သျှမ်းပြည် ကျိုင်းတုံမြို့တွင် ဝစီပိတ်ဆရာတော် တည်ထားသည့် ဗုဒ္ဓဥယျာဉ်သို့ စစ်ခေါင်းဆောင် မင်းအောင်လှိုင် သွားရောက်ကြည့်ရှုခဲ့ကြောင်း သတင်းသိရသည်။
ယမန်နေ့ (ဇန်နဝါရီလ ၁၈ ရက်) နေ့လယ်ပိုင်းတွင် ကျိုင်းတုံမြို့ရှိ ဝစီပိတ်ဆရာတော် ဘဒ္ဒန္တကောဝိဒ တည်ထားသည့် ဗုဒ္ဓဥယျာဉ်သို့ စစ်ခေါင်းဆောင် မင်းအောင်လှိုင် လာရောက်ပြီး ယမန်နှစ် မေလအတွင်းက သရဖူ ဌာပနာခဲ့သည့် လောကသရဖူ စေတီတော် တည်ဆောက်ရေးကို ကြည့်ရှုစစ်ဆေးခဲ့ကြောင်း စစ်ကော်မရှင်လက်အောက်ခံ သတင်းစာများတွင် ဖော်ပြသည်။
ကျိုင်းတုံမြို့ရှိ သီလဓမ္မကုန်းသာတောရကျောင်း၌ သီတင်းသုံးနေထိုင်သည့် ဝစီပိတ်ဆရာတော်သည် စစ်ခေါင်းဆောင် မင်းအောင်လှိုင် တြိဂံဒေသ တိုင်းစစ်ဌာနချုပ် တိုင်းမှူးဖြစ်ချိန်ကတည်းက ကိုးကွယ်ခဲ့သည့် ဆရာတော်တစ်ပါး ဖြစ်ပြီး စစ်ခေါင်းဆောင်ကို ယတြာ အစီအမံများ ပြုလုပ်ပေးကြောင်း ပြောဆိုမှုများလည်း ရှိသည်။
အလားတူ ယမန်နေ့ ညပိုင်းတွင် ကျိုင်းတုံမြို့ ပြည်နယ်အားကစားကွင်း၌ ကျင်းပပြုလုပ်သည့် (၄၂) ကြိမ်မြောက် လားဟူရိုးရာ နှစ်သစ်ကူးပွဲကိုလည်း စစ်ခေါင်းဆောင် မင်းအောင်လှိုင် တက်ရောက်ခဲ့ကြောင်း သိရသည်။
ကျိုင်းတုံမြို့နယ်သည် ယမန်နှစ် ၂၀၂၅ ဒီဇင်ဘာလ ၂၈ ရက်တွင် ကျင်းပခဲ့သည့် ရွေးကောက်ပွဲ ပထမပိုင်းတွင် ပါဝင်ခဲ့ပြီး ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ USDP မှ စစ်တပ်နှင့် ပြည်သူ့စစ်များ ပေးသည့် ကြိုတင်မဲများဖြင့် အနိုင်ရရှိခဲ့ကြောင်း သိရသည်။
Leave a Comments