သျှမ်းပြည် မြောက်ပိုင်း နမ့်လန် – ရပ်စောက် သွားသည့် ပြည်ထောင်စုလမ်းပိုင်းကို စစ်ကော်မရှင်တပ်က လမ်းများကို ယာယီပိတ်ထားကြောင်းသတင်းရရှိသည်။

ယနေ့ (နိုဝင်ဘာလ ၁၈ ရက်) မနက်ပိုင်းမှစပြီး နမ့်လန်မြို့ မှ ရပ်စောက်သွားသည့်လမ်းပိုင်းကို စစ်ကော်မရှင်တပ်က လမ်းများကို ယာယီပိတ်လိုက်ကြောင်း နမ့်လန်မြို့ ဒေသခံအမျိုးသားတစ်ဦးက သျှမ်သံတော်ဆင့်ကို ပြောသည်။

“နမ့်လန် – ကျောက်ဂူ လမ်းကတော့ ဒီနေ့ ပိတ်လိုက်ပြီ။ သွားလာလို့ မရဘူး။လိုင်းကားတွေ ကုန်တင်ကားတွေကတော့ အဝင်အထွက်အသွားအလာကိုမရတော့ဘူး။ ကွင်းလမ်းတွေက အစမရတော့ဘူး။ တောင်ယာသွားဖို့တောင် မနည်းပြော ယူရတယ်။” ဟု နမ့်လန်မြို့ ဒေသခံအမျိုးသားတစ်ဦးကပြောသည်။

မိုင်းရယ် – သီပေါ သွားသည့် ပြည်ထောင်စုလမ်ကြီးကိုလည်း စစ်ကော်မရှင်တပ်က ပြီးခဲ့သည့် နိုဝင်ဘာလ ၁၄ ရက်တွင်စပြီး ယာယီ ပိတ်လိုက်ခဲ့ကြောင်း သိရသည်။

“နမ့်လန်မှာရှိတဲ့ စစ်တပ်စစ်ဆေးရေးဂိတ်ရဲ့ တံတားပေါ်မှာ သဲအိတ်တွေနဲ့ လမ်းမတွေမှာ ချထားတာ။ အသေအချာကြီး ကိုချထားတယ်။ သီပေါမြို့က တံတားမှာကောပဲ သဲအိတ်တွေ နဲ့။ခုက သွားလာဖို့ လမ်းတွေ အကုန်ကိုပိတ်ထားတာ။”ဟု ၎င်းကဆက်ပြောသည်။

လက်ရှိတွင် သီပေါမြို့ အဝင်အထွက် တံတား ၊ နမ့်လန် – ရပ်စောက် ၊ ရပ်စောက် – နောင်ချိုသွားသည့် လမ်းများကို စစ်ကော်မရှင်တပ်က လမ်းများလည်း ပိတ်ထားကြောင်း ထိုလမ်းများပိတ်ဆိုင်းလိုက်ခြင်းကြောင့်် တိုက်ပွဲများပြန်ဖြစ်မှာကို လည်း ဒေသခံများစိုးရိမ်နေကြသည်။​

“ အချို့ကလည်း တိုက်ပွဲပြန်ဖြစ်လာမှာလားပေါ့။ သေချာတာကတော့ကုန်စျေးနှုန်းတော့ ဆက်တက်လာနိုင်တယ်” ဟု ၎င်းက ဆိုသည်။

ပြီးခဲ့သည့် နိုဝင်ဘာလ ဒုတိယပတ်တွင် နမ့်လန် – ရပ်စောက် ပြည်ထောင်စုလမ်းမတကြောတွင် တရုတ်နိုင်ငံ ကုန်ပစ္စည်းတင်ဆောလာသည့် ကုန်တင်ကားငယ်များကို စစ်ကော်မရှင်တပ်က စစ်ဆေးရေးဂိတ်များတွင် ဖမ်းဆီးပြီး ဗထူးတပ်အတွင်းသို့ ထိန်းသိမ်းခဲ့ကြောင်း သိရသည်။

ထိုဗထူးတပ်တွင် ထိန်းသိမ်းထားသည့် ကုန်တင်ကားငယ်များကို ယမန့် (နိုဝင်ဘာလ ၁၇ ရက်) တွင် ရပ်စောက်ရဲစခန်းသို့ လွှဲပြောင်းခဲ့ကြောင်း သိရသည်။