စစ်ကော်မရှင် ကျင်းပမည့် ရွေးကောက်ပွဲ ပထမပိုင်း ရက်သတ္တပတ်အလို လားရှိုးမြို့တွင် ပေါက်ကွဲမှု ဖြစ်ပွားပြီးနောက် မြို့တွင်း စစ်ဆေးရေးဂိတ်များ စစ်ဆေးမှုတင်းကြပ်နေကြောင်း စုံစမ်းသိရသည်။
ယနေ့ (ဒီဇင်ဘာလ ၂၃ ရက်) လားရှိုးမြို့ အဝင်အထွက်ရှိ စစ်ကော်မရှင် စစ်ဆေးရေးဂိတ်များတွင် စစ်သား နှင့် လက်အောင်ရဲများက ကားအပြင် ဆိုင်ကယ်များကိုပါ စစ်ဆေးမှုတင်းကြပ်နေကြောင်း ကိုယ်တိုင်ကြုံတွေ့ခဲ့သည့် လားရှိုးမြို့ ဒေသခံ အမျိုးသမီးတစ်ဦက သျှမ်းသံတော်ဆင့်ကိုပြောသည်။
“မနက်လောက်က မြို့ပြင်သွားတော့ အရမ်းစစ်နေတာ။ဆိုင်ကယ်နဲ့ သွားတာ လွယ်အိတ်တွေပါ ဖွင့်ပြရတယ်။အရင်က ဆိုင်ကယ်ဆိုရင် မစစ်ဘူးလေ။ကားတွေလောက်ပဲ နည်းနည်းပါးပါးစစ်တာ။ ဒီနေ့က အကုန်စစ်တာ ကားတွေကိုလည်း သေချာစစ်နေတာ။”ဟု ကိုယ်တိုင်ကြုံတွေ့ခဲ့သည့် လားရှိုးမြို့ ဒေသခံ အမျိုးသမီးတစ်ဦက ပြောသည်။
လာမည့် (ဒီဇင်ဘာလ ၂၈ ရက်) တွင် စစ်ကော်မရှင် လက်အောက်ခံ ပြည်ထောင်စု ရွေးကောက်ပွဲ ကော်မရှင် ဦးဆောင်ကျင်းပမည့် ရွေးကောက်ပွဲ အပိုင်း ၁ တွင် လားရှိုးမြို့နယ် ပါဝင်သည်။
စစ်ကော်မရှင်ကျင်းပမည့် ရွေးကောက်ပွဲတွင် သျှမ်းပြည်ရှိ မြို့နယ်ပေါင်း ၁၂ ခုပါဝင်ပြီး ယင်းမြို့မှာ ပင်းတယ၊ ဟိုပုံး၊ နောင်ချို၊ ကျိုင်းတုံ၊ တာချီလိတ်၊ တောင်ကြီး၊ နမ့်စန်၊ မူဆယ်၊ မိုင်းဆတ်၊ လားရှိုး၊ လင်းခေး၊ လွိုင်လင်မြို့နယ်တို့ ဖြစ်သည်။
ပြီးခဲ့သည့် (ဒီဇင်ဘာလ ၂၁ ရက်) လားရှိုးမြို့ပေါ်ရှိ ရပ်ကွက် (၅) နယ်မြေ (၄) တရုတ်ဘုံကျောင်း အနီးရှိ နေအိမ်တစ်ခုတွင် လက်လုပ်မိုင်း ပေါက်ကွဲမှု ဖြစ်ပွားခဲ့ပြီး၊ ရပ်ကွက် (၂) အုပ်ချုပ်ရေးရုံးအနီးတွင် ပေါက်ကွဲမှု ဖြစ်ပွားခဲ့ကြောင်းသည်။
လက်ရှိ လားရှိုးမြို့ပေါ် ရပ်ကွက် (၁၂) ခုကို စစ်ကော်မရှင်ဘက်က ထိန်းချုပ်ထားပြီး မြို့ပြင်ရှိ ကျေးရွာအုပ်စု အများစုကို ကိုးကန့်တပ်ဖွဲ့ MNDAA က ထိန်းချုပ်ထားသည်။
အလားတူ မူဆယ်မြို့တွင်လည်း ပြီးခဲ့သည့် (ဒီဇင်ဘာလ ၂၁ ရက်)စပြီး မြို့အဝင်အထွက်ရှိ စစ်ကော်မရှင် စစ်ဆေးရေးဂိတ်များတွင် လုံခြုံရေးတင်းကြပ်ကာ ကားအပြင် ဆိုင်ကယ်များကိုပါ စစ်ဆေးတင်းကြပ်နေကြောင်း ဒေသခံများက ပြောသည်။
Leave a Comments