျေးရွာ အနီးတဝိုက်သို့ လက်နက်ကြီးများဖြင့် ရမ်းသမ်းပစ်ခတ်နေကြောင်း ဒေသခံများထံမှ သိရသည်။
Leave a Comments